މިއީ ސްވިޑެން އިން ޔޫރޯގައި ކުޅޭ ހަތް. ވަނަ ފަހަރެވެ. އެ ޓީމުން އެންމެ ފުރަތަމަ ޔޫރޯގައި ކުޅުނީ 1992 ވަނަ އަހަރު އެވެ. އޭގެ ފަހުން އިންގްލެންޑްގައި 1996 ވަނަ އަހަރު ބޭއްވި ޔޫރޯ ފިޔަވަައި އެހެން ހުރިހާ ފަހަރަކު އެ ޓީމު ވަނީ މުބާރާތަށް ކޮލިފައިވެފަ އެވެ. ސްވިޑެންގެ ތާރީހުގައި މިހާތަނަށް ޔޫރޯގައި ނެރުނު އެންމެ ރަނގަޅު ނަތީޖާ އަކީ 1992 ވަނަ އަހަރު ސެމީ ފައިނަލުގައި ވާދަކުރުމެވެ. އަމިއްލަ ގައުމުގައި އެ ފަހަރު ހޯސްޓްކުރި މުބާރާތުގެ ސެމީގައި ސްވިޑެން ބަލިވީ ޖަރުމަނާ ވާދަކޮށް 3-2 އިންނެވެ.
ކޮލިފައިންގައި ވެސް ސްވިޑެން ވާދަކުރަން ޖެހުނީ ސްޕެއިންއާ އެއް ގްރޫޕެއްގަ އެވެ. ކޮލިފައިންގައި ސްވިޑެން އިން ކުޅުނު 10 މެޗުގެ ތެރެއިން މޮޅުވީ ހަ މެޗުންނެވެ.ތިން މެޗުން އެއްވަރުވިއިރު، ބަލިވީ ސްޕެއިން އަތުން އެކަންޏެވެ. ކޮލިފައިންގައި ސްވިޑެން އިން. 23 ގޯލު ޖެހިއިރު، ބައިކޮޅަށް ވަނީ ނުވަ ގޯލެވެ.
ސްވިޑެން އިން މި ފަހަރުގެ ޔޫރޯ އަށް ތައްޔާރުވަމުން ދަނިކޮށް ލިބުނު އެންމެ ބޮޑު އުފާވެރި ހަބަރަކީ ފަސް އަހަރު ފަހުން ޒަލަޓާން އިބްރަހިމޮވިޗް އެ ޓީމަށް އެނބުރި އަންނަން ނިންމި ކަމެވެ. މާޗް މަހު ވޯލްޑް ކަޕް ކޮލިފައިންގައި އިބްރަހިމޮވިޗް އަލުން ސްވިޑެން އަށް މެޗެއް ކުޅުނު ނަމަވެސް ދާދި ފަހުން ކަކުލަށް ލިބުނު އަނިޔާއެއްގެ ސަބަބުން މި ފަހަރު ޔޫރޯ ވަނީ ގެއްލިފަ އެވެ. ސްވިޑެން ޓީމުން މި ފަހަރު ފާހަގަކޮށްލެވޭނެ ކުޅުންތެރިންގެ ތެރޭގައި ހިމެެނެނީ އާރްބީ ލައިޕްޒިގުގެ އެޓޭކިން މިޑްފީލްޑަރު އެމީލް ފޯސްބާގާއި ރަޝިއާގެ ކްރަސްނޯޑާގައި ތަފާތު ދައްކަމުން އަންނަ މިޑްފީލްޑަރު ކްރިސްޓޮފާ އޮލްސަން އެވެ.
ސްވިޑެންގެ ކޯޗު އެންޑަސަން.
ކޯޗު: ޔޭން އެންޑަސަން
ޔޭން އެންޑަސަން ސްވިޑެންގެ ކޯޗަކަށް ހަމަޖެއްސީ 2016 ވަނަ އަހަރު އެވެ. އެއީ އެ އަހަރުގެ ޔޫރޯގެ ގްރޫޕް ސްޓޭޖުން އެ ޓީމު ކެޓުމުންނެވެ. އެންޑަސަން ހަވާލުވެ، ސްވިޑެން ވަނީ 12 އަހަރަށް ފަހު ވޯލްޑް ކަޕަށް ކޮލިފައިކޮށްދީފަ އެވެ. އަދި ދާދި ފަހުން ޔުއެފާ އިން ފެށި ނޭޝަންސް ލީގުގައި ސްވިޑެން ވަނީ ރަޝިއާ އާއި ތުރުކީ ބަލިކޮށްފައި ގްރޫޕް އެއް ވަނަ ހޯދައިފަ އެވެ.
ސްކޮޑު
ކީޕަރުން: ކާލް-ޔޯހަން ޖޯންސަން (ކޮބެންހާވްން)، ކްރިސްޓޮފާ ނޯޑްފެލްޓް (ގެންކްލާބިރްލިހީ)، ރޮބިން އޯލްސެން (އެވަޓަން)
ޑިފެންޑަރުން: އެމީލް ކްރާފްޓް (ނިއުކާސަލް)، ވިކްޓަ ލިންޑެލޯފް (މެންޗެސްޓާ ޔުނަޓެޑް)، މާކަސް ޑެނިއަލްސަން (ޑާލިއަން ޔިފާން)، މާޓިން އޮލްސެން (ހެކަން)، ލުޑްވިގް އޮގަސްޓިންސަން (ވާޑާ ބްރެމެން، ޕޮންަޓަސް ޔެންސަން (ބްރެންޓްފޯޑް)، ފިލިޕް ހެލަންޑާ (ރޭންޖާސް)، މިކައެލް ލަސްޓިގް (އޭއައިކޭ)، އަންޑްރެއަސް ގްރަންކްވިސްޓް (ހެލްސިންބޯގް)
މިޑްފީލްޑަރުން: އެމީލް ފޯސްބާގް (ލައިޕްޒިގު)، ކެން ސެމާ (ވަޓްފޯޑް)، ވިކްޓަ ކްލައެސަން (ކްރަސްނޯޑާ)، ޑޭޖާން ކުސުލެވްސްކީ (ޔުވެންޓަސް)، ސެބަސްޓިއަން ލާސަން (އޭއައިކޭ)، އަލްބިން އެކްޑާލް (ސަމްޑޯރިއާ)، ކްރިސްޓޮފާ އޮލްސަން (ކްރަސްނޯޑާ)، ޖެންސް-ލީސް ކަޖުސްޓް (މިޓްޔައެލަންޑް)، މަޓިއަސް ސްވަންބާގް (ބޮލޯނިއާ)، ގުސްޓާވް ސްވެންސަން (ގުއަންޒޫ)
ފޯވާޑުން: މާކަަސް ބާގް (ކްރަސްނޯޑާ)، އަލެކްސަންޑަ އައިސާކް (ރެއާލް ސޮސިއެޑާޑް)، ރޮބިން ކުއައިސަން (މައިންޒް)، ޖޯޑަން ލާސަން (ސްޕާޓާ މޮސްކޯ)
