ބުޑަޕެސްޓް، ހަންގޭރީ (ޖޫން 19) - ޔޫރޯ ފުޓްބޯޅަ މުބާރާތުގައި މިއަދު ފްރާންސުން ހަންގޭރީއާ ދެކޮޅަށް މެޗު ކުޅެނީ އެ ޓީމުގެ އެތައް ހާސް ސަޕޯޓަރުންގެ ކުރިމަތީގައި ކަމަށްވާއިރު، އެއީ ސަމާލުވާން ޖެހޭނެ ކަމެއް ކަމަށް ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފި އެވެ.
ހަންގޭރީން މި ފަހަރުގެ ޔޫރޯގައި ކުޅުނު ފުރަތަމަ މެޗުގައި އެންމެ ފަހުގެ ޗެމްޕިއަން ޕޯޗުގަލާ ދެކޮޅަށް ކުޅުނުތަން ބަލަން ޕުސްކަސް އެރީނާ އަށް 55،000 ސަޕޯޓަރުން ވަނެވެ. އެއީ 67،000 މީހުންގެ ޖާގައިގެ ސްޓޭޑިއަމެކެވެ. އެތަނުން ގިނައީ ހަންގޭރީގެ ސަޕޯޓަރުންނެވެ. އެ ދުވަހު ހަންގޭރީ ސަޕޯޓަރުންގެ ޕްރެޝަރާ ހެދި މެޗުގައި ރެފްރީގެ ބައެއް ނިންމުންތަކަށް ވެސް އުނދަގޫވިއިރު، ޕޯޗުގަލް އަށް ލަނޑެއް ޖެހޭވަރުވީ ފަހު ހަތް މިނިޓް ތެރޭގަ އެވެ.
ފްރާންސާއި ހަންގޭރީ މިއަދު ކުޅޭ މެޗަށް 65،000 ސަޕޯޓަރުން ވަންނާނެ ކަމަށް ރިޕޯޓްތައް ބުނެ އެވެ. މި މެޗަށް ނުކުންނައިރު ފްރާންސްގެ ކޯޗު ޑެޝޯމްޕްސް ވަނީ ސަޕޯޓަރުންގެ އެ ކަންތައްތަކާ މެދު ވިސްނާނެ ކަމަށް ބުނެފަ އެވެ.
"ހޯމް ޓީމަށް ސަޕޯޓަކީ ވަރަށް މުހިއްމު ކަމެއް. އެކަން ހަންގޭރީ އަށް ވަރަށް ބޮޑަށް ފެނިގެންދިޔަ. އަހަރެެމެން ހަނދާން ނައްތާލައިގެން ނުވާނެ 80 ވަނަ މިނިޓާ ހަމައަށް ޕޯޗުގަލާއި ހަންގޭރީ އޮތީ 0-0 ގައި. އަދި ހަނދާނުގައި ބަހައްޓަން ޖެހޭ ފުރަތަމަ ގޯލެއް ޖެހީ ހަންގޭރީން. އެކަމަކު އެއީ އޮފްސައިޑް ގޯލެއް،" މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޑެޝޯމްޕްސް ބުންޏެވެ.
"ހަންގޭރީ އަކީ ވަރަށް މަސައްކަތްކުރާ ޓީމެއް. ވަރަށް ރަނގަޅަށް ބައްޓަންކޮށްފައި އޮތް ޓީމެއް. އަމުދުން އިޓަލީގެ ކޯޗެއް ހުރީމަ އެ މީހުންގެ ރޭވުން ވެސް ރަނގަޅުވާނެ. ހަންގޭރީގެ ދަނޑުގައި މި މެޗު ކުޅޭތީ އަހަރެން ނަގާނީ މިއީ ނުރައްކާ މެޗެއްގެ ގޮތުގައި،"
ބައިނަލްއަގުވާމީ މުބާރާތެއްގައި މިހާތަނަށް ހަންގޭރީއާ ދެކޮޅަށް ކުޅުނު ދެ މެޗުން ފްރާންސް ވަނީ މޮޅުވެފަ އެވެ. އެއީ 1978 އާއި 1986 ގެ ވޯލްޑް ކަޕްގެ ގްރޫޕް ސްޓޭޖުގަ އެވެ. އެކަމަކު ހަންގޭރީއާ ދެކޮޅަށް އެންމެ ފަހުން ކުޅުނު 17 މެޗުގެ ތެރެއިން ފްރާންސް މޮޅުވީ ތިން މެޗުންނެވެ. އޭގެ ތެރެއިން 12 މެޗުން ބަލިވިއިރު، ތިން މެޗު ނިމުނީ އެއްވަރުވެގެންނެވެ.
ފްރާންސް ފުރަތަމަ މެޗުން ޖަރުމަނު އަތުން މޮޅުވެފައިވާއިރު، މިއަދު ހަންގޭރީ ބަލިކޮށްގެން މުބާރާތުގެ އަނެއް ބުރުގެ ޖާގައެއް ކަށަވަރުކުރެވޭނެ އެވެ.
ހަންގޭރީ ކޯޗު ރޮސީ އެދެނީ ގައުމީ ރޫހުގައި ކުޅެން
ޕޯޗުގަލް އަތުން ބަލިވުމާ އެކު ހަންގޭރީން ދަމަހައްޓަމުން އައި ބަލިނުވުމުގެ ރެކޯޑަށް 11 މެޗަށް ފަހު ވަނީ ނިމުން އައިސްފަ އެވެ. ހަންގޭރީ އެންމެ ފަހުން ބައިނަލްއަގުވާމީ މުބާރާތެއްގެ ފުރަތަމަ ދެ މެޗުން ބަލިވީ 1978 ވަނަ އަހަރުގެ ވޯލްޑް ކަޕްގަ އެވެ.
އިޓަލީ އާއި ހަންގޭރީގެ ޓީމުތަކަށް ކޯޗުކޮށްދިން މާކޯ ރޮސީ ބުނީ ދުނިޔޭގެ ޗެމްޕިއަން ފްރާންސާ ދެކޮޅަށް ހަންގޭރީ އަމިއްލަ ދަނޑުގައި ސަޕޯޓަރުންގެ ކުރިމަތީގައި މުބާރާތެއްގައި ކުޅެލަން ލިބިފައި މި އޮތް މެޗުގެ ބޭނުން އެންމެ ފުރިހަމަ އަށް ހިފަން ބޭނުންވާ ކަމަށެވެ.
"އަހަރެން އެދެން ގައުމީ ރޫހު ވަރަށް ބޮޑަށް މި މެޗުގައި ދައްކަން. ދުނިޔޭގެ ޗެމްޕިއަނުންނާ ކުޅެން މި ގޮތަށް ލިބޭނީ މަދު ފަަހަރަކު،" ރޮސީ ބުންޏެވެ.
ރޮސީ ބުނީ ކުޅުންތެރިން އަޅާކިޔާއިރު ފްރާންސް ވެސް އޮތީ ވަރަށް ކުރީގައި ކަމަށާއި އެކަމަކު ދަނޑުމަތީގައި ކުރަން ހުރި މަސައްކަތް ބަލާއިރު ދެ ޓީމުގައި ވެސް ކުޅުންތެރިން ތިބޭނީ ހަމަހަމަކޮށް ކަމަށެވެ.
"މިސާލަކަށް އެ މީހުންގެ ސްކޮޑު 900 މިލިއަން ޔޫރޯގައި ހުރެފައި އަހަރެމެން 60 މިލިއަން ޔޫރޯގައި ހުއްޓަސް. މިއީ އެއް މެޗު. މީގެ ކުޅުންތެރިން ކުރާ މަސައްކަތަށް ހުރިހާ ކަމެއް ބަރޯސާވާނީ. އަމިއްލަ ގައުމަށް ބޮޑު މޮޅެއް ހޯދިދާނެ މެޗެއް މިއީ،" ރޮސީ ބުންޏެވެ.
ޔޫރޯގައި ހަންގޭރީ އެންމެ ފަހުން ކުޅުނު ހަތަރު މެޗުން މޮޅެއް ނުލިބެ އެވެ. ދެ މެޗުން ބަލިވިއިރު، ދެ މެޗުން ވަނީ އެއްވަރުވެފަ އެވެ. މިރޭ ފްރާންސާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 18:00 ގަ އެވެ.
