ތެހްރާން، އިރާން (ޖޫން 25) - ނިއުކްލިއާ އެއްބަސްވުން އަލުން އިއާދަކުރުމާ މެދު ގޮތެއް ނުނިމި ލަސްވަނީ އެމެރިކާ އާއި ފްރާންސާ ހެދި ކަމަށް އިރާނުން ބުނެފި އެވެ.
އިރާނުން އެހެން ބުނީ އެއްބަސްވުން ނިންމަން ވަގުތު ކުޑަތަން ވަމުންދާ ކަމުގެ އިންޒާރު އެމެރިކާ އާއި ފްރާންސުން އިއްޔެ އެ ގައުމަށް ދީފައި ވަނިކޮށެވެ.
"އިދިކޮޅުގައި އެ ތިބި ފަރާތްތައް ގޮތެއް ނިންމަން ޖެހެނީ،" އިރާނުގެ ފޮރިން މިނިސްޓްރީގެ ތަރުޖަމާނު ސައީދު ހާތިބްޒާދޭ ނެރުއްވި ބަޔާނެއްގައި ވެ އެވެ.
އިރާނުގެ ބައެއް ނިއުކްލިއާ މަސައްކަތްތައް މަޑުޖައްސާލުމުން ދަތި ކުރުމުގެ ފިޔަވަޅުތަކަށް ލުއި ދޭން ނިންމާ އެއްބަސްވުމެއް އެކުލަވާލީ 2015 ގަ އެވެ.
ނަމަވެސް އެމެރިކާގެ ރައީސް ޑޮނަލްޑް ޓްރަމްޕް 2017 ވަނަ އަހަރު ނިންމެވީ އެއްބަސްވުމަށް އަމަލު ކުރުން ހުއްޓާލުމަށެވެ. އެހެންވެ، އޭގެ ފަހުން އެއްބަސްވުން ތަންފީޒެއް ނުކުރެ އެވެ.
އެމެރިކާގެ އާ ރައީސް ޖޯ ބައިޑެން ވިދާޅުވީ އެއްބަސްވުން އިއާދަކުރަން ފުރުސަތު އެބަ އޮތް ކަމަށެވެ. އެކަމުގެ މަޝްވަރާތައް އިނގިރޭސި ވިލާތާއި، ޗައިނާ، ފްރާންސް، ޖަރުމަނު، ރަޝިއާ އަދި އެމެރިކާއާ އެކު އިރާނުން ކުރާތާ މިހާރު ދުވަސްތަކެއް ވެއްޖެ އެވެ.
އެކަމަކު ދަތި ކުރުމުގެ ހުރިހާ ފިޔަވަޅެއް އުވާލަން އިރާނުން ބާރު އަޅަމުން ދާތީ މަޝްވަރާ ވަނީ މަޑުޖެހިފަ އެވެ.
