ޓޯކިޔޯ، ޖަޕާން (ޖޫން 17) - އަންނަ މަހުން ފެށިގެން ގައުމުން ބޭރަށް ދަތުރު ކުރާ ރައްޔިތުންނަށް ވެކްސިން ޕާސްޕޯޓެއް ދޫކުރަން ފަށާނެ ކަމަށް ޖަޕާނުން ބުނެފި އެވެ.
ކޮވިޑުގެ ބަލިމަޑުކަމާ ހެދި ފަތުރުވެރިކަމާއި ދަތުރުފަތުރަށް އަސަރުކޮށްފައި ވާއިރު، ގައުމުތަކުން ދަނީ އަލުން އެ ސިނާއަތްތަށް ކުރިއަށް ގެންދެވޭނެ ގޮތްތައް ބަލަމުންނެވެ.
"އަޅުގަނޑުމެން ތައްޔާރުވަމުން މި ދަނީ ވެކްސިން ޖެހި ކަމުގެ ލިޔުން ބޭނުންވާ މީހުން އެހެން ގައުމުތަކަށް ދަތުރު ކުރާއިރު، އެފަދަ ލިޔުމެއް ދޫކުރަން ތައްޔާރުވަމުން،" ސަރުކާރުގެ ތަރުޖަމާނު ކަޓްސުނޯބޫ ކާޓޯ ވިދާޅުވި އެވެ.
އޭނާ ވިދާޅުވީ ޑިޖިޓަލް ސެޓްފިކެޓެއްގެ ބަދަލުގައި ދޫކުރާނީ ކަރުދާސް ސެޓްފިކެޓެއް ކަމަށާއި އަންނަ މަހުން ފެށިގެން ލޯކަލް ކައުންސިލްތަކުން އެ ލިޔުން ލިބޭނެ ކަމަށެވެ.
ޔޫރަޕިއަން ޔޫނިއަން (އީޔޫ) އިން ވެސް ދަނީ މި ހޫނު މޫސުމުގެ ތެރޭގައި ޑިޖިޓަލް ވެކްސިން ޕާސްޕޯޓެއް ބޭނުން ކުރަން ފެށުމަށް ތައްޔާރުވަމުންނެވެ.
އީޔޫއިން ދޫކުރާ ސެޓްފިކެޓުގައި ވެކްސިން ޖަހާފައިވޭތޯ އާއި ކޮވިޑު ޖެހިގެން ބަލިވިތޯ އާއި ނެގެޓިވް ނަތީޖާއެއް ލިބިފައިވޭތޯ އަދި ބަލިން ރަނގަޅުވެފައިވޭތޯ ފަދަ މައުލޫމާތު ހިމެނޭނެ އެވެ.
މިދިޔަ މަހު އެމެރިކާއިން ވެސް ބުނީ ގައުމުން ބޭރަށް ދަތުރު ކުރާ ވެކްސިން ޖަހާފައިވާ ރައްޔިތުންނަށް ހާއްސަ ލިޔުމެއް ދޭން ވިސްނަމުންދާ ކަމަށެވެ.
ނަމަވެސް ފްލޯރިޑާ އާއި ޓެކްސަސް ފަދަ ސްޓޭޓުތަކުން އެ ވިސްނުމާ ދެކޮޅެވެ. އެ ސްޓޭޓުތަކުން ދެކޭ ގޮތުގައި އެފަދަ ލިޔުމެއް ދޫކުރުމުގެ ސަބަބުން ރައްޔިތުންގެ އަސާސީ ހައްގަށް އުނިކަން ލިބޭނެ އެވެ.
ޖަޕާނުގެ ކުންފުނިތަކުން ތިބީ ވެކްސިން ޖަހާފައިވާކަން އަންގައިދޭ ލިޔުމެއް ދޫކުރާނެ އިރަކަށް މަޑުކޮށްގެންނެވެ. އެއީ އޭގެ ސަބަބުން މުހިއްމު ވިޔަފާރި ދަތުރުތައް އަލުން ފެށޭނެތީ އެވެ.
ޖަޕާނުގެ ވެކްސިން ޕްރޮގްރާމް ފެށީ މަޑު ދުވެއްޔެއްގައި ނަމަވެސް މިހާރު ވަނީ ދުވެލި ބާރު ކުރަން މަސައްކަތް ފަށާފަ އެވެ. މިހާތަނަށް ވެކްސިންގެ ޑޯޒްތައް ފުރިހަމަކޮށްފައި ވަނީ އެ ގައުމުގެ އާބާދީގެ ހަ ޕަސެންޓެވެ.
ޖަޕާނުގެ ބޯޑަރުތައް މި ވަގުތު ހުރީ ބޭރު ގައުމުތަކުގެ މީހުންނަށް ބަންދުކޮށްފަ އެވެ. ނަމަވެސް ޖުލައި 23 ގައި ޓޯކިޔޯގައި ފަށާ އޮލިމްޕިކް ގޭމްސްއަށް ލުއިތަކެއް ދިނުމަށް ހަމަޖެހިފައި ވެ އެވެ.
