އާގްރާ، އިންޑިއާ (ޖޫން 16) - ކޮވިޑުގެ ދެ ވަނަ ރާޅުގައި ހާލަތު ގޯސްވި އިންޑިއާގައި ކޭސްތައް މަދުވަމުން ދާތީ ލުއި ދޭން ފަށާފައި ވާއިރު، މިއަދުން ފެށިގެން ތާޖް މަހަލް އާއްމުންނަށް ހުޅުވާލަން ނިންމައިފި އެވެ.
މިދިޔަ އޭޕްރިލް އަދި މޭ މަހު އިންޑިއާގެ ކޮވިޑް ކޭސްތަކާއި އަދަދުތައް ރިކޯޑް މިންވަރަށް މައްޗަށް އެރި އެވެ. އެހެންވެ ބައެއް ސްޓޭޓުތައް ވަނީ ލޮކްޑައުންކޮށްފަ އެވެ.
ނަމަވެސް ފާއިތުވި ހަފްތާތަކުގައި އަދަދު ތިރިވާން ފަށާފައި ވާތީ ބޮޑެތި ސިޓީތަކުން އަންނަނީ ލުއިދެމުންނެވެ. އެގޮތުން ނިއު ދިއްލީ އާއި މުމްބާއީގައި މިހާރު ވެސް ވަނީ ގިނަ ލުއިތައް ދީފަ އެވެ.
ފަތުރުވެރިންގެ މެދުގައި މަޝްހޫރު ތާޖް މަހަލް ހުންނަ އާގްރާގައި އެތަން އަލުން އާއްމުންނަށް ހުޅުވާލުމާއެކު ހުއްޓިފައިވާ ގިނަ ވިޔަފާރިތަކަށް އަލުން ފުރުސަތުތައް ފަހިވާނެ އެވެ.
ކޮވިޑުގެ ބަލިމަޑުކަން ފެށުމާއެކު މިދިޔަ އަހަރުގެ މާޗް މަހު ވެސް އެތަން ބަންދު ކުރި އެވެ. ނަމަވެސް ސެޕްޓެމްބަރު އަލުން ހުޅުވާލުމަށް ފަހު ދެ ވަނަ ފަހަރަށް ބަންދު ކުރީ މިދިޔަ އޭޕްރިލް މަހު އެވެ.
މިއަދު ތާޖް މަހަލްއަށް ޒިޔާރަތްކޮށްފައި ވަނީ މަދު ބަޔެކެވެ. ކަމާ ބެހޭ އިދާރާތަކުން ވަނީ ދުވާލެއްގެ މައްޗަށް އެ ތަނަށް ޒިޔާރަތް ކުރެވޭނީ އެންމެ ގިނަވެގެން 650 މީހުން ކަމަށް ކަނޑައަޅާފަ އެވެ.
ދުނިޔޭގެ އާ ހަތް އަޖާއިބުގެ ތެރޭގައި ލިސްޓުކޮށްފައިވާ ތާޖް މަހަލްއަކީ 1632 ގައި ރަސްގެފާން ޝާހް ޖަހާންގެ އަނބިކަނބަލުން މުމްތާޒް މަހަލްގެ ހަށިކޮޅު ބޭއްވުމަށް ހެދި ގަނޑުވަރެކެވެ.
އެތަން އާއްމުންނަށް ހުޅުވާލާފައި ވާއިރު، އިއްޔެ އިންޑިއާގައި ރިޕޯޓު ކުރީ 62،224 ކޮވިޑް ކޭސް އެވެ. މިއީ އޭޕްރިލް އަދި މޭ މަހު ދުވާލަކު ޕޮޒިޓިވްވަމުންދިޔަ 400،000 މީހުންނާ އަޅާ ބަލާއިރު ވަރަށް ދަށް އަދަދެކެވެ.
އިންޑިއާގެ ޖުމްލަ ކޭސްތަކުގެ އަދަދު މިހާރު އުޅެނީ 30 މިލިއަން ގަ އެވެ. އަދި މި ބަލީގައި މަރުވި މީހުންގެ އަދަދަކީ 380،000 އެވެ. ނަމަވެސް ތަޖުރިބާކާރުން ދެކޭ ގޮތުގައި މަރުވި މީހުންގެ އަސްލު އަދަދު މިލިއަނަކަށް އަރާފައިވުމަކީ އެކަށީގެންވާ ކަމެކެވެ.
ސޯޝަލް މީޑިއާގައި މި ހަފްތާ ބަންދުގައި ދައުރުވި ފޮޓޯތަކުން ފެންނަނީ ވެރިރަށް ނިއުދިއްލީގެ މޯލްތަކާއި މާކެޓުތަކުގައި ގައިދުރުކަމެއް ނެތި ގިނަ ބަޔަކު އުޅެމުން ދިޔަ މަންޒަރެވެ. އެހެންވެ އަލުން ކޭސްތައް އިތުރުވެދާނެ ކަމުގެ ބިރު އެބަ އޮތެވެ.
ކެރަލާ ސްޓޭޓުގައި ޕަބްލިކް ދަތުރުފަތުރަށް މިހާރު ހުއްދަ ދީފައި ވާއިރު، މަދްޔަ ޕްރަދޭޝްގައި ވަނީ މޯލްތަކާއި ޖިމްތައް ހުޅުވާފަ އެވެ.
