އިންޑިއާގައި ކޮންމެ ދުވަހަކު ފެންނަ ކޮވިޑް ކޭސްތަކަށް 68 ޕަސެންޓުގެ ވެއްޓުމެއް އައިސްފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.
ހެލްތު މިނިސްޓްރީގެ އޮފިޝަލް ލާވް އަގްރަވާލް ވިދާޅުވީ މޭ ހަތަކުން ފެށިގެން މިއަދާ ހަމައަށް ކޭސްތަކަށް ބަލާއިރު، ކޮންމެ ދުވަހަކު ވެސް 68 ޕަސެންޓުގެ ވެއްޓުމެއް ފާހަގަވާ ކަމަށެވެ.
ކޮވިޑުގެ ދެ ވަނަ ރާޅުގައި ހާލަތު ގޯސްވި އިންޑިއާގެ ކޭސްތައް ދަށަށް ދާން ފަށާފައި ވާއިރު، ހެލްތު މިނިސްޓްރީން ބުނީ އުމުރުން ދުވަސްވީ މީހުންގެ 60 ޕަސެންޓު މިހާރު ވެކްސިންގެ އެއް ޑޯޒް ޖަހައިފި ކަމަށެވެ.
ކޮވިޑުގެ ކަންކަމުގައި ސަރުކާރަށް ލަފާދޭ ޑރ. ވީކޭ ޕައުލް މިއަދު ވިދާޅުވީ އެ ގައުމުގެ 172 މިލިއަން މީހުން އެއް ޑޯޒް ޖަހާފައިވާ ކަމަށެވެ.
"ވެކްސިންގެ އެއް ޑޯޒް ޖެހި މީހުންގެ އަދަދުތަކަށް ބަލާއިރު، އަޅުގަނޑުމެން މި ވަނީ އެމެރިކާއަށް ވުރެ ކުރީގައި،" ޑރ. ޕައުލް ވިދާޅުވި އެވެ.
އިންޑިއާގައި ކޮވިޝީލްޑާއި އެ ގައުމުގެ ކުންފުންޏަކުން އުފެއްދި ކޯވެކްސިން ބޭނުން ކުރެ އެވެ. އޭގެ އިތުރުން ވެސް އިންޑިއާގެ ޒައިޑަސް ކުންފުނިން ވެސް ވަނީ ކޮވިޑަށް ވެކްސިނެއް އުފައްދާފަ އެވެ.
އެ ވެކްސިނަށް އަދި ހުއްދަ ދީފައެއް ނުވެ އެވެ. ނަމަވެސް އިންޑިއާ ސަރުކާރުން ވަނީ އެ ވެކްސިން ގިނަ އަދަދުތަކުން ގަންނަން ޕްރީއޯޑަރު ދީފަ އެވެ.
ޑރ. ޕައުލް ވިދާޅުވީ ކޯވެކްސިން އާއި ޒައިޑަސް ވެސް ކުޑަކުދިންގެ މެދުގައި ޓެސްޓުކޮށްފައިވާ ކަމަށެވެ. އެހެންކަމުން ބެލެވޭ ގޮތުގައި ބައެއް އެހެން ގައުމުތައް ފަދައިން 12 އަހަރުން މަތީގެ ކުދިންނަށް ވެކްސިން ދިނުމަށް އިންޑިއާއިން ދަނީ ތައްޔާރުވަމުންނެވެ.
