ފާއިތުވި ދެ މަސް ތެރޭ ކޮވިޑް ކޭސްތައް ދަށަށް ނުދާހާ ބޮޑަށް އިންޑިއާގައި ކޭސްތައް މަދުވެއްޖެ އެވެ.
އެގޮތުން އިއްޔެ ޕޮޒިޓިވްވެފައި ވަނީ 100،636 މީހުންނެވެ. މިއީ އޭގެ ކުރީ ދުވަހު ޕޮޒިޓިވްވި 114،460 އާ އަޅާ ބަލާއިރު 12 ޕަސެންޓުގެ ވެއްޓުމެކެވެ.
މިދިޔަ އަހަރު ކޮވިޑުގެ ބަލިމަޑުކަން ފެތުރެން ފެށި ފަހުން އިންޑިއާއިން މިހާތަނަށް ޖުމްލަ 29 މިލިއަން ކޭސް ފެނިފައި ވެ އެވެ. އެމެރިކާއަށް ފަހު ދެ ވަނައަށް އެންމެ ގިނަ ކޭސް ފެނުނީ އިންޑިއާ އިންނެވެ.
ފާއިތުވި 24 ގަޑިއިރުގެ ތެރޭގައި ކޮވިޑް ބަލީގައި މަރުވި 2،427 މީހުންނާއެކު ޖުމްލަ މަރުތަކުގެ އަދަދު ވަނީ 349،186 އަށް އަރާފަ އެވެ.
އިންޑިއާގައި މި ވަގުތު އެކްޓިވް ކޭސްތަކުގެ އަދަދަކީ 1،401،609 އެވެ. އަދި 27،159،180 މީހުން ވަނީ ބަލިން ރަނގަޅުވެފަ އެވެ.
ރިޕޯޓުތައް ބުނާ ގޮތުން އުމުރުން 12 އަހަރުން މަތީގެ ކުދިންނަށް ކޯވެކްސިން ދިނުމުގެ ޓެސްޓުތައް މިއަދު ނިއު ދިއްލީގައި ހުންނަ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އެއިމްސް) ގައި ފަށާނެ އެވެ.
ތަޖުރިބާކާރުން މިހާރު އެންމެ ކަންބޮޑުވަނީ ކޮވިޑު ތިން ވަނަ ރާޅެއްގައި ކުޑަ ކުދިންނަށް މާ ބޮޑަށް އަސަރުކޮށްފާނެތީ އެވެ. އެހެންވެ، އިންޑިއާއިން މަސައްކަތް ކުރަނީ އެހެން ބައެއް ގައުމުތައް ފަދައިން ކުދިންނަށް ވެކްސިން ދޭން ފެށުމަށެވެ.
