ކ. މާފުށީގެ ބިން ހިއްކުމާއި ތޮށިލުމުގެ މަޝްރޫއު ކުރިއަށް ގެންދާއިރު, އެ ރަށް ކައިރީގައި އޮންނަ ކޮކޯއާ އައިލެންޑް ރިސޯޓަށް ލިބޭ ގެއްލުންތައް ހުއްޓުވުމަށް ސިވިލް ކޯޓަށް ހުށަހެޅި ދައުވާ ބޭރުކޮށްލީ ގޯސްކޮށް ކަމަށް ހައިކޯޓުން ހުކުމްކޮށްފި އެވެ.
މި ސަރުކާރުގެ އެންމެ ފުރަތަމަ ބިން ހިއްކުމުގެ މަޝްރޫއު ކަމަށްވާ މާފުށީ ބިން ހިއްކައި ތޮށިލުމުގެ މަސައްކަތް ޕްލޭނިން މިނިސްޓްރީން ކުރަމުންދާއިރު، އެ ރަށް ކައިރީގައި އޮތް ކ. މަކުނުފުށީގައި ހިންގާ ކޮކޯއާ އައިލެންޑަށް އިޔާދަ ނުކުރެވޭނެ ގެއްލުންތައް ލިބޭނެ ކަމަށް އެ ރިސޯޓު ބުނެ އެވެ.
ރިސޯޓު ހިންގާ އޯކިޑް ރިސޯޓްސް މެނޭޖްމެންޓު ކުންފުނިން ސިވިލް ކޯޓުގައި ދައުވާކުރީ ގެއްލުންތައް ހުއްޓުވުމަށްޓަކައި، މަޝްރޫއު ހުއްޓާލުމަށް ނުވަތަ، މަކުނުފުއްޓަށް ކަނޑައަޅާފައިވާ ބައުންޑަރީއަށް އަސަރު ނުކުރާނެ ގޮތަށް މަޝްރޫއު ކުރިއަށް ގެންދިޔުމަށް ޓޫރިޒަމް އަދި ޕްލޭނިން މިނިސްޓްރީގެ މައްޗަށް އަމުރުކޮށްދިނުމަށެވެ.
މި ދައުވާއާ ގުޅިގެން ސިވިލް ކޯޓުގައި ދައުލަތުގެ ފަރާތުން ޖަވާބުދާރީއެއް ނުވެ އެވެ.
ނަމަވެސް، ސިވިލް ކޯޓުން ނިންމީ އެ މައްސަލައަކީ އެ ކޯޓަށް ބެލުމުގެ އިހުތިސޯސް އޮތް މައްސަލައެއް ނޫން ކަމަށެވެ. އެގޮތަށް ނިންމީ އޯކިޑް ރިސޯޓްސް މެނޭޖްމެންޓު ކުންފުނިން ހުށަހެޅި ދައުވާއަކީ މާފުށީ ބިމާ ގުޅޭ މައްސަލައެއް ކަމަށް ބުނެ އެވެ.
އެ ރަށެއްގެ ބިމާ ގުޅޭ މައްސަލަތައް ފުރަތަމަ މަރުހަލާގައި ބެލުމުގެ އިހްތިސޯސް ހިނގަނީ އެ ރަށެއްގެ މެޖިސްޓްރޭޓް ކޯޓަކަށެވެ.
ނަމަވެސް، މައްސަލައަކީ މާފުށީ ބިމާ ގުޅޭ މައްސަލައެއް ކަމަށް ސިވިލް ކޯޓުން ނިންމީ އޮޅުންތަކެއްގެ މައްޗަށް ގާނޫނީ އިމުން ބޭރު ކަމަށް ބުނެ އޯކިޑް ރިސޯޓްސް މެނޭޖްމެންޓު ކުންފުނިން ހައިކޯޓުގައި މައްސަލަ އިސްތިއުނާފުކުރި އެވެ.
ހައިކޯޓުގައި އެ ކުންފުނިން ބުނެފައިވަނީ ދައުވާއަކީ މާފުށީގެ ބިމާ ގުޅޭ މައްސަލައެއް ނޫން ކަމާއި އެއީ ތޮށިލުމުގެ މަޝްރޫއުއާ ގުޅިގެން މަކުނުފުށީގެ ބައުންޑްރީއަށް އަސަރު ކުރުން ހުއްޓުވުމަށް ހުށަހެޅި ދައުވާއެއް ކަމެވެ. އެހެންވެ، ސިވިލް ކޯޓުން އިހްތިސޯސް މާނަކޮށްފައި އޮތް ގޮތް ގޯސް ކަމަށެވެ.
ނަމަވެސް، ހައިކޯޓުގައި ދައުލަތުގެ ފަރާތުން ވަނީ ސިވިލް ކޯޓުން އިހްތިސޯސްއަށް ބަލައި މައްސަލަ ބޭރުކޮށްލި ނިންމުން ރަނގަޅު ކަމަށް ބުނެފަ އެވެ.
ދެ ފަރާތުގެ ވާހަކަތަކަށް ފަހު، ހައިކޯޓުން ތާއިދުކޮށްފައިވަނީ އޯކިޑް ރިސޯޓްސް މެނޭޖްމެންޓު ކުންފުނިން ދެއްކި ވާހަކަތަކަށެވެ. އެގޮތުން، މައްސަލާގައި ނެރުނު ހުކުމްގައި ބުނީ ދައުވާގައި ބަޔާންކުރާ ބިން ވަކި ތަނެއްގައި ހުރި ނަމަވެސް، ދައުވާގެ މައުޟޫއަކީ އެ ބިމާ ގުޅިގެން އުފެދިފައިވާ ހުސޫމަތަކާ ގުޅިގެން ބިންހުރި އިމާރާތުގެ މައްޗަށް ކުރެވޭ ދައުވާއެއް ނޫން ކަމެވެ.
ދައުވާއަށް ބަލާއިރު، ހަގީގީ މައުޟޫއު ބިނާވެފައިވަނީ މާފުށީގެ ބިން ހިއްކުމުގެ މަސައްކަތް ކުރިއަށް ގެންދާ ގޮތެއްގެ ސަބަބުން މަކުނުފުށީގެ ބައުންޑްރީއަށް ލިބޭނެ ކަމަށް ބުނާ ގެއްލުންތައް ހުއްޓުވުމުގެ މައްޗަށް ކަމަށެވެ. އެހެންކަމުން ބިމާ ގުޅުވައި، ސިވިލް ކޯޓުގެ އިހްތިސޯސް ނެތް މައްސަލައެއް ކަމަށް ކަނޑައެޅީ ގޯސްކޮށް ކަމަށް ކަނޑައެޅި އެވެ.
އަދި، ކުންފުނީގެ ދައުވާ ރައްދު ވަނީ ދައުލަތުގެ ދެ އިދާރާއަށް ކަމަށްވެފައި އެ ދެ އިދާރާ ވެސް ހުރީ މާލޭގައިކަން ހައިކޯޓުން ފާހަގަކުރި އެވެ. އެހެންކަމުން މާލޭގައި ނަމަ މި ބާވަތުގެ މައްސަލަ ބެލުމުގެ އިހްތިސޯސް އޮންނާނީ ސިވިލް ކޯޓަށް ހުކުމްގައިވެ އެވެ.
އެހެންވެ، ސިވިލް ކޯޓުގެ ހުކުމް ބާތިލްކޮށް، ހައި ކޯޓުން ބުނީ އޯކިޑް ރިސޯޓްސް މެނޭޖްމެންޓު ކުންފުނިން މައްސަލަ ސިވިލް ކޯޓަށް އަލުން ހުށަހަޅައިފިނަމަ މައްސަލާގައި މައުޟޫއުގެ މައްޗަށް ބަލައި ސިވިލް ކޯޓުން ކަނޑައަޅަން ޖެހޭނެ ކަމަށެވެ.
މި ހުކުމް އިއްވަވާފައިވަނީ މައްސަލަ ބެއްލެވި ތިން ފަނޑިޔާރުން ކަމަށްވާ ފަނޑިޔާރު ހާތިފް ހިލްމީ އާއި ފަނޑިޔާރު އަލީ ސަމީރު އަދި ފަނޑިޔާރު ހުސެއިން ޝަހީދުގެ އިއްތިފާގުންނެވެ.
