ބެއިޖިން، ޗައިނާ (ޖޫން 25) - ހުކުރު ދުވަހުގެ ހެނދުނުގެ ވަގުތެއްގައި ސެންޓްރަލް ޗައިނާގެ މާޝަލް އާޓްސް ސްކޫލެއްގައި ހިނގި އަލިފާނުގެ ހާދިސާއެއްގައި 18 މީހުން މަރުވެ، 16 މީހުން ޒަހަމްވެއްޖެ އެވެ.
ޗައިނާގެ މީޑިއާއިން ރިޕޯޓު ކުރި ގޮތުގައި މަރުވި ގިނަ މީހުންގެ ތެރޭގައި ހިމެނެނީ ސްކޫލުގައި ދިރިއުޅޭ އުމުރުން ހަތް އަހަރާއި 16 އަހަރާ ދެމެދުގެ ކުދިންނެވެ.
ޝެންޗެންގް ކައުންޓީ ސަރުކާރުން ނެރުނު ބަޔާނެއްގައި އަލިފާންގަނޑު ނިއްވާލާފައިވާ ކަމަށާއި ރޯވި ސަބަބު ދެނެގަންނަން ތަހުގީގު ފަށާފައިވާ ކަމަށެވެ.
ބެއިޖިން ޓޫޓިއާއޯ ނޫހުން ސަރުކާރުގެ އޮފިޝަލުންނާ ހަވާލަދީ ބުނީ ސްކޫލުގައި ބޯޑިން ދަރިވަރުންގެ ގޮތުގައި 34 ކުދިން ދިރިއުޅޭ ކަމަށެވެ.
އަނިޔާވި މީހުންގެ ތެރެއިން ހަތަރު މީހަކަށް ސީރިއަސް އަނިޔާތައް ލިބިފައި ވާއިރު، ކައިރި ހޮސްޕިޓަލުގައި އެ މީހުންގެ ފުރާނަ ސަލާމަތް ކުރެވޭތޯ ދަނީ މަސައްކަތް ކުރަމުންނެވެ.
ފުލުހުން ނެރުނު ބަޔާނެއްގައި ބުނީ ހިނާން ޕްރޮވިންސްގައި ހުންނަ އެ ސްކޫލުގެ މެނޭޖަރު މިހާރު ހައްޔަރުކޮށްފައިވާ ކަމަށެވެ.
ހިނާންއަކީ ޗައިނާގެ ސަގާފީ މާޝަލް އާޓްސް އުފެދުނު ތަނެވެ. އެ ތަނުގައި ކުންގް ފޫ ދަސްކޮށްދޭ ގިނަ އެކަޑެމީތަކެއް ވެސް ހުރެ އެވެ.
ގަވާއިދުތަކަށް ފުރިހަމައަށް އަމަލު ނުކުރާތީ ނުރައްކާތެރި އަލިފާނުގެ ހާދިސާތައް ވަރަށް ގިނައިން ޗައިނާގައި ހިނގަ އެވެ.
