ވޮޝިންޓަން، އެމެރިކާ (ޖޫން 17) - އާތުރައިޓިސް ނުވަތަ ރާއްޖެ ބައްޔަށް ބޭނުން ކުރާ ބޭހެއް ކޮވިޑް ބަލީގައި ހާލު ގޯސްވެ، އެޑްމިޓް ކުރަން ޖެހުނު މީހުންގެ މެދުގައި ބޭނުން ކުރުމުން ހާލު ރަނގަޅުވާ ކަމަށް ނިއު އިންގްލެންޑް ޖާނަލް އޮފް މެޑިސިންގައި ޝާއިއުކުރި ދިރާސާއަކުން ދައްކައިފި އެވެ.
ޓޮފަސިޓިނިބް ބޭހަކީ އޯރަލް ނުވަތަ ކާން ޖެހޭ ބޭހެކެވެ. ޒެލްޖާންގް ފަދަ ގިނަ ބްރޭންޑް ނަންތަކެއްގައި މި ބޭސް ވިއްކާއިރު، ބްރެޒިލްގެ 15 ސަރަހައްދެއްގައި ކޮވިޑުގައި ހާލު ސީރިއަސްވި 289 މީހަކަށް މި ބޭސް ދީގެން ޓެސްޓުތައް ހަދާފައި ވެ އެވެ.
ދިރާސާގައި ބައިވެރިވި މީހުންގެ ދެބައިކޮށްފައި އެއްބައި މީހުންނަށް އެ ބޭހުގެ 10 މިލިގްރާމް ދުވާލަކު ދެ ފަހަރު ދިނެވެ. ބާކީ ތިބި މީހުންނަށް އެ ބޭސް ދީފައެއް ނުވެ އެވެ.
ބޭސް ބޭނުން ކުރި މީހުންގެ ތެރެއިން 28 ދުވަސް ފަހުން ހާލު ގޯސްވީ 18.1 ޕަސެންޓު މީހުންނެވެ. އަދި ބޭސް ބޭނުން ނުކުރާ މީހުންގެ ތެރެއިން 29 ޕަސެންޓު ހާލު އިތުރަށް ގޯސްވި އެވެ. އެހެންކަމުން މި ބޭސް ބޭނުން ކުރުމުން ބަލީގައި މަރުވުމުގެ ނުރައްކާ 63 ޕަސެންޓު ކުޑަކޮށްދެ އެވެ.
އެ މީހުންގެ ތެރެއިން މަރުގެ ރޭޓް ހުރި ގޮތަށް ބަލާއިރު، ބޭސް ބޭނުން ކުރި ގްރޫޕުން މަރުވީ 2.8 ޕަސެންޓެވެ. އަދި ބޭސް ބޭނުން ނުކުރާ މީހުންގެ ތެރެއިން 5.5 ޕަސެންޓު މަރުވި އެވެ.
ނަމަވެސް ބޭސް ބޭނުން ނުކުރާ ގްރޫޕުގެ 12 ޕަސެންޓާ އަޅާ ބަލާއިރު، ބޭނުން ކުރި ގްރޫޕުގައި 14.1 ޕަސެންޓަށް ސީރިއަސް ސައިޑް އިފެކްޓު ދިމާވި އެވެ.
