ލަންޑަން (ޖޫން 13) - ޔޫރޯ ފުޓްބޯޅަ މުބާރާތުގައި މިރޭ އިންގްލެންޑާ ދެކޮޅަށް ކުޅޭ މެޗުގެ ކުރިން ކްރޮއޭޝިއާގެ ކެޕްޓަން ލޫކަ މޮޑްރިޗް އިންގްލެންޑްގެ ކުޅުންތެރިންނަށް ތައުރީފުކުރުމަށް ފަހު އިނގިރޭސި މީޑިއާ އަށް ފާޑުކިޔައިފި އެވެ.
ކުރިން އިނގިރޭސި ކްލަބް ޓޮޓެންހަމަށް ކުޅުނު މޮޑްރިޗަކީ މީގެ ތިން އަހަރު ކުރިން ރަޝިއާ ވޯލްޑް ކަޕް ސެމީ ފައިނަލުގައި ކްރޮއޭޝިއާ އިން އިންގްލެންޑް ބަލިކުރި މެޗުގައި ތަފާތު ދެއްކި ކުޅުންތެރިއެކެވެ. އަދި މޮޑްރިޗް ވަނީ 2008 ވަނަ އަހަރުގެ ޔޫރޯ ކޮލިފައިންގައި އިންގްލެންޑްގެ މައްޗަށް ކުރިހޯދި ކްރޮއޭޝިއާ ޓީމުގައި ވެސް ހިމެނިފަ އެވެ. އެ ފަހަރު އިންގްލެންޑް ޔޫރޯ އަށް ކޮލިފައިނުވީ ކްރޮއޭޝިއާ އަތުން ބަލިވުމުންނެވެ.
މޮޑްރިޗް ބުނީ އަބަދުވެސް އިންގްލެންޑް ބައިނަލްއަގުވާމީ މުބާރާތަކަށްދާއިރު، އެ ގައުމުގެ މީޑިއާ އިން އެކި ގޮތްގޮތަށް ވާހަކަ ދައްކާ ކަމަށެވެ.
"(މީޑިއާގެ) އެ ބޮޑާކަން. އެއީ އިންގްލެންޑްގެ ކުޅުންތެރިން ނޫނީ ޓީމުގައި ހުރިކަމެއް ނޫން. އެއީ އެ މީހުންގެ ވަށައިގެން ތިބި މީހުންގެ ހުރިކަމެއް. މީޑިއާ ނޫސްވެރިންނާއި ކޮމެންޓޭޓަރުން ވެސް އެ ގޮތް. ތެދަށް ބުނަންޏާ އަހަރެން ފަހަކަށް އައިސް އެ މީހުން (އިނގިރޭސި މީޑިއާ)ގެ ހަބަރުތަކެއް ނުބަލަން،" އުމުރުން 35 އަހަރުގެ މޮޑްރިޗް ބުންޏެވެ.
"އަހަރެން ބޭނުންވަނީ މެޗަށް ފޯކަސް ކުރަން އަނެއް ފަރާތުގައި ހިނގާ ކަންތައްތަކާ ބެހޭ ގޮތުން މާ ގިނަ ވާހަކަ ދައްކަން ނެތިން،"
މީގެ ކުރިން ވެސް މޮޑްރިޗް ވަނީ އިނގިރޭސި މީޑިއާ އިން ޕްރޮފެޝަަނަލް އުސޫލާ ހިލާފަށް މުބާރާތްތަކުގައި އިންގްލެންޑާ ދެކޮޅަށް ނުކުންނަ ޓީމުތަކާ މެދު އިހުތިރާމް ކުޑަކޮށް ކަންތައްތައް ކުރާތީ ފާޑުކިޔައިފަ އެވެ.
މޮޑްރިޗް ބުނީ އިނގިރޭސި އެކި ޖީލުތަކުގެ ގައުމީ ޓީމުތަކާ ދެކޮޅަށް ކުޅެވިއްޖެ ކަމަށާއި އޭނާގެ ނަޒަރުގައި ކޮންމެ ޓީމެއް ވެސް ފެންނަނީ ވަރަށް ވަރުގަދަކޮށް ކަމަށެވެ. އެހެންވެ އުއްމީދުކުރަނީ އިންގްލެންޑްގެ އަމިއްލަ ދަނޑުގައި މިރޭގެ މެޗު ކުޅޭއިރު، އިތުރު އުނދަގޫތަކެއް ހުންނާނެ ކަމަށާއި ކްރޮއޭޝިއާ އިން ތައްޔާރުވާނީ އެ ހުރިހާ ހާލަތަކަށް ވިސްނާފައި ކަމަށް މޮޑްރިޗް ބުންޏެވެ.
މުބާރާތުގެ ޝެޑިއުލް ރޭވިފައިވާ ގޮތުން އިންގްލެންޑްގެ ގްރޫޕް ސްޓޭޖު ތިން މެޗު ވެސް އެ ޓީމުގެ އަމިއްލަ ދަނޑުގައި ކުޅޭ ގޮތަށް އޮތުމުން މޮޑްރިޗް ވަނީ އެކަމާ ހިތްހަމަނުޖެހުން ފާޅުކޮށްފަ އެވެ.
"އަހަރެންގެ އަމިއްލަ ވިސްނުމުގައި ބުނާކަމަށްވަންޏާ މިއީ އިންސާފުވެރި ގޮތެއް ނޫން. އިންގްލެންޑްގެ ތިން މެޗު ވެމްބްލީގައި ކުޅޭތީ އެ ޓީމަށް އެބައޮތް އެޑްވާންޓޭޖް ވަރަށް ބޮޑަށް،" މޮޑްރިޗް ބުންޏެވެ.
ކްރޮއޭޝިއާގެ ކޯޗު ޑާލިޗް (ކ) އާއި އިންގްލެންޑްގެ ކޯޗު ސައުތުގޭޓް ޔުއެފާގެ ހަފްލާއެއްގެ ތެރެއިން.
މެޗުގެ ކުރިން ކޯޗުންގެ ބަސް
މިއީ ބައިނަލްއަގުވާމީ ބޮޑު މުބާރާތެއްގައި ކްރޮއޭޝިއާ އާއި އިންގްލެންޑްގެ ތިން ވަނަ ކުރިމަތިލުމެވެ. އެންމެ ފުރަތަަމަ 2004 ވަނަ އަހަރުގެ ޔޫރޯ ގްރޫޕް ސްޓޭޖުގައި ކުޅުނު މެޗުން އިންގްލެންޑް ވަނީ 4-2 އިން މޮޅުވެފަ އެވެ. އޭގެ ފަހުން ދެން 2018 ވަނަ އަހަރުގެ ވޯލްޑް ކަޕް ސެމީގައި ކްރޮއޭޝިއާ 2-1 އިން މޮޅުވި އެވެ. އެކަމަކު 2018 ވަނަ އަހަރު ޔުއެފާ ނޭޝަންސް ލީގުގައި އިންގްލެންޑް ވަނީ 2-1 އިން ކްރޮއޭޝިއާ ބަލިކޮށްފަ އެވެ. (އެ މުބާރާތަކީ ބައިނަލްއަގުވާމީ އެންމެ މަތީ ފަންތީގައި ގުނާ މުބާރާތެއް ނޫނެވެ.)
ސައުތުގޭޓް ބުނީ ކްރޮއޭޝިއާއާ ދެކޮޅަށް ކުޅޭ އެއްވެސް މެޗެއް މިހާތަނަށް ފަސޭހަކޮށް ނިމިފައިނުވާ ކަމަށެވެ. އެހެންވެ، މިރޭގެ މެޗު ވެސް އުނދަގޫވާނެ ކަމަށް ސައުތުގޭޓް ހުރީ ތައްޔަރުވެގެންނެވެ.
"އަހަރެމެންނަށް އަބަދުވެސް ވަރަށް އުނދަގޫ ކްރޮއޭޝިއާގެ މެޗުތައް. ވަރަށް ކުޑަ ތަފާތަކުން މެޗުގެ ނަތީޖާ އަށް އަސަރުކޮށްފައި ވެސް އެބަހުރި. އެހެންވީމަ އެބަޖެހޭ މި މެޗަށް ޓީމު ނެގުމުގައި ވަރަށް ރަނގަޅު ބެލެންސެއް ހޯދަން. ކޮންމެ މުބާރާތެއްގައި ވެސް ފެށުން މުހިއްމުވާނެ،" ސައުތުގޭޓް ބުންޏެވެ.
ކްރޮއޭޝިއާ އަށް 2018 ވަަނަ އަހަރުގެ ވޯލްޑް ކަޕުގެ ފައިނަލުން ފުރުސަތު ހޯދައިދިން ޒްލަޓްކޯ ޑާލިޗް ބުނީ ވޯލްޑް ކަޕަށް ފަހު ކްރޮއޭޝިއާ އިން ބައިނަލްއަގުވާމީ މުބާރާތްތަކާ މެދު ދެކޭގޮތް ބަދަލުވެފައިވާ ކަމަށެވެ. އަދި ގިނަ ބަޔެއް މިހާރު ކްރޮއޭޝިއާ އިން ނަތީޖާ ނެރެންޖެހޭ ކަމަށް ގަބޫލުކުރާތީ އެއީ ވެސް އޮތް ޕްރެޝަރެއް ކަމަށް ޑާލިޗް ބުންޏެވެ.
ބޮޑު މުބާރާތެއްގެ މެޗަކުން ވެމްްބްލީގައި އިންގްލެންޑް މެޗެއްގެ ފުރިހަމަ ވަގުތު ތެރޭ ބަލިވެފައިނުވެ އެވެ. އިންގްލެންޑުން 1966 ވަަނަ އަހަރުގެ ވޯލްޑް ކަޕް ކާމިޔާބުކުރިއިރު، ވެމްބްލީގައި ކުޅުނު މެޗުތަކުން މޮޅުވި އެެވެ. އިންގްލެންޑުން 1996 ވަަނަ އަހަރުގެ ޔޫރޯ ހޯސްޓްކުރިއިރު، އެ މުބާރާތުން ކެޓީ ސެމީގައި ޕެނަލްޓީ ޖަހައިގެން ބަލިވުމުންނެވެ. ޔޫރޯގެ ފައިނަލަށް ނުގޮސް އެންމެ ގިނަ މުބާރާތުގައި ކުޅުމުގެ ރެކޯޑް އޮތީ އިންގްލެންޑަށެވެ. މިއީ އެ ޓީމުގެ 10 ވަނަ ޔޫރޯ އެވެ.
މިއީ ކްރޮއޭޝިއާ އިން ޔޫރޯގައި ކުޅޭ ހަ ވަނަ ފަހަރެވެ. އަދި ޖެހިޖެހިގެން މުބާރާތުގައި ވާދަކުރާ ފަސް ވަނަ ފަހަރެވެ. އިންގްލެންޑާއި ކްރޮއޭޝިއާ ބައްދަލުކުރާ މެޗު ފަށާނީ ރާއްޖެ ގަޑިން 18:00 ގަ އެވެ.
