އަމްސްޓެޑަމް (ޖޫން 14) - ޔޫރޯ ފުޓްބޯޅަ މުބާރާތުގައި މިރޭ ޔޫކްރެެއިން 3-2 އިން ބަލިކޮށް ނެދަލެންޑްސް އިން ޔޫރޯ އަށް އެނބުރި އައި މެޗުން މޮޅުވެއްޖެ އެވެ.
ނެދަލެންޑްސް އެންމެ ފަހުން ފުޓްބޯޅައިގެ ބޮޑު މުބާރާތެއްގައި ވާދަކުރީ 2014 ވަނަ އަހަރުގެ ފީފާ ވޯލްޑް ކަޕްގަ އެވެ. އޭގެ ފަހުން 2016 ވަނަ އަހަރު ފްރާންސްގައި ބޭއްވި ޔޫރޯ އާއި 2018 ވަނަ އަހަރު ރަޝިއާގައި ކުރިއަށްދިޔަ ފީފާ ވޯލްޑް ކަޕަށް ނެދަލެންޑްސް ކޮލިފައިނުވެ އެވެ. އެހެން ނަމަވެސް ކުރީގެ ކޯޗު ރޮނާލްްޑް ކޫމަންގެ ކޯޗުކަމުގައި ބޮޑު ކުރިއެރުމެއް ހޯދައި 2019 ވަނަ އަހަރު ޔުއެފާ ނޭޝަންސް ލީގުގެ ފައިނަލުގައި ކުޅުނެެވެ. އެކަމަކު ޕޯޗުގަލް އަތުންވީ ބައްޔެވެ.
އަމިއްލަ ދަނޑު، ޔޯހަން ކްރައިފް ސްޓޭޑިއަމްގައި މިރޭ ނެދަލެންޑްސް އިން ފުރަތަމަ ހާފުގައި ލަނޑު ޖަހާނެ ގިނަ ފުރުސަތުތަކެއް ލިބުނު ނަމަވެސް ބޭނުމެއް ނުކުރެވުނެވެ. ގިނަ ބޯޅަތައް ހުއްޓުވީ ޔޫކްރެއިންގެ ގޯލްކީޕަރު ޖިއޯޖް ބުޝްޗާން އެވެ.
ނެދަލެންޑްސް އިން ދެ ވަނަ ހާފް ފުރަތަމަ 15 މިނިޓް ތެރޭ ދެ ގޯލު ޖެހި އެވެ. އެ ޓީމަށް ލީޑުނަގައިދިިނީ މެޗުގެ 52 ވަނަ މިނިޓްގައި ޓީމުގެ ކެޕްޓަން ޖިނީ ވައިނަލްޑަމް އެވެ. އަރިމަތިން ނެގި ހުރަހެއް ކީޕަރު ބުޝްޗާން އަތުގައި ޖެހިފައި ލިބުނު ބޯޅަ ވައިނަލްޑަމް ވަނީ ގޯލުގެ މަތީ ކަނަށް އަމާޒުކޮށްލައިފަ އެވެ. ވައިނަލްޑަމް އަކީ 2014 ވަނަ އަހަރުގެ ވޯލްޑް ކަޕްގައި ނެދަލެންޑްސް އިން ޖެހި ފަހު ގޯލު ކާމިޔާބުކުރި ކުޅުންތެރިޔާ އެެވެ.
ނެދަލެންޑްސްގެ ވެން އާން ހޯލްޓް (ވ) ފޮނުވާލާ ބޯޅައެއް ޔޫކްރެއިންގެ ކީޕަރު ބުޝްޗާން މަތަކުރަނީ
ފުރަތަމަ ލަނޑު ޖެހިތާ ހަތް މިނިޓް ފަހުން ވައުޓް ވެހޯސްޓް ވަނީ އިތުރު ގޯލެއް ޖަހައި ނެދަލެންޑްސް އަށް ދެ ގޯލުގެ ލީޑެއް ނަަގައިދީފަ އެވެ. ވެހޯސްޓް ފޮނުވާލި ބޯޅަ ގޯލަށް ވަނީ ކީޕަރު ބުޝްޗާން އަތުގައި ޖެހިފަ އެވެ.
ޔޫކްރެއިނުން މެޗުގެ ތެރެއަށް އަލުން އައީ ގާތްގާތުގައި ދެ ގޯލު ޖަހައިގެންނެވެ. އެ ޓީމުގެ ފުރަތަމަ ގޯލު ޖެހީ 75 ވަނަ މިނިޓްގައި ކެޕްޓަން އެންޑީ ޔާމޮލަންކޯ އެވެ. އޭރިއާބޭރުން ޔާމޮލެންކޯ ޖެހި ބޯޅަ އަމާޒުވީ ގޯލުގެ މަތީ ކަނަށެވެ. އޭގެ ތިން މިނިޓް ފަހުން ހިލޭ ޖެހުމަކުން ރުސްލާން މަލިނޯވްސްކީ ނަގައިދިން ބޯޅަ ބޮލުން ގޯލު ތެރެއަށް ފޮނުވާލައި ރޯމަން ޔަރެމްޗުކް ވަނީ ނަތީޖާ ހަމަހަމަކޮށްދީފަ އެވެ.
ނެދަލެންޑްސް މޮޅުކޮށްދިން ގޯލު ޖެހީ މެޗު ނިމެން ފަސް މިނިޓަށް ވެފައިވަނިކޮށް ޑެންޒެލް ޑަމްފްރީސް އެވެ. ނޭތަން އަކޭ ނަގައިދިން ހުރަހަކުން ޑަމްފްރީސް މި ގޯލު ޖެހީ ބޮލުންނެވެ. މި މެޗުގެ ފުރަތަމަ ހާފުގައި ލަނޑު ޖަހަން ޑަމްފްރީސް އަށް ލިބުނު ފުރުސަތުތަކުގެ ބޭނުމެއް ނުހިފުނެވެ. މިއީ ޑަމްފްރީސް ގައުމީ ޓީމަށް ޖަހައިދިން ފުރަތަމަ ގޯލެވެ.
މިއީ ބައިނަލްއަގުވާމީ ބޮޑު މުބާރާތެއްގައި ނެދަލެންޑްސް އާއި ޔޫކްރެއިންގެ ފުރަތަމަ ކުރިމަތިލުމެވެ. ޔޫކްރެއިނާ ދެކޮޅަށް މިރޭގެ ކުރިން ނެދަލެންޑްސް ކުޅުނު އެކުވެރިކަމުގެ ދެ މެޗުން ވެސް ބަލިވެފައިނުވެ އެވެ. މިއީ 2000 ވަނަ އަހަރުގެ ޔޫރޯ ސެމީ ފައިނަލުގައި އިޓަލީ އަތުން ބަލިވި ފަހުން ނެދަލެންޑްސް އިން ޔޯހަން ކްރައިފް އެރީނާގައި ކުޅުނު ޔޫރޯގެ ފުރަތަމަ މެޗެވެ.
