ޕެރިސް، ފްރާންސް (ޖޫން 22) - ލިވާ ޑިޒީޒް ހުންނަ މީހުން ކޮވިޑުގައި މަރުވުމުގެ ފުރުސަތު 80 ޕަސެންޓު އިތުރު ކަމަށް ދިރާސާއަކުން ދައްކައިފި އެވެ.
ފްރާންސްގައި ކުރިއަށްދާ އިންޓަނޭޝަނަލް ލިވާ ކޮންގްރެސް ހުށަހަޅަން ތައްޔާރުކޮށްފައިވާ ދިރާސާއެއްގައި ވަނީ މިދިޔަ އަހަރު ކޮވިޑް ޖެހިގެން އެޑްމިޓް ކުރި 259،000 މީހެއްގެ މައުލޫމާތު އެއްކޮށްފަ އެވެ.
އޭގެ ތެރެއިން 16،300 މީހުންނަކީ ކޮވިޑުގެ ކުރިން ވެސް ލިވާ ޑިޒީޒް ހުރި މީހުންނެވެ.
ކޮވިޑު ޖެހިގެން އެޑްމިޓު ކުރި މީހުންގެ ތެރެއިން އެވްރެޖް ގޮތެއްގައި މަރުވެފައިވަނީ 15 ޕަސެންޓު މީހުންނެވެ. ނަމަވެސް ލިވާ ޑިޒީޒް ހުރި މީހުންގެ މެދުގައި މަރުގެ ރޭޓަކީ 30 ޕަސެންޓެވެ.
ކުރިން ހެދި ބައެއް ދިރާސާތަކުން ބުނީ ކޮވިޑުގައި ހާލު ގޯސްވުމުގެ އެއް ސަބަބަކީ ލިވާ ފެއިލްވުން ކަމަށެވެ. ނަމަވެސް މި ދިރާސާގައި ބުނީ އެކަން ބިނާވަނީ ވެންޓިލޭޓަރުގައި ފަރުވާ ދިނުމާއި ނުދިނުމުގެ މައްޗަށް ކަމަށެވެ.
ޔޫރަޕިއަން އެސޯސިއޭޝަން ފޯ ދަ ސްޓަޑީ އޮފް ދަ ލިވާގެ ތޯމަސް ބާގް އޭއެފްޕީއަށް ވިދާޅުވީ މި ދިރާސާއިން ފެނިގެން ދަނީ ލިވާ ބަލިތައް ހުންނަ މީހުންނަށް ފަރުވާ ދިނުމުގައި ގެންގުޅޭ ޓްރެންޑު ކަމަށެވެ.
އެމެރިކާގައި 2013 ވަނަ ހެދި ދިރާސާއަކުން ދެއްކި ގޮތުގައި ލިވާ ޑިޒީޒް ހުންނަ މީހުންނާ މެދު ތަފާތު ކުރުން ގެންގުޅޭ ކަމަށް ގިނަ ބަޔަކު ގަބޫލުކުރެ އެވެ.
އެގޮތުން ލިވާ ޑިޒީޒްއަކީ މަސްތުވާތަކެއްޗާއި ރާ ބުއިމުގެ ސަބަބުން ދިމާވާ މައްސަލައެއް ކަމަށް ހީވެފައި އޮންނަ ކަމަށް އެ ދިރާސާގައި ވެ އެވެ.
