ކޮވިޑްގައި ބަލިވާ މީހުންނަށް ނިއުމޯނިއާ ޖެހި ސީރިއަސް ވާން މަގުފަހިވާ މުޅިން އާ ވޭރިއެންޓެއް އަނެއްކާވެސް އިންޑިއާއިން ފެނިއްޖެ އެވެ.
ޕޫނާގައި ހުންނަ ނޭޝަނަލް އިންސްޓިޓިއުޓް އޮފް ވައިރޮލޮޖީގެ ދިރާސާއިން ހޯދި ކޮވިޑް ފަތުރާ ވައިރަހުގެ އާ ވޭރިއެންޓަކީ ބީ.2.28.1.1 އެވެ.
މިހާތަނަށް ހެދި ދިރާސާއިން ދައްކާ ގޮތުގައި މި ވޭރިއެންޓުގައި ބަލިވާ މީހުންނަށް ނިއުމޯނިއާ ޖެހި ހާލު ބޮޑުވެ އެވެ. އަދި ފުއްޕާމެޔަށް ބޮޑެތި ގެއްލުންތައް ލިބެ އެވެ.
އާ ވޭރިއެންޓް ދަނެގަނެވުނީ އިނގިރޭސި ވިލާތާއި ބްރެޒިލްއިން އިންޑިއާއަށް އެތެރެވި މީހުންގެ ސާމްޕަލްތައް ޓެސްޓުކޮށްގެން ކަމަށް ރިޕޯޓުތައް ބުނެ އެވެ.
އެ ސާމްޕަލްތައް ނަގާފައިވަނީ މިދިޔަ ޑިސެމްބަރު މަހު އިނގިރޭސި ވިލާތުން އެތެރެވި މީހުންނާއި ޖެނުއަރީ މަހު ބްރެޒިލްއިން އެތެރެވި މީހުންގެ ގައިންނެވެ.
މި ވޭރިއެންޓުގެ އިތުރުން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ޑެލްޓާ ވޭރިއެންޓުގެ ނަން ދީފައިވާ ބީ.617.1 ވެސް ވަނީ އިންޑިއާއިން ފެނިފަ އެވެ.
ކޮވިޑުގެ ދެ ވަނަ ރާޅުގައި އިންޑިއާގެ ހާލަތު ގޯސްވީ އެހެން ވޭރިއެންޓުތަކަށް ވުރެ 40 ޕަސެންޓު އިތުރަށް ފެތުރޭ ޑެލްޓާ ވޭރިއެންޓުގެ ސަބަބުން ކަމަށް ބެލެވެ އެވެ.
