ރަށްރަށުން ތަރައްގީގެ ޕްލޭންތައް ހަދާއިރު ހަމައެކަނި ރަށުގެ ފަސްގަނޑަށް އެކަނި ނުވިސްނެވުމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ކައުންސިލްތަކުން ތަރައްގީގެ ޕްލޭން ހެދުމަށާއި މާލީ ދާއިރާއަށް ހޭލުންތެރި ކުރުވަން މިއަދު ފެށި ތަމްރީން ޕްރޮގްރާމް ޝަރަފުވެރިކޮށް ދެއްވައި މިނިސްޓަރު އަސްލަމް ވިދާޅުވީ ކައިރީގައިވާ ރަށްތަކަކީ އަވައްޓެރިން ކަމަށް ދެކިގެން ޕްލޭންތައް ހެދުމަށް އެދިވަޑައިގަންނަވާ ކަމަށެވެ.
ސަރުކާރުގެ ޕްލޭން ހަދާފައި އޮތީ ރާއްޖެ މައިގަނޑު ތިން ރީޖަންއަކަށް ބަހާލުމަށް ފަހު އެ ތިން ރީޖަންގައި ހަ ޒޯން ހެދުމަށް ކަމަށް ވެސް މިނިސްޓަރު ވިދާޅުވި އެވެ. އެ ހަ ޒޯންގައި 20 އައިލެންޑް ކްލަސްޓާ ހެދުމަށް ވެސް ނިންމާފައިވާ ކަމަށް ވިދާޅުވި އެވެ.
"ކޮންމެ އައިލެންޑް ކްލަސްޓާއަކީ ވަށައިގެން ކައިރީގައި ހުންނަ ރަށްތަކެއްގެ މައްޗަށް އެކުލެވިގެން އޮންނަ ރަށްތަކުގެ ގުރޫޕެއް،" މިނިސްޓަރު ތަފްސީލް ކޮށްދެއްވި އެވެ.
"ސަރުކާރުގެ ވިސްނުމަކީ މިދެންނެވި ގޮތަށް ރާއްޖެ ތަރުތީބު ކުރެވިގެން މީގެން ކޮންމެ ރީޖަންއެއްގައި ވެސް އެ ރީޖަނަކަށް ގެންނަން ޖެހޭ އުމުރާނީ ތަރައްގީ އާއި އިންސާނީ ވަސީލަތްތައް އަދި ހިދުމަތްތައް އެއްތަނަކަށް ގެނައުން."
އިގުތިސާދީ ގޮތުން ރާއްޖޭގައި ކުރިއަރާފައިވާ ރަށްތައް ކުރިއަރާފައި ހުރީ އެ ރަށްރަށުގައި ވިޔަފާރި ކުރުމަށް ފުރުސަތު އެހެން ރަށްތަކުގެ މީހުންނަށް ދީގެން ކަމަށް މިނިސްޓަރު ވިދާޅުވި އެވެ. އެ ފުރުސަރު ކުރިއަށް އޮތްތަނުގައި ރަށްތަކުން ދޭން ޖެހޭ ކަމަށް އަސްލަމް ވިދާޅުވި އެވެ.
"އަޅުގަނޑު މިސާލެއްގެ ގޮތުން ދަންނަވާފާނަން މާފުށީގައި ގެސްޓްހައުސް، ޓޫރިޒަމްގެ ވިޔަފާރި ކުރިއަރާފައި އެ އޮތީ ހަމައެކަނި މާފުށި ރައްޔިތުން ކުރި އިންވެސްޓްމަންޓް ތަކަކުންނެއް ނޫން. އޭގައި ރާއްޖޭގެ އެ ރަށަށް ނިސްބަތް ނުވާ ތަނަވަސް މީސް މީހުންގެ ހިއްސާ ވަރަށް ބޮޑު،" އަސްލަމް ވިދާޅުވި އެވެ.
ފެރީގެ ނިޒާމަކުން ރާއްޖޭގެ ހުރިހާ ރަށްތައް ގުޅާލުމުގެ މަޝްރޫ މިއަހަރު ފަހުކޮޅު އުތުރުން ފެށޭނެ ކަމަށާއި އެ ދަތުރުތައް ފެށުމުގެ ތައްޔާރީތައް އެމްޓީސީސީން ވަމުން އަންނަ ކަމަށް މިނިސްޓަރު ވިދާޅުވި އެވެ. ކުރިއަށް އޮތް އަހަރުތަކުގައި އެހެން އަތޮޅުތައް ވެސް ފެރީން ގުޅާލެވޭނެ ކަމަށާއި އޭރުން ކޮންމެ ރަށަކީ ހުރިހާ ހިދުމަތެއް ލިބެންޖެހޭ ރަށަކަށް ވާން ނުޖެހޭނެ ކަމަށް ވިދާޅުވި އެވެ.
"ދަތުރުފަތުރާ ނުލާ ލާމަރުކަޒު ކުރެވޭނެ ކަމަކަށް އަޅުގަނޑު ގަބޫލެއް ނުކުރަން. ކޮންމެ ރަށެއް ވަކިން އެ ރަށަކަށް ބޭނުންވާ ހުރިހާ ހިދުމަތެއް އެރަށުގެ ފަސްގަނޑުން ހޯދަން އުޅެގެން އެކަން ވާނެ ތަނެއް އަޅުގަނޑަކަށް ނުވެއް ފެނޭ،" އަސްލަމް ވިދާޅުވި އެވެ.
މިނިސްޓަރު ވިދާޅުވީ އެއްފަސް ކުރުމަކީ ވެސް ކޮންމެ ކޮންމެ ރަށެއްގައި ކުރެވޭނެ ކަމެއް ނޫން ކަމަށެވެ. އެ ރަށެއްގައި ތިބެން ބޭނުންވާ ބަޔަކު އެ ރަށެއްގައި ތިބެގެން ދަތުރުފަތުރުގެ ނިޒާމުގެ ތެރެއިން ހިދުމަތް ހޯދުމުގެ ފުރުސަތު ދޭން ޖެހޭ ކަމަށް އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި އަސާސީ ބޭނުންތައް ހޯދުމަށް ރާއްޖޭގެ އާބާދީގެ 40 ޕަސެންޓް އުޅެނީ މާލޭގައި ކަމަށާއި އޭގެ ތެރެއިން ބައެއް އާއިލާތަކުން ވަރަށް ހާލުގައި ދިރިއުޅެމުން ދެ އެވެ. އެކަން ބަދަލު ކުރުމަށް ދުރުރާސްތާ ޕްލޭނެއްގެ ތެރެއިން މަސައްކަތް ކުރަން ޖެހޭ ކަމަށް އަސްލަމް ވިދާޅުވި އެވެ.
މިނިސްޓަރު ވިދާޅުވީ އަތޮޅުތެރެއިން މާލެއަށް ބަދަލުވާ މީހުންގެ ރޭޓަށް ބަލާއިރު 2040 އަށް ދާއިރު މާލޭގެ އާބާދީ އަތޮޅުތަކުގެ ޖުމުލަ އާބާދީއަށް ވުރެން ބޮޑުވާނެ ކަމަށެވެ.
