ބުޑަޕެސްޓް (ޖޫން 27) - ޔޫރޯ ފުޓްބޯޅަ މުބާރާތުގައި މިރޭ ދެ ވަަނަ ހާފްގެ ބޮޑުބައިގައި އެއް ކުޅުންތެރިއަކު މަަދުކޮށް ކުޅުނު ނެދަލެންޑްސް އަތުން 2-0 އިން މޮޅުވެ، ޗެކް ރިޕަބްލިކް މުބާރާތުގެ ކުއާޓާ ފައިނަލުން ފުރުސަތު ހޯދައިފި އެވެ.
މިރޭގެ މެޗުގެ ދެ ވަނަ ހާފްގެ 40 އަށް ވުރެ ގިނަ މިނިޓް ނެދަލެންޑްސް އިން އެއް ކުޅުންތެރިއަކު މަދުކޮށް ކުޅެން ޖެހުނީ އެ ޓީމުގެ ޑިފެންޑަރު މަތައިސް ޑި ލިޓް އަށް ރަތް ކާޑެއް ދެއްކުމުންނެވެ. ޗެކް ރިޕަބްލިކުން ނެދަލެންޑްސްގެ ކުޅުންތެރިއަކު މަދުވުމުގެ ފައިދާ ރަނގަޅަށް ނެގިއިރު، މިއީ އެ ޓީމުން 2012 ވަނަ އަހަރަށް ފަހު މުބާރާތުގެ ކުއާޓާ ފައިނަލްގައި ކުޅޭ ފުރަތަމަ ފަަހަރެވެ. ޗެކް ރިޕަބްލިކް 2016 ވަނަ އަހަރުގެ ޔޫރޯ އިން ކެޓީ ގްރޫޕް ސްޓޭޖުންނެވެ.
މިއީ ގްރޫޕް ސްޓޭޖުގެ ތިން މެޗުން މޮޅުވުމަށް ފަހު ނޮކައުޓްގެ ފުރަތަމަ މެޗުން ބަލިވެ، ނެދަލެންޑްސް މުބާރާތުން ޖެހިޖެހިގެން ކެޓި ދެ ވަނަ ފަހަރެވެ. އެ ޓީމުން 2008 ވަނަ އަހަރުގެ ޔޫރޯގައި ވެސް ގްރޫޕް ސްޓޭޖު ފަހަނައެޅީ ތިން މެޗުން މޮޅުވެގެންނެވެ. މި ފަހަރު ވެސް ސައްތަ އިން ސައްތަ ރެކޯޑަކާ އެކު ގްރޫޕް ސްޓޭޖް ނިންމާލައިގެން ދެ ވަނަ ބުރުގެ ފުރަތަމަ މެޗުން ބަލިވެ ކެޓީ އެވެ.
ހަންގޭރީގެ ޕުސްކަސް އެރީނާގައި މިރޭ ކުޅުނު މެޗުގެ ފުރަަތަމަ ހާފުގައި ދެ ޓީމުން ވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފަ އެވެ. އޭރިއާތެރެއަށް ހުރަސްވި ބޯޅައަކުން ޗެކް ރިޕަބްލިކްގެ ކެޕްޓަން ތޯމަސް ސޫޗެކް ބޮލުން ޖެހި ބޯޅަ އަރިމަތިން ބޭރަށްދިޔައިރު، ހާފުގެ މެދެއްހާ ހިސާބުން ތޯމަސް ހޮލެޝް ޖެހި ބޯޅަ ދިޔައީ ހުރަސްދަނޑި މަތިންނެވެ.
އޭރިއާބޭރުން ޗެކް ރިޕަބްލިކްގެ ޕެޓްރިކް ޝިކް ޖެހި ޝޮޓް ނެދަލެންޑްސްގެ ކީޕަރު މާޓިން ސްޓެކެލެންބާގް އަތަށް އަމާޒުވިއިރު، އޭރިއާތެރެއިން އެ ޓީމުގެ އޮންޓޮނިން ބަރަކް މުޅިން ހުސްކޮށް ހުރެފައި ފޮނުވާލި ބޯޅަ ނެދަލެންޑްސްގެ ޑިފެންޑަރު ޑި ލިޓް ވަނީ ބްލޮކޮށްފަ އެވެ.
ނެދަލެންޑްސްގެ ކުރިއަށް ކުޅޭ މެމްފިސް ޑިޕާއި އާއި ޑޮންޔެލް މާލެންގެ ފަރާތުން ކޮމްބިނޭޝަން ކުޅުން ކޮންމެވެސް ވަރަކަށް ފުރަތަމަ ހާފުގައި ފެނުނުއިރު، މާލެން އޭރިއާތެރެއިން ޖެހި ޝޮޓެއް ޗެކް ރިޕަބްލިކްގެ ޑިފެންޑަރު ތޯމަސް ކަލާޝް ވަނީ ބްލޮކްކޮށްފަ އެވެ. ނެދަލެންޑްސްގެ ފުލްބެކް ޑެންޒެމް ޑަމްފްރީސް އަށް ލިބޭ ބޯޅަތަކުގައި ޗެކް ރިޕަބްލިކްގެ ފަަހަތަށް ބާރު ބޮޑުވަމުންދިޔައިރު، އޭރިއާތެރެއިން އޭނާ ނެގި ހުރަހެއް ޗެކް ރިޕަބްލިކްގެ ކީޕަރު ތޯމަސް ވަސްލިޗް ވަނީ ފައިން މަތަކޮށްފަ އެވެ.
ދެ ވަނަ ހާފްގެ ކުޅުން ފެށިގެން މެޗުގެ 51 ވަނަ މިނިޓްގައި މާލެން އަށް ވަނީ ގޯލެއް ޖަހަން ރަނުގެ ފުރުސަތެއް ލިބިފަ އެވެ. މުޅިން ހުސްކޮށް އޭރިއާތެރެއަށް ބޯޅަ ހިފައިގެންވަދެ މާލެން އުޅުނީ ކީޕަރު ވަސްލިޗް ނައްޓާފައި ގޯލު ޖަހާށެވެ. އެކަމަކު ވަސްލިޗް ވަނީ އެ ބޯޅަ ހުއްޓުވައިފަ އެވެ.
ނެދަލެންޑްސްގެ މާލެން (ވ) ކީޕަރު ވަސްލިޗް ކައިރިން ބޯޅަ ހިފައިގެންދާން މަސައްކަތްކުރަނީ.
އޭގެ އެއް މިނިޓް ފަހުން ނެދަލެންޑްސްގެ ޑި ލިޓް އަތުން ގެއްލުނު ބޯޅައެއް ހޯދައި ޝިކް ގޯލު ޖަހަން އޭރިއާތެރެއަށް މިސްރާބު ޖެހި ވަގުތު ޑި ލިޓް ވަނީ ބޯޅައިގައި އަތްލައިފަ އެވެ. މެޗުގެ ރެފްރީ ފުރަތަމަ ޑި ލިޓަށް ދެއްކީ ރީނދޫ ކާޑެކެވެ. އެކަމަކު ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީ ހޯދައި ދަނޑުގެ މޮނީޓަރުން ވެސް ބެލުމަށް ފަހު ނިންމީ ޑި ލިޓް އެންމެ ފަހު މީހާގެ ގޮތުގައި ހުރެފައި ޝިކް އަށް ހުރަސް އަޅާފައިވާތީ ޑި ލިޓަށް ރަތް ކާޑެއް ދެއްކުމަށެވެ.
ކުޅުންތެރިއަކު މަދުކޮށް ކުޅެން ޖެހުމުން ނެދަލެންޑްސް އިން ވަނީ މާލެންގެ ބަދަލުގައި ކުއިންސީ ޕްރޮމެސް އަރުވައިފަ އެވެ. އަދި ޕްރޮމެސް ފަޅިން ކުޅުވުމަށް ފަހު ޑިޕާއި އެންމެ ކުރިއަށް ޖެއްސި އެވެ. އެކަމަކު އޭގެ މާ ބޮޑު ފައިދާއެއް ނުކުރި އެވެ.
ޗެކް ރިޕަބްލިކަށް ލީޑުނަގައިދޭން މެޗުގެ 63 ވަނަ މިނިޓްގައި އެ ޓީމުގެ ޕަވެލް ކަޑެރަބެކް ޖެހި ޝޮޓް ޑަމްފްރީސް ވަނީ ބްލޮކްކޮށްފަ އެވެ. އެކަމަކު އޭގެ ފަސް މިނިޓް ފަހު ހޮލެޝް ވަނީ ޗެކް ރިޕަބްލިކަށް ލީޑުނަގައިދީފަ އެވެ. މެޗުގެ 68 ވަނަ މިނިޓްގައި ކޯނަރަކުން އޭރިއާތެރެއަށް ހުރަސްވި ބޯޅަ ކަލާޝް ބޮލުން ޖައްސާލުމުން އެ ބޯޅަ ހޯދުމަށް ފަހު ހޮލެޝް ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިފަ އެވެ. ހޮލެޝް އެ ބޯޅަ ފޮނުވާލިއިރު، ގޯލު ރޮނގުމަތީގައި ހުރި ނެދަލެންޑްސް ތިން ކުޅުންތެރިންނަށް ވެސް އެ ހުއްޓޭގޮތެއްނުވި އެވެ.
އޭގެ ފަހުން ދެ ވަނަ ގޯލެއް ޖަހަން ޗެކް ރިޕަބްލިކުން ފުލުފުލުގައި އެޓޭކް ކުރަމުންދިޔަ އެވެ. އެ ޓީމުގެ ދެ ވަނަ ގޯލު ޖެހީ މެޗުގެ 80 ވަނަ މިނިޓްގައި ޝިކް އެވެ. ހޮލެޝް މެދުތެރެއިން ބޯޅައެއް ހޯދުމަށް ފަހު އޭރިއާ ތެރެއަށް ވަދެ ހުރަސްކޮށްލި ބޯޅަ ޝިކް ވަނީ ގޯލުގެ ކައިރީ ކަނަށް ބޯޅަ އަމާޒުކޮށްލައިފަ އެވެ. މިއީ މި ފަހަރުގެ މުބާރާތުގައި ޝިކް ޖެހި ހަތަރު ވަނަ ގޯލެވެ.
ނެދަލެންޑްސް އިން 1988 ވަނަ އަހަރު ޔޫރޯގެ ޗެމްޕިއަންކަން ހޯދި ފަހުން ނޮކައުޓް ބުރުގައި ކުޅުނު އަށް މެޗުގެ ތެރެއިން މޮޅުވީ ދެ ފަހަރު އެވެ. ޗެކް ރިޕަބްލިކް މިރޭ މޮޅުވިއިރު، ކުއާޓާ ފައިނަލުގައި އެ ޓީމު ކުޅޭނީ ޑެންމާކާ ދެކޮޅަށެވެ.
