ވޮޝިންޓަން، އެމެރިކާ (ޖޫން 23) - އެމެރިކާގެ ޑޮމެއިންތަކުގައި ހޯސްޓުކޮށްފައިވާ އިރާން ސަރުކާރުން ކޮންޓްރޯލުން ކުރާ 33 މީޑިއާ ވެބްސައިޓް އެމެރިކާގެ ޖަސްޓިސް ޑިޕާޓްމަންޓުން ހިފަހައްޓައިފި އެވެ.
ޕްރެސް ޓީވީ އާއި އަލް އާލަމް ފަދަ ވެބްސައިޓުތަކަށް ވަންނަ މީހުންނަށް މިހާރު ފެންނަމުން ދަނީ އެމެރިކާ ޖަސްޓިސް ޑިޕާޓްމަންޓުގެ ބަޔާނެކެވެ.
އޭގައި ބުނެފައި ވަނީ އެމެރިކާ ސަރުކާރުން ވެބްސައިޓް ހިފަހައްޓާފައިވާ ކަމަށެވެ. ބަޔާނުގައި އެމެރިކާގެ ކޮމާސް ޑިޕާޓްމަންޓާއި އެފްބީއައިގެ ސިއްކަ ޖަހާފައި ވެ އެވެ.
އެމެރިކާގެ ހިފެހެއްޓި 33 ވެބްސައިޓަކީ ވެސް އިރާނިން އިސްލާމިކް ރޭޑިއޯ އެންޑް ޓެލެވިޝަން ޔޫނިއަންގެ (އައިއާރްޓީވީޔޫ) ދަށުން ކުރިއަށްދާ ތަންތަނެވެ. އައިއާރްޓީވީޔޫއަކީ އިސްލާމިކް ރިވޮލުއިޝަނަރީ ގާޑް ކޯޕްސް ގުދްސް ފޯސް (އައިއާރްޖީސީ) އިން ކޮންޓްރޯލް ކުރާ އިދާރާއެކެވެ.
އައިއާރްޓީވީޔޫ އާއި އައިއާރްޖީސީ ވެސް ހިމެނެނީ އެމެރިކާއިން ދަތިކުރުމުގެ ފިޔަވަޅު އަޅާފައިވާ ލިސްޓުގަ އެވެ. އެހެންކަމުން އެމެރިކާ ރައްޔިތުންނާއި، ކުންފުނިތަކަށް އެ ދެ ފަރާތާއެކު ވިޔަފާރު ކުރުން މަނާ ވާނެ އެވެ.
އިރާނުގެ ވެބްސައިޓުތަކުގެ އިތުރުން އިރާގުގެ ކާތެބް ހިޒްބުﷲ ގްރޫޕުގެ ތިން ވެބްސައިޓް ވެސް ހިފަހައްޓާފައި ވެއެވެ. އެ ގްރޫޕަކީ ޓެރަރިސްޓު ޖަމާއަތެއް ކަމަށް އެމެރިކާއިން ކަނޑައަޅާފައިވާ އިރާނާ ގާތް ގުޅުމެއް އޮންނަ ބަޔެކެވެ.
އިސްލާމިކް ރިޕަބްލިކް އޮފް އިރާން ބްރޯޑްކާސްޓިން އިން އެމެރިކާއަށް ތުހުމަތުކޮށްފައިވަނީ އިޒްރޭލާއި ސައުދީ އަރަބިއްޔާއާ ގުޅިގެން ހިޔާލު ފާޅުކުރުމުގެ މިނިވަންކަމަށް ހުރަސް އަޅަމުންދާ ކަމަށެވެ.
