އއ. ބޮޑުފޮޅުދޫގެ އާންމު ތަންތަނުގައި ކުޑަކުދިންނަށް ބުލީ ކުރަމުންދާތީ އެކަން ނުކުރުމަށް ރަަށު ކައުންސިލުން މިއަދު އިލްތިމާސްކޮށްފި އެވެ.
ކައުންސިލުން މިއަދު ގެޒެޓު ކުރި އިއުލާނެއްގައި ބުނެފައި ވަނީ ވަކި ވަކި ކުދިން ފާހަގަ ކުރުމަށްފަހު އެކުދިންނަށް ބުލީ ކުރަމުންދާ ކަމުގެ ޝަކުވާ އާންމުންނާއި ބެލެނިވެރިންގެ ފަރާތުން ލިބެމުންދާ ކަމަށެވެ.
"ކުޑަކުދިން ކުޅިވަރުކުޅޭ ތަންތަނުގައި ވަކިވަކި ކުދިން ބައިވެރި ނުކުރުމާއި ވަކިވަކިކުދިން ފާހަގަކޮށް، އެކުދިންނަކީ އެހެންކުދިންނާއެކު ޝާމިލްވެ ކުޅިވަރާއި އެހެނިހެން ކަންކަން ނުކުރެވޭނެ ކުދިން ކަމަށް ވަކިކުރެވޭ ކުދިންނަށް އިހްސާސްވާ ފަދަ ގޮތްތަކަށް ކުދިން އެކަހެރި ކުރެވެމުން ދާކަމުގެ ޝަކުވާ ބައެއް އާންމު ފަރާތްތަކުންނާއި ބައެއް ބެލެނިވެރިންގެ ފަރާތުން ދަނީ މިކައުންސިލަށް ލިބެމުން،" ފޮޅަދޫ ކައުންސިލްގެ ބަޔާނުގައިވެ އެވެ.
އެ ކުދިންނަށް ކުޑަކުދިންނަށް ބޮޑެތި މީހުންގެ ފަރާތުން ވެސް އަނިޔާ ލިބެމުންދާ ކަމަށް ކައުންސިލުން ބުންޏެވެ.
"ހަމައެއާއެކު އެފަދަ ކުދިންނަށް ދަނީ ކެނޑި ނޭޅި އެއުމުރުފުރައިގެ ކުދިންނާއި އަދި ބޮޑެތި މީހުންގެ ފަރާތުން ބުލީކުރެވި އެކަމުގެ ހިތްދަތިކަން ލިބެމުން. މިފަދަ ކަންކަމަކީ އެކަންކަމުގެ ސަބަބުން މުޖުތަމައުގެ ދުޅަހެޔޮކަންނެތި ހެދިބޮޑުވަމުން އަންނަ ޅަފުރައިގެ ކުދިންގެ ހައްގުތަކާއި ހަމަހަމަކަން ގެއްލިގެން ދާނެކަމެއް،" އެ ބަޔާނުގައިވެ އެވެ.
މުޅި ރަށް އެކިތަގަނޑަކަށްވެ ބުލީ ކުރުމާއި އެކި ކުދިންނަށް ތަފާތު ކުރުން ހުއްޓާލުމަށް ކައުންސިލުން އިލްތިމާސް ކުރެ އެވެ.
"މިފަދަކަންކަމަކީ މުޅިމުޖުތަމައު އެކަންކަމަށް ނޫނެކޭ ބުނާ އެކަންކަމާ ދެކޮޅަށް ތެދުވާ ކަންކަމަށް ހެދުމަށް ވެސް އިލްތިމާސް ކުރަން،" ކައުންސިލުން ބުނެފައިވެ އެވެ.
