ސްޓޮކްހޯލްމް، ސްވިޑެން (މާޗް 15) - އުމުރުން 41 އަހަރުގެ ޒަލަޓާން އިބްރަހިމޮވިޗް، ކުރިއަށް އޮތް ޔޫރޯ ކޮލިފައިންގެ މެޗުތަކަށް އެކުލަވާލި ސްވިޑެންގެ ގައުމީ ފުޓްބޯޅަ ޓީމުގެ ސްކޮޑުގައި ހިމަނައިފި އެވެ.
އިބްރަހިމޮވިޗް، އެންމެ ފަހުން ސްވިޑެން ޓީމަށް ކުޅުނީ މީގެ 12 މަސް ކުރިންނެވެ. މި މަހު، ސްވިޑެން އިން ޔޫރޯ ކޮލިފައިންގައި ބެލްޖިއަމް އާއި އަޒަރުބައިޖާނާ ދެކޮޅަށް ކުޅޭ ދެ މެޗުން ކުރެ އެއް މެޗުގައި ވެސް އިބްރަހިމޮވިޗް، ކުޅެފިނަމަ، އިޓަލީގެ ލެޖެންޑަރީ ގޯލްކީޕަރު ޑީނޯ ޒޮފްގެ ރެކޯޑް މުގުރާލާނެ އެވެ.
ޔޫރޯ ކޮލިފައިން މެޗެއްގައި ކުޅުނު އެންމެ އުމުރުން ދުވަސްވީ ކުޅުންތެރިޔާގެ ރެކޯޑް، ޒޮފް ގާއިމްކުރީ 1983 ވަނަ އަހަރު އެވެ. އެއީ، އުމުރުން 40 އަހަރާއި 90 ދުވަސް ފުރިފައިވަނިކޮށް މެޗެއް ކުޅެގެން ޒޮފް ހެދި ރެކޯޑެކެވެ.
އިބްރަހިމޮވިޗަށް މިހާރު އޮތް ގޮތުން، ޒޮފްގެ އެ ރެކޯޑް މުގުރާލުމުގެ ހުރިހާ ފުރުސަތެއް އެބައޮތެވެ.
ސްވިޑެން އިން ޔޫރޯ ކޮލިފައިންގައި މި މަހު 24 ވަނަ ދުވަހު ބެލްޖިއަމާ ކުޅުމަށް ފަހު އޭގެ ތިން ދުވަސް ފަހުން، 27 ވަނަ ދުވަހު އަޒަރުބައިޖާނާ ކުޅޭނެ އެވެ. ކަކުލުގެ އަނިޔާ އަކުން ރިކަވާވެގެން އެނބުރި އައިސް އިބްރަހިމޮވިޗް ވަނީ އެންމެ ފަހުން އޭސީ މިލާން ކުޅުނު ތިން މެޗުގައި ވެސް ކުޅެފަ އެވެ.
ސްވިޑެންގެ ކޯޗު ޖޭން އެންޑަސަން ބުނީ މިލާން އެންމެ ފަހުން ކުޅުނު ތިން މެޗުގައި ވެސް ބަދަލު ކުުޅުންތެރިއެއްގެ ގޮތުގައި ކުޅެން އަރައި، އިބްރަހިމޮވިޗް ދެއްކި ކުޅުން ރަނގަޅު ކަމަށާއި ފެންނަ ފެނުމަށް ގައުމީ ޓީމުގައި ވެސް ބޭނުންކުރެވޭނެ ވަރަށް ފިޓްނަސް ރަނގަޅު ކަމަށެވެ.
"ދަނޑުމަތީގަޔާއި ދަނޑުން ބޭރުގައި ވެސް އިބްރަހިމޮވިޗް ލެވަލްގެ ކުޅުންތެރިއެއް ހުރިހާ ގޮތަކުން ވެސް މުހިންމުވާނެ،" ޖޭން އެންޑަސަން ބުންޏެވެ.
ޖަރުމަނުގައި 2024 ވަނަ އަހަރު ބާއްވާ ޔޫރޯގައި އިބްރަހިމޮވިޗް ކުޅެފިނަމަ، ހަންގޭރީގެ ގޯލްކީޕަރު، ޑާބޯ ކިރާއީ، 2016 ވަނަ އަހަރުގެ ޔޫރޯގައި ހެދި ރެކޯޑް ވެސް މުގުރާލެވޭނެ އެވެ. ހަންގޭރީ ޓީމަށް 2016 ވަނަ އަހަރުގެ ޔޫރޯގައި ކިރާއީ ކުޅުނުއިރު، އުމުރަކީ 40 އަހަރެވެ.
މިދިޔަ އަހަރުގެ ފީފާ ވޯލްޑް ކަޕުން ސްވިޑެން އަށް ފަހު ވަގުތު ފުރުސަތު ގެއްލުމުން، އޭރު އަނިޔާގައި ހުރި އިބްރަހިމޮވިޗް ދިން އިންޓަވިއުއެއްގައި ބުނީ ރިޓަޔާކުރުމުގެ ހިޔާލެއް ނެތް ކަމަށާއި ގައުމީ ޓީމުން ގޮވާލައިފިނަމަ އެހީވާން ތައްޔާރަށް ހުރި ކަމަށެވެ.
ސްވިޑެން، ޔޫރޯ ކޮލިފައިންގެ ގްރޫޕް އެފްގައި ވާދަކުރާއިރު، ބެލްޖިއަމާއި އަޒަރުބައިޖާންގެ އިތުރުން ދެން އެ ގްރޫޕްގައި ހިމެނެނީ އެސްޓޯނިއާ އާއި އޮސްޓްރިއާ އެވެ.
