ލަންޑަން (ޖޫން 23) - ޔޫރޯ ފުޓްބޯޅަ މުބާރާތުގައި މިރޭ 1-0 އިން ޗެކް ރިޕަބްލިކް ބަލިކޮށް އިންގްލެންޑް ގްރޫޕް އެއް ވަނައިގެ ގޮތުގައި ދެ ވަަނަ ބުރަށް ދަތުރުކޮށްފި އެވެ.
މިރޭގެ މެޗަށް ނުކުތްއިރު ވެސް ފުރަތަމަ ތިން ގްރޫޕްގެ ނަތީޖާ ނުކުތްގޮތަކުން އިންްގްލެންޑާއި ޗެކް ރިޕަބްލިކަށް ވަނީ އަނެއް ބުރުގެ ޖާގަ ޔަގީންވެފަ އެވެ. މި ގްރޫޕުން ގަދަ ދެ ޓީމުގެ ތެރޭގައި އެ ދެ ޓީމުގެ ތެރެއިން ޓީމެއް ނުހިމެނުނު ނަމަވެސް އެ ދެ ޓީމަށް އަނެއް ބުރުން ފުރުސަތު ޔަގީންވީ އެންމެ ރަނގަޅު ނަތީޖާ ނެރޭ ތިން ވަަނަ އަށް ދާ ޓީމުތަކުގެ ތެރެއިން ޖާގަ ލިބޭނެތީ އެވެ.
އެކަމަކު މިރޭގެ މެޗު ދެ ޓީމަށް ވެސް މުހިއްމުވާ އެންމެ ބޮޑު ސަބަބަކީ ގްރޫޕްގެ އެއް ވަނަ ހޯދުމަށެވެ. އިންގްލެންޑް ވަނީ އެކަން ހާސިލްކޮށްފަ އެވެ. މިއީ ޔޫރޯއެއްގައި އިންގްލެންޑުން ގްރޫޕް އެއް ވަނަ ހޯދި ތިން ވަނަ ފަހަރެވެ. މީގެ ކުރިން އެކަން ހާސިލްކުރީ 1996 އާއި 2012 ވަނަ އަހަރު އެވެ.
އިންގްލެންޑް ގްރޫޕްގެ އެއް ވަނަ ހޯދީ ތިން މެޗުން ހަތް ޕޮއިންޓާ އެކު އެވެ. ދެ ވަނަ އަަށް ދިޔަ ކްރޮއޭޝިއާ އާއި ތިން ވަނަ އަށް ދިޔަ ޗެކް ރިޕަބްލިކަށް ވަނީ ހަތަރު ޕޮއިންޓް ލިބިފަ އެވެ. ކްރޮއޭޝިއާ ވަނީ މިރޭ 3-1 އިން ސްކޮޓްލެންޑް ބަލިކޮށްފަ އެވެ. ކްރޮއޭޝިއާ އަށް ދެ ވަނަ ލިބުނީ ލަނޑުގެ ތަފާތުންނެވެ. އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން ޗެކް ރިޕަބްލިކަށް ވެސް ވަނީ އަނެއް ބުރުން ފުރުސަތު ލިބިފަ އެވެ. މި ގްރޫޕުން ކެޓި ހަމައެކަނި ޓީމަކީ ސްކޮޓްލެންޑް އެވެ. މިއީ 23 އަހަރު ތެރޭ އެ ޓީމު ކުޅުނު ފުރަތަަމަ ބޮޑު މުބާރާތެވެ.
ވެމްބްލީ ސްޓޭޑިއަމްގައި މިރޭ ކުޅުނު މެޗަށް އިންގްލެންޑުން ނެރުނު ފުރަތަމަ އެގާރައިން ވަނީ އަނިޔާއިން ރަނގަޅުވެ ޓީމަށް އެނބުރި އައި ހެރީ މެގުއާ އާއި ޖެކް ގްރީލިޝްގެ އިތުރުން ބުކާޔޯ ސަކާ އަށް ފުރުސަތު ދީފަ އެވެ. ޖޭޑަން ސަންޗޯ އަށް ފުރަތަމަ އެގާރައިން ފުރުސަތު ނެތްއިރު، ފިލް ފޯޑެން 23 ކުޅުންތެރިންގެ ސްކޮޑުގައި ވެސް ނުހިމެނެ އެވެ. އަދި ސްކޮޓްލެންޑުން ކޮވިޑަށް ޕޮޒިޓިވްވި ބިލީ ގިލްމޯއާ ކޮންޓެކްޓްވެގެން އައިސޮލޭޝަނަށް ދާން ޖެހުނު އިންގްލެންޑްގެ މޭސަން މައުންޓާއި ބެން ޗިލްވެލް ވެސް ސްކޮޑުުގައި ނެތެވެ.
މެޗުގެ 12 ވަނަ މިނިޓްގައި އިންގްލެންޑަށް މި މެޗުގައި ޖަހައިދިން ހަމައެކަނި ގޯލު ކާމިޔާބުކުރީ ރަހީމް ސްޓާލިން އެވެ. މި ފަހަރުގެ މުބާރާތުގައި އިންގްލެންޑުން ޖެހި ފުރަތަމަ ގޯލު ކްރޮއޭޝިއާ ކޮޅަށް ޖެހީ ވެސް ސްޓާލިން އެވެ. ސްޓާލިން މި މެޗުގައި ގޯލު ޖެހީ ގްރީލިޝް ނަގައިިދިން ހުރަހަކުން ބޮލުންނެވެ.
ޗެކް ރިޕަބްލިކުން ނަތީޖާ ހަމަހަމަ ކުރަން މަސައްކަތްތަކެއް ފުރަތަމަ ހާފުގައި ކުރިއިރު، އެ ޓީމުގެ ތޯމަސް ހޮލެޝް ވަނީ ނުރައްކާތެރި ހަމަލާއެއް ފޮނުވާލައިފަ އެވެ. އޭރިއާބޭރުން އޭނާ ޖެހި ޝޮޓް އިންގްލެންޑް ކީޕަރު ޖޯޑަން ޕިކްފޯޑް ވަނީ މަތަކޮށްފަ އެވެ.
އިންގްލެންޑުން ދެ ވަނަ ހާފަށް ނުކުތީ ޑެކްލަން ރައިސްގެ ބަދަލުގައި ޖޯޑަން ހެންޑަސަން އަރުވައިގެންނެވެ. މިއީ ހެންޑަސަން މި މުބާރާތުގައި ކުޅުނު ފުރަތަމަ މެޗެވެ. ދެ ވަނަ ލަނޑެއް ޖެހޭތޯ މި ހާފުގައި އިންގްލެންޑުން މަސައްކަތް ކުރަމުންދިޔައިރު، މެޗުގެ 68 ވަނަ މިނިޓްގައި މެގުއާ އަށް ފައުލުކުރި ކަަމަށް ބުނެ ޕެނަލްޓީއެއް ހޯދަން އެޕީލްކުރި އެވެ. އެކަމަކު ރެފްރީ ނިންމީ ޕެނަލްޓީ އެއް ދޭން ނުޖެހޭ ކަމަށެވެ.
އޭގެ ފަހުން ހެރީ ކޭން އަށް ލަނޑު ޖަހަން ލިބުނު ހުސް ފުރުސަތުގެ ބޭނުމެއް ނުހިފުނެވެ. މި ފަހަރުގެ މުބާރާތުގައި ކޭންގެ މޮޅު ކުޅުމެއް ނުދެއްކެ އެވެ.
މިއީ ޔޫރޯ ފުޓްބޯޅަ މުބާރާތެއްގެ ގްރޫޕް ސްޓޭޖު ތިން މެޗުގައި އިންގްލެންޑް ކޮޅަށް ލަނޑެއް ނުވަދެ ނިމުނު ފުރަތަމަ ފަހަރެވެ. ބޮޑު މުބާރާތެއްގެ ގްރޫޕް ސްޓޭޖުގައި މީގެ ކުރިން ދެ ފަަހަރެއްގެ މަަތިން އިންގްލެންޑް ވަނީ ބައިކޮޅަށް ލަނޑެއް ނުވަދެ ގްރޫޕް ސްޓޭޖު ނިންމާލައިފަ އެވެ. އެއީ 1966 ވަނަ އަހަރާއި 1982 ވަނަ އަހަރުގެ ވޯލްޑް ކަޕްގަ އެވެ.
އިންގްލެންޑުން ދެ ވަނަ ބުރުގައި ކުޅޭނީ ގްރޫޕް އެފްގެ ރަނަރަޕް ޓީމާ އެވެ. އެ ގްރޫޕްގައި އޮތީ ފްރާންސާއި ޖަރުމަނު، ޕޯޗުގަލް އަދި ހަންގޭރީ އެވެ. އެ މެޗު ވެސް ކުޅޭނީ ވެމްބްލީ ސްޓޭޑިއަމްގަ އެވެ.
