ޕެރިސް، ފްރާންސް (ޖޫން 19) - ޑިސެމްބަރު 2019 ގައި ދުނިޔެއިން މުޅިން އަލަށް ފެނުނު ކޮރޯނާވައިރަހުގެ ސަބަބުން ފެތުރުނު ކޮވިޑް ބަލިމަޑުކަމުގައި މިހާތަނަށް މަރުވި މީހުންގެ ޖުމްލަ އަދަދު 3.8 މިލިއަނަށް އަރާފައިވާ ކަމަށް އޭއެފްޕީގެ ތަފާސްހިސާބުން ދައްކައިފި އެވެ.
އޭއެފްޕީން އެއްކޮށްފައިވާ ތަފާސްހިސާބަށް ބަލާއިރު، މިހާތަނަށް މަރުވެފައި ވަނީ ޖުމްލަ 3،854،387 މީހުންނެވެ. އޭގެ ތެރެއިން 601،574 މީހުންނާއެކު އެންމެ ގިނަ މީހުން މަރުވީ އެމެރިކާއިންނެވެ. ދެ ވަނައަށް އެންމެ ގިނަ މީހުން މަރުވީ ބްރެޒިލްއިން 500،000 އަށް ވުރެ ގިނަ މީހުން މަރުވެފައި ވެ އެވެ.
އިންޑިއާއިން 385،137 މީހުންނާއި، މެކްސިކޯއިން 230،959 މީހުން، ޕެރޫއިން 189،933 މީހުން އަދި ރަޝިއާއިން 128،911 މީހުން ވެސް އެންމެ ގިނައިން މަރުތައް ރިކޯޑު ކުރެވުނު ގައުމުތަކުގެ ތެރޭގައި ހިމެނެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައި ވަނީ ކޮވިޑުގައި މަރުވި މީހުންގެ އަސްލު އަދަދުތައް ރަސްމީ ތަފާސްހިސާބަށް ވުރެ ތިން ގުނަ އިތުރުވާނެ ކަމަށެވެ. އެއީ ޕޮޒިޓިވްކަން ނޭނގި އަދި ފަރުވާ ނުލިބި ގިނަ ބަޔަކު މަރުވެފައިވާނެ ކަމަށް ބެލެވޭތީ އެވެ.
މި ވަގުތު ދުނިޔޭގެ ގައުމުތަކަށް އެންމެ ބޮޑަށް އަސަރު ކުރަމުން ދަނީ އިންޑިއާއިން ފެނުނު ޑެލްޓާ ވޭރިއެންޓުގެ ސަބަބުންނެވެ. އެގޮތުން އިނގިރޭސި ވިލާތުގައި ތިން ވަނަ ރާޅެއް ފަށައިގެން އުޅޭ ކަމަށް ބެލެވޭއިރު، ރަޝިއާގައި ވެސް ރިކޯޑު އަދަދަށް ކޭސްތައް ވަނީ އިތުރުވެފަ އެވެ.
