މާލޭ ސިޓީ ކައުންސިލްގެ ޑެޕިއުޓީ މޭޔަރަކު ހޮވުމަށް ބާއްވަންޖެހޭ ޖަލްސާ މިމަހުގެ 21 ވަނަ ދުވަހު ބޭއްވުމަށް ކައުންސިލަރުންނަށް 14 ދުވަހުގެ ނޯޓިސް ދީފި އެވެ.
ލޯކަލް ގަވަމެންޓް އޮތޯރިޓީ (އެލްޖީއޭ) އިން ކައުންސިލްތަކަށް އަންގާފައިވަނީ މި މަހުގެ 20 ގެ ކުރިން މާލޭގެ ޑެޕިއުޓީ މޭޔަރާއި ރަށްރަށުގެ ކައުންސިލްގެ ނައިބު ރައީސުންގެ އިތުރުން އަންހެނުންގެ ކޮމެޓީގެ ރައީސުންނާއި ނައިބުން އިންތިހާބު ކުރުމަށެވެ.
ހުރިހާ ކައުންސިލަރުން ރަށުގައި ނެތް ނަމަ ކޮވިޑްގެ ހާލަތުގެ ސަބަބުން އިންތިހާބު ބޭއްވުމުގެ ކުރިން 14 ދުވަހުގެ ނޯޓިސްއެއް ދިނުމަށް އެލްޖީއޭން ވަނީ އަންގައިފަ އެވެ.
މާލޭ ސިޓީ ކައުންސިލުން މިދިޔަ އާދިއްތަ ދުވަހު 14 ދުވަހުގެ ނޯޓިސްދީ ކައުންސިލަރުންނަށް ފޮނުއްވި ސިޓީގައި ބުނެފައިވަނީ މިމަހުގެ 21 ވަނަ ދުވަހު ޖަލްސާއެއް ބާއްވައި ޑެޕިއުޓީ މޭޔަރު ކަނޑައަޅާނެ ކަމަށެވެ.
ޑެޕިއުޓީ މޭޔަރު އިންތިހާބު ކުރަނީ ކައުންސިލްގެ މެމްބަރުންގެ މެދުގައި ނަގާ ސިއްރު ވޯޓަކުންނެވެ.
މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން އިންތިހާބު ކޮށްފައިވާއިރު އޭގެ ތެރެއިން 12 ގޮނޑި ކާމިޔާބު ކޮށްފައިވަނީ އިދިކޮޅު ކޯލިޝަން ޕީޕީއެމް/ޕީއެންސީ އިންނެވެ. އެ ކޯލިޝަނަށް ސިޓީ ކައުންސިލްގެ މެޖޯރިޓީ ލިބިފައިވާއިރު މިހާރު އެންމެ ބޮޑު ވާދަވެރިކަމެއް އޮތީ ޑެޕިއުޓީ މޭޔަރުގެ މަގާމަށެވެ.
ޑެޕިއުޓީ މޭޔަރު ކަމަށް މިހާތަނަށް ޝައުގުވެރިކަން ފާޅުކުރައްވާފައިވަނީ ވިލިމާލެ ދާއިރާގެ މެމްބަރު ނަހުލާ އަލީ އާއި މާފަންނު ދެކުނު ދާއިރާގެ މެމްބަރު އަބްދުﷲ ނާސިރު (ހެރިންސް އައްލޮ) އާއި ހުޅުމާލެ ދާއިރާގެ މެމްބަރު ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއުގެ އިތުރުން މާފަންނު މެދު ދާއިރާގެ މެމްބަރު އަހުމަދު ނަރީޝް އެވެ.
އޭގެ ތެރެއިން ލީޑާޝިޕްގެ ބައެއް ބޭފުޅުން ޝުޖާ ހޮވަން މަސައްކަތް ކުރާއިރު އަނެއް ބައި ބޭފުޅުން ބޭނުންވަނީ ޑެޕިއުޓީ މޭޔަރަކަށް ނަރީޝް ހަމަޖެއްސުމަށެވެ. އެކަމަކު ޑެޕިއުޓީ މޭޔަރުގެ މަގާމަށް ގެންނާނެ ވަކި މީހަކު ޕާޓީން އަދި ކަނޑައެއް ނާޅަ އެވެ.
މާލެ ފިޔަވާ އެހެން ސިޓީ ކައުންސިލްތަކުގެ ޑެޕިއުޓީ މޭޔަރު ވަނީ އިންތިހާބު ކޮށްފަ އެވެ.
އާއްމުގޮތެއްގައި ކައުންސިލަރުން ހުވާ ކޮށްފައި ފުރަތަމަ ބާއްވާ ބައްދަލުވުމުގައި ޑެޕިއުޓީ މޭޔަރުންނާއި ރަށު ކައުންސިލްގެ ނައިބުން އިންތިހާބު ކުރެ އެވެ.
ނަމަވެސް ކޮވިޑުގެ ހާލަތުގެ ސަބަބުން ހުރިހާ ކައުންސިލަރުން ހަމަނުވާތީ މާލޭގެ ޑެޕިއުޓީ މޭޔަރު ކަމާއި ބައެއް ރަށްރަށުގެ ކައުންސިލްގެ ނައިބު ރައީސުން ވަނީ އިންތިހާބު ނުކޮށެވެ.
