މި ފަހަރު ޔޫރޯ އިން މުޅިން އަލަށް ފުރުސަތު ލިބުނު ދެ ޓީމުގެ ތެރެއިން އެ ޓީމަކީ ފިންލެންޑެވެ. އެ ޓީމުން މުބާރާތަށް ކޮލިފައިވީ ގްރޫޕްގެ ދެ ވަނަ ޓީމުގެ ގޮތުގަ އެވެ. އެ ޓީމު ކޮލިފައިވީ 2004 ވަނަ އަހަރުގެ ޗެމްޕިއަން ގްރީސް އާއި ބޮސްނިއާ ފަހަތައް ޖައްސާލުމަށް ފަހު އެވެ. ކޮލިފައިންގައި ފިންލެންޑް ކުޅުނު 10 މެޗުގެ ތެރެއިން ހަ މެޗުން މޮޅުވިއިރު،،ބަލިވީ ހަތަރު މެޗުންނެވެ. އެއީ އިޓަލީ އަތުން ދެ މެޗުންނާއި ބޮސްނިއާ އަދި ގްރީސް އަތުން މެޗަކުންނެވެ.
ޔުއެފާގެ މެމްބަރު 55 ގައުމުގެ ތެރެއިން ފިންލެންަޑަކީ ޔޫރޯ އަށް ކޮލިފައިވި 34 ވަނަ ގައުމެވެ. އެ ޓީމުގެ ކުރިން 33 ގައުމެއް ޔޫރޯގައި ކުޅެފައިވެ އެވެ. ކޮލިފައިން ބުރުގައި ފިންލެންޑުން ދައްކަމުން އައި ކުޅުމުގެ ސަބަބުން މި ފަހަރުގެ ޔޫރޯގައި އެ ޓީމުން ހައިރާންކުރަނިވި ނަތީޖާތަކެއް ނެރުމުގެ ފުރުސަތު އެބައޮތެވެ. މީގެ އަހަރުތަކެއް ކުރިން އައިސްލެންޑް ވޯލްޑް ކަޕްގައި ނެރުނު ފަދަ ނަތީޖާތަކެއް މި ފަހަރު ޔޫރޯގައި ފިންލެންޑަށް ނެރެވިދާނެ ކަމަށް ބައެއް ފުޓްބޯޅަ ތަޖުރިބާކާރުން ގަބޫލުކުރެ އެވެ
ކުރިން ސެމީ ހޫޕިއާ އާއި އެންޓި ނިއޭމީ އަދި މިކޭލް ފޯސެލް ފަދަ ކުޅުންތެރިން ފިންލެންޑަށް ކުޅުނު ނަމަވެސް ޔޫރޯއެއްގައި ގައުމު ތަމްސީލް ނުކުރެވެ އެވެ. މި ފަަހަރުގެ ޔޫރޯ އަށް ފިންލެންޑް ކޮލިފައިކޮށްދިނުމުގައި އެންމެ މުހިއްމު ރޯލެއް ކުޅުނު އެއް ކުޅުންތެރިއަކީ ކޮލިފައިންގެ މެޗުތަކުގައި 10 ގޯލު ޖެހި ފޯވާޑް ޓީމޫ ޕޫކީ އެވެ. އޭނާގެ އިތުރުން ދެން އެ ޓީމުން ވިދާލާނެ އަނެއް ކުޅުންތެރިއަކީ ޖަރުމަނުގެ އޯގްސްބާގަށް ކުޅޭ ވިންގް ފްރެޑްރިކް ޔެންސެން އެވެ.
ކޯޗު: މާރްކޫ ކަނޭރްވާ
ފިންލެންޑް ގައުމީ ޓީމާ 2016 ވަނަ އަހަރު ހަވާލުވުމުގެ ކުރިން ކަނޭރްވާ ވަނީ އެ ގައުމުގެ ފުޓްބޯޅަ ސިސްޓަމުގެ ތެރޭގައި މުހިއްމު މަސައްކަތްތަކެއް ކޮށްފަ އެވެ. ފަސް ފަަހަރު ފިނިޝް ލީގު ކާމިޔާބުކޮށްފައިވާ ކަނެރްވާ ވަނީ 12 އަހަރު ވަންދެން 21 އަހަރުން ދަށުގެ ޓީމުގައި މަސައްކަތްކުރުމަށް ފަހު ސީނިއާ ޓިމުގެ އެސިސްޓަންޓް ކޯޗަކަށް ވެސް މަސައްކަތްކުރި އެވެ. އޭނާއާ ސީނިއާ ޓީމުގެ ކޯޗުކަން ހަވާލުކުރުން ވެގެންދިޔައީ އެ ގައުމުގެ ފުޓްބޯޅައިގެ ކާމިޔާބުގެ ސޮފުހާއެއްގެ ފެށުމަށެވެ.
ސްކޮޑު
ކީޕަރުން: ލޫކަސް ރަޑޭކީ (ލެވަކޫސަން)، ޖެސޭ ޔޮރޯނެން (ބްރެޝިއާ)، އަންސީ ޔާކޮލާ (ބްރިސްޓަލް ރޯވާސް)
ޑިފެންޑަރުން: ޕައުލަސް އަރަޔޫރީ (ޕާފޯސް)، ޑެނިއަލް އޯޝޯނެސީ (ހެލްސިންކީ)، ޔޫނާ ޓޮއީވިއޯ (ހެކަން)، ލެއޯ ވައިސަނެން (އެލްފްސްބޯގް)، ސޯލީ ވައިސަނެން (ކިއޭވޯ)، ރޮބާޓް އިވާނޯވް (ވާޓާ ޕޮޒްނަން)، ޖެރޭ ޔުރޯނެން (ގެންކް)، ނިކޯލަ އަލްހޯ (އެމްޓީކޭ ބުޑަޕެސްޓް)، ޔުއްކާ ރައިޓާލާ (މިނެސޯޓާ ޔުނައިޓެޑް)، ޕީރީ ސޮއީރީ (އެޔްސްބާގް)
މިޑްފީލްޑަރުން: ގްލެން ކަމާރާ (ރޭންޖާސް)، ރޮބާޓް ޓޭލާ (ބްރަން)، ރޮބިން ލޯޑް (މިނެސޯޓާ ޔުނައިޓެޑް)، ޔޯނީ ކޯކޯ (އެޔްސްބާގް)، އޮނީ ވަލަކާރީ (ޕާފޯސް)، ރަސްމަސް ޝޫލާ (ޑްޔުގާޑެން)، ތޯމަސް ލެމް (ޒްވޯލްވް)، ޓިމް ސްޕާވް (ލަރީސާ)، ފްރެޑްރިކް ޔެންސެން (އޮއުސްބާގް)، ލަސީ ލައްޕަލައިނެން (މޮންޓްރެއާލް)
ފޯވާޑުން: ޖޮއެލް ޕޯޖަންޕާލޯ (ޔޫނިއަން ބާލިން)، މާކަސް ފޯސް (ބްރެންޓްފޯޑް)، ޓީމޫ ޕޫކީ (ނޯވިޗް ސިޓީ)
