ތެހްރާން، އިރާން (ޖޫން 23) - އެމެރިކާގެ ޑޮމެއިންތަކުގައި ހޯސްޓުކޮށްފައިވާ އިރާން ސަރުކާރުން ކޮންޓްރޯލުން ކުރާ 33 މީޑިއާ ވެބްސައިޓް އެމެރިކާގެ ޖަސްޓިސް ޑިޕާޓްމަންޓުން ހިފެހެއްޓުމުން ނިއުކްލިއާ މަޝްވަރާއަށް އަސަރު ކުރާނެ ކަމަށް އިރާނުން ބުނެފި އެވެ.
ޕްރެސް ޓީވީ އާއި އަލް އާލަމް ފަދަ ވެބްސައިޓުތަކަށް ވަންނަ މީހުންނަށް މިހާރު ފެންނަމުން ދަނީ އެމެރިކާ ޖަސްޓިސް ޑިޕާޓްމަންޓުގެ ބަޔާނެކެވެ. އޭގައި ބުނެފައި ވަނީ އެމެރިކާ ސަރުކާރުން ވެބްސައިޓް ހިފަހައްޓާފައިވާ ކަމަށެވެ. ބަޔާނުގައި އެމެރިކާގެ ކޮމާސް ޑިޕާޓްމަންޓާއި އެފްބީއައިގެ ސިއްކަ ޖަހާފައި ވެ އެވެ.
އެމެރިކާގެ ހިފެހެއްޓި 33 ވެބްސައިޓަކީ ވެސް އިރާނިން އިސްލާމިކް ރޭޑިއޯ އެންޑް ޓެލެވިޝަން ޔޫނިއަންގެ (އައިއާރްޓީވީޔޫ) ދަށުން ކުރިއަށްދާ ތަންތަނެވެ. އައިއާރްޓީވީޔޫއަކީ އިސްލާމިކް ރިވޮލުއިޝަނަރީ ގާޑް ކޯޕްސް ގުދްސް ފޯސް (އައިއާރްޖީސީ) އިން ކޮންޓްރޯލް ކުރާ އިދާރާއެކެވެ.
އައިއާރްޓީވީޔޫ އާއި އައިއާރްޖީސީ ވެސް ހިމެނެނީ އެމެރިކާއިން ދަތިކުރުމުގެ ފިޔަވަޅު އަޅާފައިވާ ލިސްޓުގަ އެވެ. އެހެންކަމުން އެމެރިކާ ރައްޔިތުންނާއި، ކުންފުނިތަކަށް އެ ދެ ފަރާތާއެކު ވިޔަފާރު ކުރުން މަނާ ވާނެ އެވެ.
އިސްލާމިކް ރިޕަބްލިކް އޮފް އިރާން ބްރޯޑްކާސްޓިން އިން އެމެރިކާއަށް ތުހުމަތުކޮށްފައިވަނީ އިޒްރޭލާއި ސައުދީ އަރަބިއްޔާއާ ގުޅިގެން ހިޔާލު ފާޅުކުރުމުގެ މިނިވަންކަމަށް ހުރަސް އަޅަމުންދާ ކަމަށެވެ.
އިރާނުގެ ރައީސް އޮފީހުން ވަނީ ނިއުކްލިއާ މަޝްވަރާ ކުރިއަށްދާ މި ދަނޑިވަޅުގައި އެފަދަ ފިޔަވަޅެއް އެޅުމުގެ މަގްސަދާ މެދު ސުވާލު އުފައްދާފަ އެވެ.
"ނިއުކްލިއާ އެއްބަސްވުމާ ގުޅޭ މަޝްވަރާތަކަށް މީގެ ސަބަބުން ނޭދެވޭ އަސަރު ކުރާނެ،" ރައީސް އޮފީހުގެ ޑިރެކްޓަރު މަހްމޫދު ވައެޒީ ވިދާޅުވި އެވެ.
ދެހާސް ފަނަރަ ވަނަ އަހަރު އެކުލަވާލި ނިއުކްލިއާ އެއްބަސްވުމުގެ ދަށުން އިރާނުން ބައެއް ނިއުކްލިއާ ހަރަކާތްތައް މަޑުޖައްސާލުމުން ދަތި ކުރުމުގެ ފިޔަވަޅުތައް އުވާލާނެ އެވެ.
ނަމަވެސް 2017 ވަނަ އަހަރު އެމެރިކާއިން އެ އެއްބަސްވުމަށް އަމަލު ކުރުން ހުއްޓާލި އެވެ. އެހެންވެ، އަނެއްކާ އެއްބަސްވުމާ ގުޅޭ މަޝްވަރާތައް ދަނީ ފަށައިގެން ކުރިއަށެވެ.
