ކޮވިޑަށް ޓެސްޓް ކުރުމަށް ނަގަމުންދާ ސާމްޕަލް ތަކުން ޕޮޒިޓިވްވާ ސާމްޕަލްތައް އުކާލުމުގައި ކަނޑައަޅާފައިވާ އުސޫލުތަކާ ހިލާފަށް އަމަލު ކުރަމުންދާކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން ބުންޏަސް އެފަދަ މައްސަލައެއް ހުށަހަޅާފައިނުވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.
އެކަމާ ގުޅިގެން "އަދަދު" އަށް މައުލޫމާތު ދެއްވަމުން ހެލްތް މިނިސްޓްރީގެ ޑެޕިއުޓީ ޑިރެކްޓާ ޖެނެރަލް ތަސްލީމާ އުސްމާން ވިދާޅުވީ ސާމްޕަލް ނެގުމަށްފަހު ޓެސްޓް ހެދުމަށް ހުއްދަ ދޫކުރެވެނީވެސް އެ ސާމްޕަލްތައް ނައްތާ ލެވޭނެ ނިޒާމެއް ގާއިމް ވެފައިވާ ނަމަ ކަމަށެވެ.
އަދި އެ އުސޫލާ ހިލާފަށް ކަމެއް ހިނގާފައިވާ ކަމުގެ އެއްވެސް މައްސަލައެއް މިހާތަނަށް އެޗްޕީއޭއަށް ހުށަހަޅާފައި ނުވާ ކަމަށެވެ.
އެޗްޕީއޭން އެހެން ބުނެފައިވަނީ، ރޭ ރާއްޖެޓީވީގެ ޕްރޮގްރާމެއްގައި ވާހަކަ ދައްކަވަމުން ކޮވިޑަށް ޕޮޒިޓިވްވާ ސާމްޕަލްތައް ފަދަ ތަކެތި އުކާލާއިރު ބައެއް ތަންތަނުން އާންމު ކުނިބުނީގެ ތެރޭގައި ބަހައްޓާކަން ފާހަގަކުރެވިފައިވާ ކަމަށް ވެމްކޯގެ މެނޭޖިން ޑިރެކްޓަރު އާދަމް މުހައްމަދު ވިދާޅުވުމާ ގުޅިގެންނެވެ.
މިހާ ބޮޑަށް ކޮވިޑް ފެތުރިފައިވާ ދަނޑިވަޅެއްގައި އެފަދަ ކަންކަން ހިނގަމުންދާތީ ހިތާމަކުރައްވާކަން ފާހަގަކުރައްވަމުން އާދަމް މުހައްމަދު ވިދާޅުވީ، އެ ކަންކަމުގެ މައުލޫމާތު ގަބޫލު ކުރައްވަން ވެސް ދަތިވާ ކަމަށެވެ.
ޕޮޒިޓިވްވާ ސާމްޕަލް ކަހަލަ އެއްޗެހި ވެމްކޯ މީހުން ނަގާ ޖެނެރަލް ވޭސްޓްގެ ތެރެއަށްލާފަ ހުންނަނީ. މިއީ ފަރުވާ ކުޑަ ކުރުމެއް ނޫން. މިއީ ހަމަ ގަސްތުގަ ކުރާ ކަންކަން. އެފަދަ ތަކެތި ހުންނަކަން އެނގެނީ ބައެއް މުވައްޒަފުންގެ ފަރާތުން. ފަހުން ބަލާލާއިރު އެގޮތަށް ހަމަ އެ ކަން ހިނގާފަ ހުންނަނީ
މީގެ އިތުރުން އޭނާ ވިދާޅުވީ ހެލްތު ފެސިލިޓީތައް ފަދަ ޕްރޮފެޝަނަލް ސާވިސް ދެމުންދާ ތަންތަނުގައި އުޅޭ މީހުންގެ ފުށުން އެ ބާވަތުގެ ކަންކަން ފެނިގެން ނުވާނެ ކަމަށެވެ.
