ބަރަންކީލާ، ކޮލަމްބިއާ (ޖޫން 9) - ދެކުނު އެމެރިކާގެ ވޯލްޑް ކަޕް ކޮލިފައިންގައި ރޭ ފަހު ވަގުތު ކޮލަމްބިއާ އިން 2-2 އިން އާޖެންޓީނާއާ އެއްވަރުކުރިއިިރު، ޕެރަގުއޭ އަތުން 2-0 އިން މޮޅުވެ ބްރެޒިލުން ކޮލިފައިންގައި ސައްތަ އިން ސައްތަ ރެކޯޑް ދަމަހައްޓައިފި އެވެ.
ބްރެޒިލް އެއް ވަނައިގައި އޮތީ ކޮލިފައިންގައި މިހާތަނަށް ކުޅުނު ހަ މެޗުން ވެސް މޮޅުވެ 18 ޕޮއިންޓާ އެކު އެވެ. ކޮލިފައިން ރަނގަޅު ރޫހެއްގައި ފެށި އާޖެންޓީނާ އެންމެ ފަހުން ދެ މެޗުން ވެސް އެއްވަރުވިއިރު، އެ ޓީމު ދެ ވަނައިގައި އޮތީ 12 ޕޮއިންޓާ އެކު އެެވެ. ތިން ވަނައިގައި އޮތް އެކުއެޑޯ ވަނީ ރޭ ޕެރޫ އަތުން ބަލިވެފަ އެވެ. އެކުއެޑޯ އަށް ހަ މެޗުން ލިބިފައިވަނީ ނުވަ ޕޮއިންޓެވެ.
އާޖެންޓީނާ އިން ވަނީ ރޭގެ މެޗުގެ ފުރަތަމަ އަށް މިނިޓް ތެރޭ ދެ ގޯލު ޖަހައިފަ އެވެ. އެ ޓީމަށް ދެ ވަނަ މިނިޓްގައި ރޮޑްރީގޯ ޑެ ޕޯލް ދިން ބޯޅައަކުން ލީޑުނަގައިދިނީ ކްރިސްޓިއަން ރޮމޭރޯ އެވެ. އަދި އަށް ވަަނަ މިނިޓްގައި ނިކޮލަސް ގޮންޒާލޭޒް ތަނަވަސް ކޮށްދިން ފުރުސަތެއްގައި ލެއަންޑްރޯ ޕަރޭޑޭސް ވަނީ އާޖެންޓީނާގެ ލީޑުފުޅާކޮށްދީފަ އެވެ.
ކޮލަމްބިއާއާ ދެކޮޅަށް ކުޅުނު މެޗުގެ ތެރެއިން މެސީ ބޯޅަ ފޮނުވާލަނީ.
ދެ ވަނަ ހާފްގައި އާޖެންޓީނާ އަށް ތިން ވަނަ ގޯލެއް ޖަހައިދޭން ލިއޮނަލް މެސީ ފޮނުވާލި ހިލޭ ޖެހުން ކޮލަމްބިއާ ކީޕަރު ޑޭވިޑް އޮސްޕީނާ ވަނީ މަތަކޮށްފަ އެވެ. އަދި ފަހުން ވެސް މެސީ އަށް ހުސްކޮށް ލިބުނު ބޯޅައެއް އޮސްޕީނާ ވަނީ ސަލާމަތްކޮށްފަ އެވެ.
ފުރަތަމަ ހާފަށް ވުރެ ރަނގަޅަށް ދެ ވަނަ ހާފްގައި ކުޅުނު ކޮލަމްބިއާ އިން ފުރަތަމަ ގޯލު ޖެހީ މެޗުގެ 51 ވަނަ މިނިޓްގަ އެވެ. މި ގޯލު ޖެހީ ޕެނަލްޓީ އަކުން ލުއިސް މުރިއެލް އެވެ. އަދި އިތުރު ވަގުތުގެ ހަަތަރު ވަނަ މިނިޓްގައި ކޮލަމްބިއާ އަށް އެއްވަރު ކޮށްދިނީ ހުއާން ކުއަޑްރާޑޯ ނަގައިިދިން ބޯޅައަކުން މިހޭލް ބޯހާ އެވެ. އޭނާ މި ގޯލު ޖެހީ ބޮލުންނެވެ.
ޕެރަގުއޭ ދަނޑުގައި ބްރެޒިލުން ވަނީ މިރޭގެ މެޗުގައި ރަނގަޅު ކުޅުމެއް ދައްކައިފަ އެވެ. ބްރެޒިލަށް މެޗުގެ ކުރީކޮޅުގައި ލީޑުނަގައިދިނީ ނޭމާ އެވެ. އޭނާ ލަނޑު ޖެހީ ހަތަރު ވަނަ މިނިޓްގައި ގަބްރިއެލް ޖީސޫސް ދިން ބޯޅައަކުންނެވެ.
ބްރެޒިލުން ދެ ވަަނަ ގޯލު ޖެހީ މެޗުގެ އިތުރު ވަގުތުގަ އެވެ. މި ގޯލުގައި ވެސް ނޭމާ އިސް ދައުރެއް އަދާކުރި އެވެ. ލޫކަސް ޕަކޭޓާ މި ގޯލު ޖަހަން ފުރުސަތު ތަނަވަސްކޮށްދިނީ ނޭމާ އެވެ.
