ނިއު ދިއްލީ، އިންޑިއާ (ޖޫން 21) - ކޮވިޑް ފަތުރާ ވައިރަހާ ދެކޮޅަށް ޔޯގާއިން ރައްކާތެރިކަން ލިބޭނެ ކަމަށް އިންޑިއާގެ ބޮޑު ވަޒީރު ނަރެންދްރަ މޯދީ ވިދާޅުވުމާއެކު، އެ ގައުމުގެ 18 އަހަރުން މަތީގެ އެންމެންނަށް ހިލޭ ވެކްސިން ޖެހުމުގެ މަސައްކަތް ފަށައިފި އެވެ.
މިއަދު ބައިނަލްއަގްވާމީ ޔޯގާ ދުވަސް ފާހަގަކުރާއިރު، 18 އަހަރުން މަތީގެ އެންމެންނަށް ހިލޭ ވެކްސިން ދޭން ފެށިފައިވަނީ ބޭނުންވާ ވަރަށް ޑޯޒް ނުލިބި ކުރިން އިއުލާނު ކުރި ތާރީހަށް ވުރެ އެތައް ދުވަހެއް ފަހުންނެވެ. ކުރިން ނިންމާފައި އޮތީ މޭ އެއް ވަނަ ދުވަހު ވެކްސިން ދޭން ފެށުމަށެވެ.
މީގެ ކުރިން އިންޑިއާގައި ހިލޭ ވެކްސިން ދެމުން އައީ އުމުރުން 45 އަހަރުން މަތީގެ މީހުންނަށް އެކަންޏެވެ.
ކޮވިޑުގެ ދެ ވަނަ ރާޅުގައި އިންޑިއާގެ ހާލަތު ވަރަށް ބޮޑަށް ގޯސްވެ، ސިއްހީ ނިޒާމު ހުއްޓުމަކަށް އަޔެވެ. އަނެއްކާވެސް ކޭސްތައް މަދުވާން ފެށުމާއެކު ވަނީ ބޮޑެތި ލުއިތައް ދޭން ފަށާފަ އެވެ. އެއާއެކު ގިނަ މީހުން ތޮއްޖެހިގެން އުޅެން ފެށުމުން ޑޮކްޓަރުން އަންނަނީ އިންޒާރުތައް ދެމުންނެވެ.
އިންޑިއާގެ އަމާޒަކީ މި އަހަރު ނިމުމުގެ ކުރިން އާބާދީގެ 1.1 ބިލިއަން މީހުންގެ ތެރެއިން ބޮޑު ބަޔަކަށް ވެކްސިން ދީ ނިންމުމެވެ. ނަމަވެސް މިހާތަނަށް ޖެހިފައި ވަނީ އެންމެ 275 މިލިއަން ޑޯޒެވެ. އަދި ވެކްސިން ފުރިހަމަކޮށްފައި ވަނީ އާބާދީގެ އެންމެ ހަތަރި ޕަސެންޓެވެ.
ހިލޭ ވެކްސިން ދޭން ފެށިއިރު، ބައިނަލްއަގްވާމީ ޔޯގާ ދުވަހާ ދިމާކޮށް ގައުމާ މުހާތަބު ކުރައްވަމުން މިއަދު ހެނދުނު މޯދީ ވަނީ ޔޯގާގެ ސަބަބުން ވައިރަހާ ދެކޮޅަށް ރައްކާތެރިކަން ލިބޭ ކަމަށް ވިދާޅުވެފަ އެވެ.
"ފްރަންޓްލައިން މަސައްކަތްތެރިންނާ އަޅުގަނޑު ވާހަކަދައްކާލުމުން، އެ މީހުން ކިޔައިދެނީ ކޮރޯނާވައިރަހާ ދެކޮޅަށް ރައްކާތެރިކަމުގެ އައްޑަނައެއްގެ ގޮތުގައި ޔޯގާ ބޭނުން ކުރާ ކަމުގެ ވާހަކަތައް. ޑޮކްޓަރުން ވަނީ ޔޯގާގެ އެހީގައި އެމީހުންގެ އަމިއްލަ ނަފްސުތަކާއި ބަލި މީހުން ވެސް ވަރުގަދަކޮށްފައި،" މޯދީ ވިދާޅުވި އެވެ.
މި ދުވަހާ ދިމާކޮށް ވެރިރަށް ނިއު ދިއްލީގެ ޕާކުތައް ވެސް މިއަދު ވަނީ ހުޅުވާފަ އެވެ. ނަމަވެސް ބަލިމަޑުކަމުގެ ސަބަބުން މި އަހަރު ކުރިއަށް ގެންދާ އިވެންޓުތަކުގެ އަދަދު މަދެވެ.
މޯދީގެ ހުށަހެޅުއްވުމަކަށް އދ. އިން 2014 ވަނަ އަހަރުން ފެށިގެން ފާހަގަކުރަމުންދާ ޔޯގާ ދުވަހަކީ އިންޑިއާގައި ބޮޑުކޮށް ފާހަގަކުރާ ދުވަހެކެވެ.
ބަލިމަޑުކަމުގެ ތެރޭގައި އިންޑިއާ ސަރުކާރުން ތަކުރާރުކޮށް ވަނީ ޔޯގާ އާއި ފަތްޕިލާވެލީގެ ފަރުވާ އަކީ ވައިރަހާ ދެކޮޅަށް ރައްކާތެރިކަން ލިބޭ އެއްޗެއްގެ ގޮތުގައި ސިފަކޮށްފަ އެވެ. އެހެންވެ، ޔޯގާ އާއި އެފަދަ ބޭހުގެ ޑިމާންޑާއެކު އަގުތައް ވަނީ އުފުލިފަ އެވެ.
ނަމަވެސް އެ ވާހަކަތައް ސާބިތު ކުރެވޭ ސައިންޓިފިކް ހެއްކެއް ނެތެވެ. އެހެންވެ، އިންޑިއާގެ ޑޮކްޓަރުން ވެސް އެކަމަށް ފާޑުކިޔަ އެވެ. މިދިޔަ މަހު އިންދިއާގެ ޑޮކްޓަރުން ވަނީ ކަޅު ކުލައިގެ ބޭންޑެއް އަތުގައި އަޅައިގެން އެކަމާ ދެކޮޅަށް އިހްތިޖާޖުކޮށްފަ އެވެ. ޑޮކްޓަރުން ހިތްހަމަނުޖެހުނީ ކޮވިޑުގެ ފަރުވާއަކީ ޔޯގާ ކަމަށް ބުނާ ބާބާ ރާމްދޭވް ގުރޫއާ މޯދީގެ ސަރުކާރުން ގުޅުން ބާއްވާތީ އެވެ.
