އަމްސްޓެޑަމް (ޖޫން 13) - ބޮޑު އެއް މުބާރާތުގެ މެދުކެނޑުމަކަށް ފަހު މި ފަހަރުގެ ޔޫރޯގައި ވާދަކުރާ ނެދަލެންޑްސް ޓީމަކީ މުބާރާތުގެ ފޭވަރިޓެއް ކަމަށާއި އެ ޓީމަށް މި މުބާރާތުގެ ޗެމްޕިއަންކަން ހޯދިދާނެ ކަމަށް ނެދަލެންޑްސްގެ ކޯޗު އަދި ކުރީގެ ކުޅުންތެރިޔާ ފްރޭންކް ޑި ބޮއާ ބުނެފި އެވެ.
މިދިޔަ އަހަރު އެންމެ ފުރަތަމަ ޔޫރޯ ޝެޑިއުލްކުރި ގޮތަށް މުބާރާތް ކުރިއަށް ގެންދިޔަނަމަ ނެދަލެންޑްސްގެ ކޯޗަކަށް ހުންނާނީ ބާސެލޯނާގައި މި ވަގުތު ހުރި ކޯޗު ރޮނާލްޑް ކޫމަން އެވެ. ކޮވިޑް-19ގެ ސަބަބުން މިިދިޔަ އަހަރު ޖޫން މަހު ކުޅެން އޮތް ޔޫރޯ މި އަހަރަށް ފަސްކުރިއިރު، ނެދަލެންޑްސް ދޫކޮށް ކޫމަން ބާސެލޯނާއާ ހަވާލުވީ މިދިޔަ އަހަރުގެ އޮގަސްޓް މަހުގަ އެވެ. ޑި ބޮއާ އެ ޓީމަށް ގެނައީ ސެޕްޓެމްބަރު މަހު އެވެ.
ނެދަލެންޑްސް އެންމެ ފަހުން ފުޓްބޯޅައިގެ ބޮޑު މުބާރާތެއްގައި ވާދަކުރީ 2014 ވަނަ އަހަރުގެ ފީފާ ވޯލްޑް ކަޕްގަ އެވެ. އޭގެ ފަހުން 2016 ވަނަ އަހަރު ފްރާންސްގައި ބޭއްވި ޔޫރޯ އާއި 2018 ވަނަ އަހަރު ރަޝިއާގައި ކުރިއަށްދިޔަ ފީފާ ވޯލްޑް ކަޕަށް ނެދަލެންޑްސް ކޮލިފައިނުވެ އެވެ. އެހެން ނަމަވެސް ކޫމަންގެ ކޯޗުކަމުގައި ބޮޑު ކުރިއެރުމެއް ހޯދައި 2019 ވަނަ އަހަރު ޔުއެފާ ނޭޝަންސް ލީގުގެ ފައިނަލުގައި ކުޅުނެެވެ. އެކަމަކު ޕޯޗުގަލް އަތުންވީ ބައްޔެވެ.
ޑި ބޮއާ ބުނީ ޔޫރަޕް ފުޓްބޯޅައިގެ ވަރުގަދަ ކޮންމެ ޓީމަކީ ވެސް މި ފަހަރުގެ ޔޫރޯ އަށް ނުކުތްއިރު ފޭވަރިޓެއް ކަމަށެވެ.
"އަހަރެމެން (ނެދަލެންޑްސް) އަކީ ވެސް ފޭވަރިޓެއް. އެކަމަކު ހަނދާން ނައްތާލައިގެން ނުވާނެ އަހަރެމެންގެ އިތުރުން ތަށްޓައް ވާދަކުރާނެ ޓީމުތައް އެބަހުރި. ފްރާންސް، ބެލްޖިއަމް، ސްޕެއިން އަދި ޖާމަނީ އަކީ އެ ޓީމުގައި ތިބި ކުޅުންތެރިންގެ ފޯމާއި އެހެން ކަންކަމަށް ބަލާއިރު އެންމެ ބޮޑު ފޭވަރިޓުން. އަހަރެމެން ވެސް މި އޮތީ އެ މީހުންނާ ގާތުގައި. ޕޯޗުގަލް އާއި އިޓަލީ އަދި އިންގްލެންޑަކީ ވެސް ސީރިއަސްކޮށް މި މުބާރާތަށް ވާދަކުރާނެ ޓީމުތައް،" ޑި ބޮއާ ބުންޏެވެ.
ނެދަލެންޑްސް މި ފަހަރުގެ މުބާރާތުގައި އޮތީ ޔޫކްރެއިނާއި އޮސްޓްރިއާ އަދި ނޯތު މެސެޑޯނިއާއާ އެއް ގްރޫޕެއްގަ އެވެ. ފުރަތަމަ މެޗުގައި ޔޫކްރެއިނާ ދެކޮޅަށް ކުޅެން ޖެހުމަކީ ޑި ބޮއާ ދެކޭގޮތުގައި ޗެލެންޖެކެވެ.
"ޔޫކްރެއިންގެ ކޯޗު އަންދްރޭ ޝެވްޗެންކޯ ވަރުގަދަ ޓީމެއް ބިނާކޮށްފި. އެކަން ބޮޑެތި މެޗުތަކުގައި ޔޫކްރެއިން ޓީމުން ސާބިތު ވެސް ކޮށްދީފި. އަހަރެމެން މި މެޗު އާދައިގެ ގޮތަކަށް ނަގައިގެން ނުވާނެ. ޔޫކްރެއިނަށް ހައްގުވާ އިހުތިރާމް ދޭން ޖެހޭ،" ޑި ބޮއާ ބުންޏެވެ.
ނެދަލެންޑްސް އިން މި ފަހަރު ޔޫރޯގައި ކުޅޭ ތިން މެޗު ވެސް އަމިއްލަ ދަނޑުގައި އޮތުމަކީ އެޑްވާންޓޭޖެއް ކަމަށް ޑި ބޮއާ ގަބޫލުކުރެ އެވެ.
ނެދަލެންޑްސް ލައްވައި 4-3-3 ސިސްޓަމަށް ނުކުޅުވައި ގިނަ މެޗުތަކުގައި 5-3-2 އަށް ކުޅުވާތީ އަމާޒުވާ ފާޑުކިޔުންތަކާ ބެހޭގޮތުން ޑި ބޮއާ ބުނީ އޭނާ އެ ޓީމު ގެންގުޅެނީ އެކި ހާލަތްތަކަށް ފިޓްވާ ގޮތަށް ކަމަށެވެ. އަދި ޓީމު ރޭވުމުގައި ވެސް އޮންނާނީ އަބަދު ވެސް ކުރިއަށް އޮތް މެޗަށް ވިސްނުން ކަމަށް ބުންޏެވެ.
ޔޫކްރެއިންގެ މެޗެއްގެ ތެރެއިން ޝެވްޗެންކޯ.-- ފޮޓޯ: އޭއެފްޕީ
ޔޫކްރެއިންގެ ކޯޗު އަދި ކުރީގެ އެއް ވަނަ ފޯވާޑް ޝެވްޗެންކޯ ބުނީ ނެދަލެންޑްސް ޓީމުގެ ކޮންމެ މަގާމަކަށް ބެލިޔަސް ވަކި ބަލިކަމަށް ބުނެވޭނެ ޑިޕާޓްމަންޓެއް ނެތް ކަމަށެވެ. އެކަމަކު ޔޫކްރެއިން ޓީމުން ބޮޑެތި މެޗުތަކުގައި ދައްކަމުން އަންނަ ހިތްވަރު މި މެޗުގައި ވެސް ނެރެފިނަަމަ ރަނގަޅު ނަތީޖާއެއް ހޯދޭނެ ކަމަށް ޝެވްޗެންކޯ ގަބޫލުކުރެ އެވެ.
"ޔޫކްރެއިނުގައި އަހަރެންގެ ފިލޯސަފީ އަކީ ވަކި ބައެއް (ޓީމެއް) މުހިއްމުވީމައޭ ކިޔާފައި ވަކި ގޮތަކަށް މެޗަށް ތައްޔާރުވުމެއް ނޫން. އަހަރެން ބޭނުމީ ކޮންމެ މެޗެއްގައި ވެސް މޮޅުވާން. އެ ގޮތަށް މަސައްކަތްކުރެވޭ ކުޅުންތެރިން އަހަރެންގެ ޓީމުގައި ހިމެނޭނީ ވެސް،" ޝެވްޗެންކޯ ބުންޏެވެ.
އަނިޔާގެ ސަބަބުން ނެދަލެންޑްސްގެ ކެޕްޓަން ވާޖިލް ވެން ޑައިކަށް މި ފަހަރުގެ ޔޫރޯގައި ނުކުޅެވޭނެ އެވެ. އެކަަމަކު ޓީމު އޮފިޝަލެއްގެ ގޮތުގައި އޭނާ އަންނަނީ ޓީމާ އެކު ދަތުރުކުރަމުންނެވެ.
ވެން ޑައިކް ނެތްތަނަށް ނެދަލެންޑްސް އިން ބޭނުންކުރާނެ ކަމަށް ބެލެވޭ ޒުވާން ޑިފެންޑަރު މަތައިސް ޑި ލިޓްގެ ފަޔަށް ލިބުނު އަނިޔާއެއްގެ ސަބަބުން މިރޭގެ މެޗަށް އެއްކޮށް ފިޓްވާނެ ކަމާ މެދު ވަނީ ސުވާލު އުފެދިފަ އެވެ.
މިއީ ބައިނަލްއަގުވާމީ ބޮޑު މުބާރާތެއްގައި ނެދަލެންޑްސް އާއި ޔޫކްރެއިންގެ ފުރަތަމަ މެޗެވެ. އެކުވެރިކަމުގެ ދެ މެޗު ކުޅުނުއިރު، ނެދަލެންޑްސް އެއް މެޗުން ވަނީ މޮޅުވެފަ އެވެ. އަނެއް މެޗު ނިމުނީ އެއްވަރުވެގެންނެވެ. މިއީ 2000 ވަނަ އަަހަރުގެ ޔޫރޯ ސެމީ ފައިނަލުން އިޓަލީ އަތުން ބަލިވި ފަހުން މި މުބާރާތުގެ މެޗެއްގައި ނެދަލެންޑްސްގެ ޔޯހަން ކްރައިފް އެރީނާގައި އެ ގައުމުން ކުޅޭނެ ފުރަތަމަ މެޗެވެ. މިރޭގެ މެޗު ފަށާނީ ރާއްޖެ ގަޑިން 12 ޖަހާއިރު އެވެ.
