ޖިއުކުއާން، ޗައިނާ (ޖޫން 17) - ޗައިނާއިން މުޅިން އަލަށް ގާއިމްކުރާ ޖައްވީ ސްޓޭޝަނުގައި މަސައްކަތް ކުރަން ކަނޑައަޅާފައިވާ އެސްޓްރޮނޯޓުން ގޮވައިގެން މިއަދު ހެނދުނު ކާމިޔާބުކަމާއެކު ޖައްވަށް ދަތުރުފަށައިފި އެވެ.
ޓިއަންގޮންގް ސްޓޭޝަނުން ލޯންގް މާޗް-2އެފް ރޮކެޓެއްގައި ތިން އެސްޓްރޮނޯޓުން ޖައްވަށް ދަތުރު ފެށިއިރު، އެ މީހުން ތިން މަސް ޖައްވުގައި ހޭދަ ކުރާނެ އެވެ. މިއީ ޗައިނާގެ އެސްޓްރޮނޯޓުން ޖައްވުގައި އެންމެ ގިނަ ދުވަސް ހޭދަކުރާ މިޝަން އެވެ.
ހުޅަނގު އުތުރު ޗައިނާގެ ގޯބީ ސަހަރާގައި ހުންނަ ޖިއުކުއާން ލޯންޗް ސެންޓަރުން ރޮކެޓު ނައްޓާލިއިރު، އެ މަންޒަރުތައް ވަގުތުން ޓީވީން ދައްކަމުން ދިޔަ އެވެ. ގާތްގަނޑަކަށް 10 މިނެޓުގެ ދަތުރަކަށް ފަހު އެ އުޅަނދު ވަނީ މިހާރު ޖައްވަށް ފޯރާފަ އެވެ.
ޗައިނާގެ ދައުލަތުގެ ޓީވީ، ސީސީޓީވީން ވަނީ އުޅަނދުގެ ތެރޭގައި ތިން އެސްޓްރޮނޯޓުން އުޅެމުން ދިޔަ ގޮތުގެ ލައިވް ފީޑް ދުނިޔޭގައި ތިބި ބެލުންތެރިންނާ ހަމައަށް ގެނެސްދީފަ އެވެ. އުޅަނދުގެ ބޭރުގައި ހަރުކޮށްފައިވާ ކެމެރާއިން ދިޔެއީ ދުނިޔެ ފެންނަން އޮތް ގޮތުގެ މަންޒަރުތައް ވެސް ދައްކަމުންނެވެ.
ބެއިޖިންގެ އެއިރޮސްޕޭސް ކޮންޓްރޯލް ސެންޓަރުން ބުނީ ރޮކެޓުގައިވާ ޝެންޒައު-12 ޖައްވީ އުޅަނދު ކާމިޔާބުކަމާއެކު ޖައްވަށް ގޮސް، އެއަށް ހަކަތަ އުފައްދަން ބޭނުން ކުރާ ސޯލާ ޕެނެލްތައް ހުޅުވާލައިގެން ބޭނުން ކުރަން ފަށާފައިވާ ކަމަށެވެ.
ޗައިނާގެ ތިން އެސްޓްރޮނޯޓުން ސަޕޯޓަރުންނާ ބައްދަލުކުރަނީ.-- ފޮޓޯ: އޭއެފްޕީ/ ގްރެގް ބޭކާ
ދަތުރު ފެށުމުގެ ކުރިން އެސްޓްރޮނޯޓުން ވަނީ ސްޕޭސް ސޫޓުގައި ތިބެ ސަޕޯޓަރުންނާއި މިޝަންގެ މަސައްކަތުގައި އުޅޭ އެހެން ސްޓާފުންނާ ބައްދަލުކޮށް ހަދާފަ އެވެ. އެ މީހުން ވަނީ ކޮމިއުނިސްޓް ޗައިނާގެ ކުރިއެރުމާ ގުޅޭ ގައުމީ ލަވަތައް ކިޔައި ހަދާފަ އެވެ.
މިޝަންގެ ކޮމާންޑަރަކީ ނީ ހައިޝެންގް އެވެ. އޭނާއަކީ ޕީޕަލްސް ލިބަރޭޝަން އާމީގެ އެއާފޯސް ޕައިލެޓެކެވެ. މީގެ ކުރިން ދެ ޖައްވީ މިޝަނެއްގައި އޭނާ ބައިވެރިވެފައި ވެ އެވެ. އަނެއް ދެ އެސްޓްރޮނޯޓުންނަކީ ވެސް ޗައިނާގެ ދެ ސިފައިންނެވެ.
މިދިޔަ އޭޕްރިލް މަހު ޗައިނާއިން ވަނީ އެ ގައުމުގެ ޖައްވީ ސްޓޭޝަނަށް ބޭނުންވާ އެއް ބައި ޖައްވަށް ފޮނުވާފަ އެވެ. ޝެންޒައު އުޅަނދުން އެ ސްޓޭޝަން ފުރިހަމަ ކުރަން ހަރު ކުރަން ޖެހޭ ބައިތަކުގެ މަސައްކަތް ކުރާނެ އެވެ.
މިއީ ގާތްގަނޑަކަށް ފަސް އަހަރު ފަހުން އެސްޓްރޮނޯޓުން ގޮވައިގެން ޗައިނާއިން ޖައްވަށް ކުރި ފުރަތަމަ ދަތުރެވެ. ޗައިނާ މޭންޑް ސްޕޭސް ޕްރޮގްރާމުން ބުނީ އެސްޓްރޮނޯޓުން އުޅަނދުން ބޭރުގައި ޖައްވުގައި ދެ ފަހަރެއްގެ މަތިން ޖުމްލަ 14 ވަރަކަށް ގަޑިއިރު އުޅެން ޖެހޭނެ ކަމަށެވެ.
ޗައިނާގެ ސްޕޭސް އޭޖެންސީން ރާވާފައިވަނީ އަންނަ އަހަރު ނިމުމުގެ ކުރިން 11 ފަހަރެއްގެ މަތިން ޖައްވީ ދަތުރުތައް ކުރުމަށެވެ. އޭގެ ތެރޭގައި އެސްޓްރޮނޯޓުން ގޮވައިގެން ކުރާ އިތުރު ތިން ދަތުރު ވެސް ހިމެނެ އެވެ. އެ ހުރިހާ ދަތުރެއްގެ އަމާޒަކީ ވެސް ޖައްވީ ސްޓޭޝަން ފުރިހަމަ ކުރުމެވެ.
އެމެރިކާ އާއި ރަޝިއާ، ކެނެޑާ، ޔޫރަޕް އަދި ޖަޕާނުން ޖައްވުގައި ބޭނުން ކުރާ ބައިނަލްއަގްވާމީ ޖައްވީ ސްޓޭޝަން ބޭނުން ކުރުމުގެ ހުއްދަ ޗައިނާއަކަށް ނޯވެ އެވެ. އެހެންވެ ޗައިނާއިން މަސައްކަތް ކުރަނީ އަމިއްލަ ޖައްވީ ސްޓޭޝަން ފުރިހަމަ ކުރުމަށެވެ.
ޗައިނާގެ ޓިއަންގޮންގްއަކީ އައިއެސްއެސް އަށް ވުރެ ކުޑަ ސްޓޭޝަނެއް ނަމަވެސް، 10 އަހަރު ވަންދެން އެ ސްޓޭޝަން ބޭނުން ކުރެވޭނެ އެވެ. އެ ސްޓޭޝަން އެހެން ގައުމުތަކަށް ބޭނުން ކުރުމުގެ ފުރުސަތު ދޭނެ ކަމަށް ޗައިނާއިން ބުނެފައި ވެ އެވެ. ނަމަވެސް އެކަމުގެ ތަފްސީލް އަދި ހާމައެއް ނުކުރެ އެވެ.
ޖައްވީ ސްޓޭޝަން ގާއިމް ކުރުމުގެ އިތުރުން ހަނދާއި މާސްއަށް އިންސާނުން ފޮނުވުމުގެ މަސައްކަތް ޗައިނާއިން ދަނީ ކުރަމުންނެވެ. އޭގެ އިތުރުން ދުނިޔޭގެ އެންމެ ބޮޑު ރޭޑިއޯ ޓެލެސްކޯޕް ހެދުމުގެ މަސައްކަތް ވެސް އެ ގައުމުގައި ދަނީ ކުރަމުންނެވެ.
ޗައިނާއިން ވަނީ ރަޝިއާއާ ގުޅިގެން ހަނދު ކައިރީގައި "ލޫނާ" ޖައްވީ ސްޓޭޝަނެއް ގާއިމް ކުރަން ވެސް ނިންމާފަ އެވެ.
