ލަންޑަން (ޖޫން 26) - އޮލިމްޕިކްސްގައި ވާދަކުރާ ގްރޭޓް ބްރިޓިއަން (އިނގިރޭސި) އެތުލީޓުން އަންނަ މަހު ޖަޕާނުގައި ބާއްވާ ޓޯކިޔޯ އޮލިމްޕިކްސް އަށް ދިއުމުގެ ކުރިން ކޮވިޑް ވެކްސިން ޖަހަން ދެކޮޅު ހަދަމުން އަންނަ ކަމަށް ބްރިޓިޝް އޮލިމްޕިކް އެސޯސިއޭޝަން (ބީއޯއޭ) އިން ވަނީ ބުނެފި އެވެ.
ބީއޯއޭގެ ޗީފް އެގްޒެކްޓިވް އެންޑީ އެންސޮން ވިދާޅުވީ އަންނަ މަހު 23 ވަނަ ދުވަހު އޮލިމްޕިކްސް ފެށުމުގެ ކުރިން އިނގިރޭސި އެތުލީޓުންގެ 90 ޕަސެންޓް ވެކްސިންގެ ދެ ޑޯޒް ފުރިހަމަކުރާނެ ކަމަށާއި އެކަމަކު ބައެއް އެތުލީޓުން ވެކްސިން ނުޖަހަން ބޭނުންވާތީ އުނދަގޫތަކެއް ކުރިމަތިވަމުން އަންނަ ކަމަށެވެ.
"މިއީ އެހާ ފަސޭހަ ކަމެއް ނޫން. ބައެއް އެތުލީޓުން އެބަތިބި ވެކްސިން އެއްގޮތަކަށް ވެސް ޖަހަން ބޭނުންނުވާ. އަހަރެމެން ބޭނުން ކޮންމެ މީހެއްގެ ނިންމުމަށް ވެސް އިހުތިރާމް ކުރަން. އެކަަމަކު މި ހާލަތުގައި ވެކްސިން ޖެހުން ނޫން ގޮތެއް މި ކަމުގައި ނޯންނާނެ. އަހަރެމެން މި އަންނަނީ ކެނޑިނޭޅި މަސައްކަތް ކުރަމުން،" އެންސޮން ވިދާޅުވި އެވެ.
އޮލިމްޕިކްސްގައި ވާދަކުރާ އިނގިރޭސި އެތުލީޓުންގެ އަދަދު 370 އަށް ވުރެ އިތުރުވާނެ ކަމަށް ރިޕޯޓްތައް ބުނެ އެވެ.
ޖަޕާނުގައި އޮލިމްޕިކްސް ބާއްވަން އެންމެ ފުރަތަމަ ތާވަލުކުރީ މިދިޔަ އަހަރު އެވެ. އެކަމަކު ކޮވިޑް-19ގެ ހާލަތު އޭރު އޮތީ ވަރަށް ގޯސްކޮށް ކަމަށްވާތީ އޮލިމްޕިކްސްގެ ތާރީހުގައި ފުރަތަމަ ފަހަރަށް މުބާރާތް ފަސްކުރަން ޖެހުނެވެ. މި އަހަރު ވެސް މުބާރާތް ބޭއްވިދާނެތޯ ވަރަށް ފަހަކާ ޖެހެންދެން އޮތީ ސުވާލު އުފެދިފަ އެވެ. އެއީ ޖަޕާނުގައި ކޮވިޑް-19ގެ ހާލަތު ގޯސްވަމުން ދާތީ އެވެ.
އެކަމަކު އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އާއި ޖަޕާން އޮލިމްޕިކް ކޮމިޓީ އަދި އެ ގައުމުގެ ސަރުކާރުގެ މަސައްކަތުން އޮލިމްޕިކްސް އަންނަ މަހު އެ ގައުމުގައި ބޭއްވޭނެކަން މިހާރު އޮތީ ގާތްގަނޑަކަށް ޔަގީންވެފަ އެެވެ.
މި ފަހަރުގެ އޮލިމްޕިކްސް ކުރިއަށް ގެންދަން ޖެހޭނީ ވަރަށް އުނދަގޫ މާހައުލެއްގައި ކަމަށް ގިނަ ގައުމުތަކަކުން ވަނީ ބުނެފަ އެވެ. އެއީ 18000 އެނދުގެ އެތުލީޓުންގެ ވިލެޖްގައި އެއް ކެންޓީނެއް ހުންނަ ގޮތަށް އިންތިޒާމްތައް ހަމަޖެހިފައިވާއިރު، މިއީ ކޮވިޑް-19 ފަދަ ހާލަތެއްގައި އެންމެ ރަނގަޅު ގޮތެއް ނޫން ކަމަށް ބުނެ އެކި ގައުމުތަކުގެ އޮލިމްޕިކް ކޮމިޓީން އަންނަނީ ޝަކުވާ ކުރަމުންނެވެ.
އޮލިމްޕިކްްސް ފަށަން މަހަކަށް ވުރެ ކުޑަ ދުވަސްކޮޅަކަށް މިހާރު ވެފައިވާއިރު، ބައެއް ގައުމުތަކުގެ އެތުލީޓުން އަންނަނީ ގޭމްސް ފެށުމުގެ ކުރިން ތަމްރީން ކުރުމުގެ ގޮތުން ޖަޕާނަށް ދަމުންނެވެ. ޖަޕާނަށް އެތެރެވެވޭނީ ވެކްސިން ދެ ޑޯޒް ފުރިހަމަކުރުމަށް ފަހު އެވެ. އެކަމަކު ދާދި ފަހުން ދެ ޑޯޒް ފުރިހަމަކޮށްގެން ޖަޕާނަށް ދިޔަ ޔޫގާންޑާގެ ދެ އެތުލީޓަކު ވަނީ ކޮވިޑަށް ޕޮޒިޓިވްވެފަ އެވެ.
އޮލިމްޕިކްސްގެ ތެރެއިން އެތުލީޓަކު ގައިން ކޮވިޑްގެ އަލާމާތްތައް ފެނިއްޖެނަަމަ ދައްކަން ޖެހޭނީ އެތުލީޓުންގެ ވިލެޖް ކައިރީގައި ގާއިމްކޮށްފައިވާ "ފީވާ ކްލިނިކް" އަށެވެ. މިހާރު އޮތްގޮތުން އޮލިމްޕިކްސް ފަށާ ފަހުން ކޮވިޑަށް ޕޮޒިޓިވްވާ އެތުލީޓަކަށް ގޭމްސްގައި ބައިވެރިނުވެވޭނެ އެވެ.
