ޑުބާއީ، ޔޫއޭއީ (ޖޫން 23) - ބަންދުކޮށްފައި އިންނެވި ކަމަށް ކުރިން ވިދާޅުވި އަމީރާ ލަތީފާ ދަތުރު ކުރުމަށް މިހާރު އެއްވެސް ހުރަހެއް ނެތް ކަމަށް، ގާނޫނީ ވަކީލުން މެދުވެރިކޮށް ނެރުނު ބަޔާނެއްގައި ވިދާޅުވެއްޖެ އެވެ.
ދުބާއީގެ ވެރިޔާ މުހައްމަދު އަލް މަހްތޫމްގެ ދަރިކަނބަލުން އިންނަވަނީ ބަންދުކޮށްފައި ކަމަށް ވިދާޅުވާ ވީޑިއޯއެއް ފެބްރުއަރީ މަހު ވަނީ ބީބީސީއިން އާއްމުކޮށްފަ އެވެ.
އެ ވީޑިއޯގައި ލަތީފާ ވިދާޅުވީ އޭނާ އިންނަވަނީ ބަންދުކޮށްފައި ކަމަށާއި ސިއްހީ އެހީތެރިކަން ވެސް ނުލިބޭ ކަމަށެވެ. ބީބީސީއިން ދެއްކި އެ ވީޑިއޯއަކީ ސިއްރުން ރިކޯޑްކޮށްފައިވާ ވީޑިއޯ އެކެވެ.
މީގެ ކުރިން ދެ ފަހަރެއްގެ މަތިން އދ. އިން ވަނީ އޭނާ ދިރި ހުންނެވިކަން ސާބިތުވާ ހެކި ދައްކަން ޔޫއޭއީއަށް ގޮވާލާފަ އެވެ. އަދި އެ ގައުމުން އިޖާބަ ނުދިނުމުން ކަންބޮޑުވުން ވެސް ފާޅުކުރި އެވެ.
ލަތީފާ އެކުވެރިއަކާއެކު މެޑްރިޑް އެއާޕޯޓުގައި ހުރި މަންޒަރު ފެންނަ ފޮޓޯއެއް މި ހަފްތާގައި ވަނީ އިންސްޓަގްރާމް އެކައުންޓެއްގައި ޕޯސްޓުކޮށްފަ އެވެ. އޭގެ ކުރިން ވެސް އެ އެކައުންޓުގައި ވަނީ ދުބާއީގެ ބުރުޖް ހަލީފާގެ ރެސްޓޯރެންޓަކާއި މޯލެއްގައި ލަތީފާ ހުންނެވި ފޮޓޯތައް އާއްމުކޮށްފަ އެވެ.
"އަޅުގަނޑު އޭނާ ކައިރީ އެދުނީ އަޅުގަނޑަށް ދަތުރު ކުރުން މަނާ ނޫންކަން އަންގައިދޭ ފޮޓޯތައް ޕޯސްޓުކުރަން. އަޅުގަނޑުގެ އުއްމީދަކީ މީޑިއާގެ ލޯތައް އަމާޒު ނުވެ، ހަމަޖެހުމާއެކު ދިރިއުޅުމުގެ ފުރުސަތު ލިބުން،" ވަކީލުން ނެރުނު ބަޔާނެއްގައި ލަތީފާ ވިދާޅުވި ކަމަށް ބުނެފައި ވެ އެވެ.
އުމުރުން 35 އަހަރުގެ ލަތީފާ ވަނީ 2018 ވަނަ ގައުމުން ފިއްލަވަން މަސައްކަތް ކުރައްވާފަ އެވެ. އެކަމަނާ އަނބުރާ ޔޫއޭއީއަށް ގެންދިޔެއީ އިންޑިއާ ކަނޑުގައި އޮތް މަނަވަރެއްގެ ތެރެއިން ހައްޔަރު ކުރުމަށް ފަހު އެވެ.
ލަތީފާގެ ބައްޕާފުޅަކީ ޔޫއޭއީގެ ނައިބު ރައީސް އަދި ދުބާއީގެ ވެރިޔާ އެވެ. އެމަނިކުފާނަކީ ދުނިޔޭގެ އެންމެ މުއްސަނދި ވެރިންގެ ތެރޭގައި ހިމެނޭ ވެރިއެކެވެ.
ދުބާއީއަކީ އިގްތިސާދީ ގޮތުން ކާމިޔާބު ސިޓީއެއް ނަމަވެސް އެތަނުގައި އިންސާނީ ހައްގުތައް، ވަކިން ހާއްސަކޮށް އަންހެނުންގެ ހައްގުތައް، ހިފެހެއްޓިފައިވާ ކަމަށް ބައިނަލްއަގްވާމީ ޖަމިއްޔާތަކުން ބުނެ އެވެ.
އެކުވެރިންގެ އެހީތެރިކަމާއެކު ލަތީފާ 2018 ވަނަ އަހަރު ދުބާއީއިން ފިއްލަވަން މަސައްކަތް ކުރެއްވީ ވެސް އެހެންވެ އެވެ. އެކަމަނާ ބޭނުންވެ ވަޑައިގެންނެވީ މިނިވަންކަމާއެކު އުޅެވޭނެ ގޮތެއް ހޯދުމަށެވެ.
