ވޮޝިންޓަން، އެމެރިކާ (ޖޫން 24) - މި މަހުގެ ކުރީކޮޅު އިރާނުން ޖައްވަށް ސެޓެލައިޓެއް ފޮނުވަން ކުރި މަސައްކަތް ފެއިލްވެފައިވާ ކަމަށާއި އަނެއްކާވެސް އާ ސެޓެލައިޓެއް ލޯންޗު ކުރަން ތައްޔާރުވަމުންދާ ކަމަށް އެމެރިކާގެ ޑިފެންސް ޑިޕާޓްމަންޓުން ބުނެފި އެވެ.
"ޖޫން 12 ވަނަ ދުވަހު އިރާނުގެ ރޮކެޓެއް ލޯންޗު ކުރުން ފެއިލްވެފައިވާކަން އެމެރިކާގެ ސްޕޭސް ކޮމާންޑަށް އެނގޭ،" ޕެންޓަގަންގެ ތަރުޖަމާން ޔޫރިއާ އޯލޭންޑް ވިދާޅުވި އެވެ.
ސެޓެލައިޓް ލޯންޗު ކުރުން ފެއިލްވި ސަބަބާ މެދު ޕެންޓަގަންއިން އެއްޗެއް ބުނެފައި ނުވާއިރު، ފެއިލްވި ކަމަށް ބުނެ ސީއެންއެންއިން ހަބަރު ފެތުރުމުން އިރާނުން ވަނީ އެކަން ދޮގުކޮށްފަ އެވެ. އިރާނުން ބުނީ ސެޓެލައިޓް ލޯންޗު ކުރަން މަސައްކަތްކޮށްފައި ނުވާ ކަމަށެވެ.
"ޓެލެކޮމިއުނިކޭޝަންސް މިނިސްޓްރީގެ ދެ ސެޓެލައިޓް (ނާހިދު އަދި ޕަރްސް) މި ވަގުތު ވަނީ ސްޕޭސް އޯގަނައިޒޭޝަންގައި،" އިރާނުގެ ޓެލެކޮމް މިނިސްޓަރު މުހައްމަދު ޖަވާދު އަޒްހަރީ ޖަހްރޯމީ ވިދާޅުވި އެވެ.
"އެކަމަކު މިއަދު ހެނދުނު ހަބަރުން އަޅުގަނޑު ފެނުނު ގޮތުގައި އެ ސެޓެލައިޓްތައް މީގެ 10 ދުވަސް ކުރިން ވަނީ ލޯންޗުކޮށްފައި".
ތަޖުރިބާކާރުންނާ ހަވާލަދީ ސީއެންއެންއިން ބުނީ ސެމްނަންގައި ހުންނަ އިމާމް ހާމަނާއީ ސްޕޭސްޕޯޓްގެ ސެޓެލައިޓް ފޮޓޯތަކަށް ބަލާއިރު ވަރަށް އަވަހަށް އާ ސެޓެލައިޓެއް ލޯންޗު ކުރަން ދަނީ ތައްޔާރުވަމުންނެވެ.
ޕެންޓަގަންއިން ބުނީ އިރާނުން މީގެ ކުރިން އޭޕްރިލް 2020 ގައި މައިކްރޯ ސެޓެލައިޓެއް ޖައްވަށް ފޮނުވި ކަމަށެވެ. ނޫރް-1 ގެ ނަން ދީފައިވާ ސެޓެލައިޓް ކާމިޔާބުކަމާއެކު ދުނިޔޭގެ އޯބިޓަށް ފޮނުވި އެވެ.
ނަމަވެސް އެ ސެޓެލައިޓްގައި މައްސަލަތަކެއް އުޅޭ ކަމަށާއި އިރާނަށް އޭތި ކޮންޓްރޯލް ނުކުރެވޭތީ ބޭނުން ކުރަމުން ނުދާ ކަމަށް ޕެންޓަގަންއިން ބުނެފައި ވެ އެވެ.
