ސޯޝަލް ހައުސިން ސްކީމުގެ ތެރެއިން ދިވެހި ކުންފުންޏަކުން ހިންގާ ފްލެޓް އެޅުމުގެ އެންމެ ބޮޑު މަޝްރޫއު ހުޅުމާލޭގައި އެޕޯލޯ ހޯލްޑިންސް ކުންފުނިން ފަށައިފި އެވެ.
މި ސަރުކާރުގެ ބޯހިޔާވަހިކަމުގެ މަޝްރޫއުގެ ތެރެއިން އެޕޯލޯއާ ހަވާލުކުރީ، ހަތަރު ކެޓަގަރީއަކަށް ހާއްސަކޮށްގެން 1،000 ފްލެޓް އެޅުމަށެވެ. އެ ފްލެޓްތަކުގެ ފައުންޑޭޝަން އެޅުމުގެ މަސައްކަތް މިހާރު ވަނީ ފަށައިފަ އެވެ.
އެޕޯލޯއާ ހަވާލުކުރި ފްލެޓްތަކުގެ ތެރޭގައި އެންމެ އަގުހެޔޮކޮށް ދޫކުރަން ނިންމާފައިވާ ކައުންސިލް ހައުސިން ކެޓަގަރީ ވެސް ހިމެނެ އެވެ. ދެން ހިމެނޭނީ އަތްފޯރާ ފަށުގައި ދޫކުރާ ފްލެޓްތަކާއި މެދު ފަންތި އާއި މަތީ ފަންތީގެ ފްލެޓްތައް ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން ބުންޏެވެ.
"މިއީ، ދިވެހި ކުންފުންޏަކުން ހުޅުމާލޭގައި ހިންގާ ފްލެޓް އެޅުމުގެ އެންމެ ބޮޑު މަޝްރޫއު،" އޭނާ ވިދާޅުވި އެވެ.
އެޕޯލޯ އިން ފްލެޓްތަކުގެ ފައުންޑޭޝަން މަސައްކަތް ފަށާފައި: އެ ކުންފުންޏާ ހަވާލުކުރީ ހަތަރު ކެޓަގަރީއަކުން ފްލެޓް އަޅަން.
ހުޅުމާލޭގެ ފުރަތަމަ ފިޔަވައްސާއި ދެ ވަނަ ފިޔަވަހީގައި އިމާރާތްކުރާ މި ފްލެޓްތަކުގެ ކޮންސެޕްޓާއި ޑިޒައިން ވެސް ކުރިއަށް ގެންދަނީ އެ ކުންފުނިންނެވެ. މި މަޝްރޫއުގައި ފައިނޭންސް ކުރާނީ ވެސް އެޕޯލޯ އިންނެވެ.
އެޗްޑީސީން ބުނިގޮތުގައި މި ފްލެޓްތައް ކުރިއަށް އޮތް ދެތިން އަހަރުގެ ތެރޭގައި ނިމޭނެ ކަމަށް ލަފާ ކުރެވެ އެވެ.
މީގެ އިތުރުން ވެސް ބޯހިޔާވަހިކަމުގެ ދަތިތަކުން އަރައިގަތުމަށް ސަރުކާރުން ކުރިއަށް ގެންދާ މަސައްކަތްތަކުގެ ތެރޭގައި ހިމެނިގެން އިތުރު ބަޔަކާ އެކު ވެސް ފްލެޓު އަޅަން ހަވާލުކުރަން އެޗްޑީސީން ނިންމައި ދިވެހި ބައެއް ކުންފުނިތަކަކާ މަޝްރޫއުތަކެއް ހަވާލުކޮށްފައިވެ އެވެ.
އެޕޯލޯގެ ފްލެޓްތަކަކީ 15،000 ފްލެޓުގެ ތެރޭގައި ހިމެނޭ މަޝްރޫއެއް
މި ދައުރުގެ ތެރޭގައި ގާތްގަނޑަކަށް 15,000 ފްލެޓުގެ މަސައްކަތް މާލޭގައި ފަށައި އޭގެތެރެއިން ބޮޑު ބައެއް ނިންމުމަކީ މި ސަރުކާރުގެ އަމާޒެވެ. ކުރިން ޕްލޭންކޮށްފައި އޮތީ، މާލޭގެ ރައްޔިތުންނަށް ހާއްސަ ކޮށްގެން 3،000 ފްލެޓުގެ މަޝްރޫއެއް މި އަހަރުގެ ކުރީކޮޅު ފަށާށެވެ. އެކަމަކު އަދި އެ މަޝްރޫއެއް ނުފެށެ އެވެ.
މާލެ އާއި ރަށްރަށުގެ ބޯހިޔާވަހިކަމަށް މި ސަރުކާރުން ގިނަ ވައުދުތަކެއް ވި ނަމަވެސް އެ މަޝްރޫއުތައް ތަންފީޒުކުރުމުގައި ލަސްކަމުގެ ޝަކުވާ ބޮޑެވެ. އެންމެ ބޮޑު ކަންބޮޑުވުމަކީ މި ވެރިކަމުގައި މިހާތަނަށް ގިނަ ފްލެޓްތަކުގެ އަމަލީ މަސައްކަތް ފެށިފައި ނުވުމެވެ.
އެކަމަކު ހައުސިން މިނިސްޓަރު މުހައްމަދު އަސްލަމް އެކަން ދިފާއުކުރައްވައި "އަދަދު"އަށް ވިދާޅުވެފައި ވަނީ، މި ދައުރުގެ ތެރޭގައި 13،000-15،000 ހައުސިން ޔުނިޓް ފަށައި ބޮޑު މިންވަރެއް ނިންމޭނެ ކަމަށެވެ. މިހާތަނަށް މާލެ ސަރަހައްދުގައި އަޅަން ފަށާފައި ވަނީ 5،000 ފްލެޓެވެ.
މި ސަރުކާރުގެ ވިސްނުމަކީ ކައުންސިލް ހައުސިން އާއި އެފޯޑަބަލް ހައުސިންގެ އިތުރުން މިޑްލް އިންކަމްގެ ކެޓަގަރީއެއް ކުރިއަށް ގެންދިއުމެވެ. މި ތިން ކެޓަގަރީއަށް ކޮންމެ ވަޒީފާއެއް އަދާކުރިއަސް ކުރިމަތިލެވޭނެ ގޮތަށް ހުޅުވާލަން އޮތީ ނިންމައިފަ އެވެ.
