ވޯލްޑް ކަޕް/ އޭޝިއަން ކަޕް ކޮލިފައިންގައި މިރޭ ބަންގްލަދޭޝް ކޮޅަށް ޖެހި ދެ ގޯލާ އެކު އިންޑިއާ ގައުމީ ޓީމުގެ ކެޕްޓަން ސުނިލް ޗެތުރީ މި ވަގުތު ކުޅެމުން އަންނަ ކުޅުންތެރިންގެ ތެރެއިން ގައުމީ ޓީމަށް އެންމެ ގިނަ ގޯލު ޖަހައިދިން ކުޅުންތެރިންގެ ލިސްޓުގައި އާޖެންޓީނާގެ ތަރި ލިއޮނަލް މެސީ އާއި ޔޫއޭއީގެ އަލީ މަބްހޫތު ފަހަތަށް ޖައްސާލައިފި އެވެ.
ބަންގްލަދޭޝް އަތުން އިންޑިއާ 2-0 އިން މޮޅުވި މެޗުގައި ޗެތުރީ ވައްދާލި ދެ ގޯލާ އެކު އޭނާ ވަނީ މިހާރު ގައުމީ ޓީމަށް ޖުމްލަ 74 ގޯލު ޖަހައިފަ އެވެ. ފުރަތަމަ ގޯލު ޖެހީ އާޝިކް ކުރޫނިއަން ނަގައިދިން ހުރަހަކުން ބޮލުންނެވެ. ދެން އޭރިއާ ތެރެއިން ލިބުނު ފުރުސަތެއްގައި ގޯލުގެ މަތީ ކަަނަށް ބޯޅަ އަމާޒުކޮށްލައިގެންނެވެ.
މި ވަގުތު ގައުމީ ޓީމަށް ކުޅެމުން އަންނަ ކުޅުންތެރިންގެ ތެރެއިން އުމުރުން 36 އަހަރުގެ ޗެތުރީ އަށް ވުރެ ގިނައިން ގައުމީ ޓީމަށް ގޯލު ޖެހީ އެންމެ ކުޅުންތެރިއެކެވެ. އެއީ ޕޯޗުގީސް ތަރި ކްރިސްޓިއާނޯ ރޮނާލްޑޯ އެވެ. އޭނާ ވަނީ 103 ގޯލު ޖަހައިފަ އެވެ.
ބަންގްލަދޭޝްގެ ރިޔާދުލް (ކ) ކައިރިން ޗެތުރީ ބޯޅަ ހިފައިގެންދަނީ.
ރޮނާލްޑޯ މަސައްކަތް ކުރަމުން އަންނަނީ ގައުމީ ޓީމަށް 109 ގޯލު ޖަހައިގެން ދުނިޔޭގެ ރެކޯޑް ހަދާފައި އޮތް އީރާންގެ ކުރީގެ ފޯވާޑް އަލީ ދާއީގެ ރެކޯޑް މުގުރާލުމަށެވެ.
މި ވަގުތު ކުޅެމުން އަންނަ ކުޅުންތެރިންގެ ތެރެއިން ގައުމީ ޓީމަށް އެންމެ ގިނަ ގޯލު ޖަހައިދިން ކުޅުންތެރިންގެ ލިސްޓުގެ ތިން ވަނައިގައި އޮތީ ޔޫއޭއީ ޓީމަށް 73 ގޯލު ޖަހާފައިވާ މަބްހޫތެވެ. މެސީ ހަތަރެއްގައި އޮތި 72 ގޯލު ޖަހައިގެންނެވެ. މި މަހު ކުޅޭ ކޮޕަ އެމެރިކާ އާއި ވޯލްޑް ކަޕް ކޮލިފައިން މެޗުތަކުގައި ލަނޑު ޖަހައިގެން މެސީ އަށް ލިސްޓުގެ ކުރިއަށް އެރޭނެ އެވެ.
މި ވަގުތު ކުޅެމުން އަންނަ ކުޅުންތެރިންގެ ތެރެއިން މި ލިސްޓުގެ ކުރީގައި ދެން އުޅޭ ކުޅުންތެރިންނަށް ބަލާއިރު، ޕޮލެންޑްގެ ރޮބަޓް ލެވަންޑޯސްކީ (66)، އުރުގުއޭގެ ލުއިސް ސުއަރޭޒް (63)، ސްވިޑަންގެ ޒްލަޓާން އިބްރަހިމޮވިޗް (62)، ބެލްޖިއަމްގެ ރޮމެލޫ ލޫކާކޫ (60)، ބޮސްނިއާގެ އެޑިން ޖެކޯ (59)، ކުވޭތުގެ ބަދޭރް އަލް-މުތަވާ (56) އަދި ރާއްޖޭގެ އަލީ އަޝްފާގު - ދަގަނޑޭ (55) ހިމެނެ އެވެ.
