ރާއްޖޭގެ ހާރިޖީ ތާރީހުގައި ފުރަތަމަ ފަހަރަށް، އދ. ގެ އާއްމު މަޖިލީހުގެ ރައީސް ކަމުގެ ގޮނޑި ރާއްޖޭން ކާމިޔާބުކޮށްފި އެވެ.
އަފްގާނިސްތާނުގެ ކުރީގެ ފޮރިން މިނިސްޓަރު ޑރ. ޒަލްމާއި ރަސޫލްއާ ވާއްދަ ކުރައްވައި، ފޮރިން މިނިސްޓަރު އަބްދުﷲ ޝާހިދު ވަނީ މިރޭ އެމެރިކާގެ ނިއު ޔޯކް ގައި ހުންނަ އދ.ގެ މައި މަރުކަޒުގައި ބޭއްވި އިންތިހާބު ކާމިޔާބު ކުރައްވައިފަ އެވެ.
އދ. ގެ 193 މެމްބަރު ގައުމުތަކުގެ މެދުގައި މިރޭ ނެގުނު ސިއްރު ވޯޓުގައި، އދ. ގެ 76 ވަނަ އާއްމު މަޖިލީހުގެ ރައީސްކަމަށް ޝާހިދު އިންތިހާބުކޮށްފައިވަނީ 143 ގައުމުގެ ތާއީދާ އެކު އެވެ.
ރަސޫލްއަށް ލިބިވަޑައިގެންނެވީ 48 ވޯޓެވެ.
އިންތިހާބުގެ ކެމްޕޭނުގައި މިނިސްޓަރު ޝާހިދު އެމެރިކާގެ ނިއު ޔޯކްގައި ހުންނަވާތާ މަހަކަށް ވުރެ ގިނަ ދުވަސް ވެފައިވާއިރު، މެމްބަރު ގައުމުތަކުގެ ތާއީދު ހޯއްދަވަން ގިނަ މަސައްކަތްތަކެއް ވަނީ ކުރައްވައިފަ އެވެ.
ރާއްޖެއާ އެންމެ ގާތް ގުޅުމެއް އޮންނަ އަވަށްޓެރި އިންޑިއާއިން ޝާހިދަށް ތާއީދުކުރާނެ ކަމަށް މިދިޔަ އަހަރުގެ ތެރޭގައި އޮތީ ބުނެފަ އެވެ.
ސަރަހައްދުގެ އެންމެ ވަރުގަދަ ގައުމުގެ ތާއީދު ހޯދަން އަފްގާނިސްތާނުން މަސައްކަތް ކުރި ނަމަވެސް، އިންޑިއާއިން އޭރު ވަނީ ރާއްޖެއަށް ތާއީދުކުރާނެކަން އިއުލާނުކޮށްފަ އެވެ.
އދ. އާއްމު މަޖިލީހުގެ ރައީސުން އިންތިހާބު ކުރަނީ ދައުރުވާ އުސޫލުންނެވެ. މިގޮތުން އިންތިހާބުކުރަނީ ކޮންމެ އަހަރަކުވެސް އެފްރިކާ، އޭޝިއާ ޕެސިފިކް، އިރުމަތީ ޔޫރަޕު، ލެޓިން އެމެރިކާ، ކެރީބިއަންގެ އިތުރުން ހުޅަނގު ޔޫރަޕުގެ ގައުމުތަކުގެ ބޭފުޅެކެވެ.
މިފަހަރު ފުރުސަތު ލިބުނީ އޭޝިއާ ޕެސިފިކް ގައުމުތަކަށެވެ.
މިއީ ބައިނަލްއަގުވާމީ މައިދާނުގައި ރާއްޖެއަށް ހޯދުނު އެންމެ ބޮޑު ކާމިޔާބީ އެވެ.
އިންތިހާބު ކާމިޔާބު ކުރެއްވުމަށްފަހު ޖަލްސާގެ ބައިވެރިންނާ މުހާތަބު ކުރައްވައި، ޝާހިދު ވަނީ ތާއީދުކުރި ގައުމުތަކަށް ޝުކުރު އަދާކުރައްވައިފަ އެވެ.
އަދި އެހާ ގިނަ ގައުމުތަކުގެ ތާއީދު އޭނާއަށް ލިބިވަޑައިގެންނެވުމުން ދޭހަވަނީ، ބައިނަލްއަގުވާމީ ދުނިޔެއިން ރާއްޖެ ބަލައިގެންފައިވާ މިންވަރު ކަމަށެވެ.
ގާނޫނު ހަދާ މަޖިލީހެއް ހިންގާ އުސޫލުން އދ. ގެ އާއްމު މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމުގެ އިތުރުން، ބަހުސްތަކުގައި މެމްބަރު ގައުމުތަކަށް ވަގުތު ކަނޑައެޅުމާއި، ނިޒާމީ މައްސަލަތަކުގައި ގޮތް ނިންމުމުގެ ބާރު ވެސް ރައީސަށް ލިބިގެންވެ އެވެ.
އަދި އާއްމު މަޖިލީހަށް ހުށަހެޅޭ މައްސަލަތަކުގެ އެޖެންޑާ ކަނޑައެޅުމުގެ ޒިންމާ ވެސް އުފުލަންޖެހޭނީ އެ މަޖިލީހެއްގެ ރައީސަށެވެ.
އިންތިހާބު ކުރިން ކޮންމެ ކެންޑިޑޭޓަކު އެ ދައުރަކަށް ތަސައްވުރެއް ހުށަހަޅަންޖެހޭއިރު، އިންތިހާބުވެއްޖެނަމަ އެންމެ އިސްކަމެއް ދެއްވާނެ ފަސް ކަމެއް ޝާހިދު ވަނީ ފާހަގަކުރައްވައިފަ އެވެ.
އޭގެ ތެރޭގައި ކޮވިޑް-19ގެ ބަލިމަޑިކަމުން އަރައިގަތުމުގެ މަސައްކަތްތައް ހަރުދަނާކޮށް ގުޅިގެން ކުރިއަށް ގެންދިއުމާއި، ދެމެހެއްޓެނިވި ގޮތެއްގައި ދުނިޔެ އާރާސްތުކުރުމުމުގެ އިތުރުން މޫސުމީ ބަދަލުތަކުން ކުރިމަތިވެފައިވާ ނުރައްކާތަކުން އަރައިގަތުން ހިމެނެ އެވެ.
ޝާހިދުގެ ރައީސް ކަމުގެ ދައުރު ފެށޭނީ އަންނަ ސެޕްޓެމްބަރު މަހު އދ. އާއްމު މަޖިލީހުގެ އާ ދައުރާ އެކު އެވެ.
މި ސަރަހައްދަށް ބަލާއިރު، މީގެ ކުރިން އިންޑިއާ، ސްރީލަންކާ، ބަންގްލަދޭޝްގެ އިތުރުން އަފްގާނިސްތާނުން ވަނީ އދ. ގެ އާއްމު މަޖިލީހުގެ ރައީސްކަން ކޮށްފަ އެވެ.
