ސުވާ، ފިޖީ (ޖޫން 25) - ޕެސިފިކް ކަނޑުގައި އޮންނަ ޖަޒީރާ ގައުމު، ފިޖީގައި ދުވާލަކު 300 ކޮވިޑް ކޭސް ފެންނަން ފެށުމާއެކު، އެ ގައުމުގައި ހަލުވިކަމާއެކު ބަލި ފެތުރެމުންދާ ކަމަށް ފުރަތަމަ ފަހަރަށް ސަރުކާރުން ބުނެފި އެވެ.
ނަމަވެސް ލޮކްޑައުން ކުރަން ގޮވާލާ ގޮވާލުންތަކަށް ކަމާ ބެހޭ ފަރާތްތަކުން ދެނީ ބީރު ކަންފަތެކެވެ. ފިޖީގެ އާބާދީގައި 930،000 މީހުން އުޅޭއިރު، ސަރުކާރުން ބުނީ ހަލުވިކަމާއެކު ބަލި ފެތުރެން ފެށީ ރައްކާތެރިކަމުގެ ފިޔަވަޅަށް ރައްޔިތުން ފުރިހަމައަށް އަމަލު ނުކުރުމުން ކަމަށެވެ.
ޕާމަނަންޓް ހެލްތު ސެކެޓްރީ ފޯ ހެލްތު ޖޭމްސް ފޮންގް ވިދާޅުވީ އިއްޔެ އެ ގައުމުން 308 ކޭސް ފެނުނު ކަމަށެވެ. މިއާ އެކު އޭޕްރިލް މަހުގައި ފެށި ދެ ވަނަ ރާޅުގައި ބަލި ޖެހުނު މީހުންގެ ޖުމްލަ އަދަދު ވަނީ 2،800 އަށް ވުރެ މައްޗަށް ޖެހިފަ އެވެ.
ފޮންގް ވިދާޅުވީ ލޮކްޑައުންއަކީ ރަނގަޅު ވިސްނުމެއް ނަމަވެސް ގައުމުގެ ރައްޔިތުން ފިޔަވަޅުތަކަށް އަމަލު ނުކުރާކަން ކުރިން ވެސް ފާހަގަވެފައި ވާތީ، ލޮކްޑައުންކޮށްގެން ލިބޭނެ މާ ބޮޑު ފައިދާއެއް ނެތް ކަމަށެވެ. އޭގެ އިތުރުން ލޮކްޑައުންކޮށްފި ނަމަ ފަގީރު ހާލުގައި އުޅޭ މީހުންނަށް ލިބޭ ގެއްލުން ވެސް ފާހަގަކުރެއްވި އެވެ.
"ހަރުކަށި ލޮކްޑައުނަކަށް ދިޔަ ނަމަވެސް، މިފަދަ ކޮމިއުނިޓީތަކުގެ ތެރޭގައި ވައިރަސް ފެތުރެމުން ދާނެ ކަމަށް އަޅުގަނޑުމެންނަށް ގަބޫލުކުރެވޭ،" އޭނާ ވިދާޅުވި އެވެ.
މިދިޔަ އޭޕްރިލަ މަހާ ހަމައަށް ފިޖީގެ ތެރޭގައި ކޮމިއުނިޓީ ސްޕްރެޑެއް ނެތްތާ އެއް އަހަރަށް ވުރެ ގިނަ ދުވަސްވި އެވެ. އޭގެ ފަހުން ދެ ވަނަ ރާޅެއްގައި ބަލި ފެތުރެން ފެށީ އިންޑިއާއިން ފެނުނު ޑެލްޓާ ވޭރިއެންޓު އެ ގައުމާ ހަމައަށް ފޯރުމުންނެވެ.
އަދަދުތައް އިތުރުވެ ސިއްހީ ކާރިސާއެއް ދިމާވެދާނެ ކަމަށް ބަލައި، އެ ގައުމުގެ އެންމެ ބޮޑު ދެ ހޮސްޕިޓަލް މިހާރު ވަނީ ކޮވިޑަށް ފަރުވާދޭ ފެސިލިޓީތަކަށް ބަދަލުކޮށްފަ އެވެ. އޭގެ އިތުރުން ފީލްޑް ހޮސްޕިޓަލްތަކެއް ވެސް ވަނީ އަޅާފަ އެވެ.
ސަރުކާރުގެ ސިޔާސަތަކީ ވަކިވަކި ސަރަހައްދުތައް ލޮކްޑައުންކޮށްގެން، ވެކްސިން ޕްރޮގްރާމަށް އިސްކަން ދިނުމެވެ. މިހާތަނަށް ވެކްސިން ފުރިހަމަކޮށްފައި ވަނީ އާބާދީގެ އެންމެ ޕަސެންޓެކެވެ. ރައީސް ޖޮއިޖީ ކޮންރޮޓޭ ގޮވާލައްވާފައި ވަނީ ވީ އެންމެ އަވަހަށް ވެކްސިން ޖެހުމަށެވެ.
