އައްޑޫގެ ފްލައިން ސްކޫލްގައި ކިޔަވަމުން އަންނަ 15 ދަރިވަރިވަރަކު ބޭންކް އޮފް މޯލްޑިވްސް (ބީއެމްއެލް)އިން ނަގާފައިވާ ލޯނުތައް ހަޔާ އެޑިޔުކޭޝަން މިނިސްޓްރީގެ ދަށަށް ބަދަލުކޮށްފި އެވެ.
ފްލައިން ސްކޫލްގެ މެނޭޖްމަންޓުގެ ބޮޑެތި އިހުމާލުތަކެއް ފެންމަތިވެފައިވާ އިރު އެ ތަނުގައި ކިޔަވާ 178 ކުދިންނަށް ކޯސް ފުރިހަމަ ނުކުރެވި ހަތަރު އަހަރެއްހާ ދުވަސްވެއްޖެ އެވެ. ދަރިވަރުން ނަގާފައިވާ ލޯނުތައް އަނބުރާ ދެއްކުމުގައި ބޮޑެތި ދަތިތަކެއް ވަނީ ކުރިމަތިވެފަ އެވެ.
ބީއެމްއެލް މެދުވެރިކޮށް ނަގާފައިވާ ލޯނުތައް ދެއްކުމުގައި ދަރިވަރުންނަށް އުނދަގޫތަކެއް ކުރިމަތިވެފައިވާތީ އެ ލޯނުތައް ހަޔާ އެޑިޔުކޭޝަން މިނިސްޓްރީގެ ދަށަށް ބަދަލުކުރަން އެންގެވީ ރައީސް އިބްރާހިމް މުހައްމަދު ސޯލިހެވެ.
ހަޔާ އެޑިއުކޭޝަނުން މިއަދު ބުނީ އެ ލޯނުތައް ބަދަލުކުރުމުން އެއްވެސް އިންޓްރެސްޓެއް ދަރިވަރުން ދައްކަން ނުޖެހޭނެ ކަމަށެވެ. އެ ލޯންތައް އަނބުރާ ދައްކަން ޖެހެނީ ކިޔަވާ ނިމޭތާ ހަ މަސް ފަހުން ކަމަށް މިނިސްޓްރީން ބުންޏެވެ.
މީގެ ކުރިން ވެސް ކިޔަވާ ނިމޭތާ ހަ މަސް ފަހުން ލޯން ދައްކަން ޖެހޭ ގޮތަށް 96 ދަރިވަރެއްގެ ލޯނު ބަދަލުކޮށްދިން ކަމަށް މިނިސްޓްރީން ބުންޏެވެ.
ފްލައިން ސްކޫލުގައި ކިޔަވަން ބީއެމްއެލްއިން ލޯން ނަގާފައިވާ އިތުރު ދަރިވަރުންތަކެއްގެ ލޯން ވެސް މިނިސްޓްރީގެ ދަށަށް ބަދަލު ކުރުމުގެ މަސައްކަތް އަންނަނީ ކުރަމުންނެވެ. ގާތްގަނޑަކަށް 45،000 އެމެރިކާ ޑޮލަރު ދައްކައިގެން 18 މަސް ދުވަހުން ކޯސް ނިންމަން އެ ސްކޫލާ 178 ދަރިވަރަކު ގުޅުނެވެ.
އެކަމަކު އެ ސްކޫލްގެ މެނޭޖްމަންޓުގެ ބޮޑެތި އިހުމާލުތަކާ ހެދި ކޯސް ނުނިންމި ހަތަރު އަހަރެއްހާ ދުވަސް ވެފައިވާ ދަރިވަރުން ތިބިއިރު، ބޮޑެތި ލޯނުތައް ނަގައިގެން އެހެން ރަށްރަށުން ފޭދުއަށް ގޮސް ހުރުމާއި ކެއުމަށް އިތުރު ހަރަދު ކުރަންޖެހޭ ކަމުގެ ޝަކުވާ ބޮޑެވެ.
އަދި 2009 ވަނަ އަހަރުން ފެށިގެން އޮޕަރޭޓު ކުރަމުން އަންނަ ސްކޫލުގައި ގެންގުޅޭ 14 ބޯޓު ވެސް މިހާރު ހަލާކުވެފައިވާއިރު، އެ ބޯޓުތައް މަރާމާތުކުރަން ތިބި ހުރިހާ އިންޖިއަނަރުންނަށް މުސާރާ ނުދޭތީ ވަނީ އިސްތިއުފާ ދީފަ އެވެ.
އެއާއެކު، ފްލައިން އަވާސް ހަމަކޮށް، ކޯސް ފުރިހަމަ ކުރެވޭނެ ދުވަހެއް ވެސް މިހާރު ނޭނގޭކަމަށް އެ ކުދިން ބުނެ އެވެ.
މި މައްސަލައާ ގުޅޭ ގޮތުން ރައްޔިތުންގެ މަޖިލީހުން މީގެ ކުރިން ތައްޔާރު ކުރި ރިޕޯޓްގައި، ފްލައިން ސްކޫލުގެ ދަރިވަރުންގެ ހައްގުތައް ގެއްލިފައިވާތީ ދަރިވަރުންގެ މާލީ ގެއްލުމުގެ ބަދަލު ހޯދައި ދިނުމަށް ލަފާ ދީފައިވެ އެވެ.
