މީގެ ފަސް ދުވަސް ކުރިން ގައުމީ ޓީމާ އެކު ދުބާއީ ޓްރެއިނިން ކޭމްޕްގެ ތެރެއިން ކޮވިޑް-19 އަށް ޕޮޒިޓިވްވި ގައުމީ ޓީމުގެ ތަރި އަލީ އަޝްފާގު (ދަގަނޑޭ) އެންމެ ފަހުން ކުރި ޓެސްޓް ނެެގެޓިވުމުން އޭނާ ޓީމާ ގުޅުމުގެ ފުރުސަތު ލިބިއްޖެ އެވެ.
"އަދަދު" އަށް އެނގިފައިވާ ގޮތުގައި މިރޭ ކޮލިފައިންގައި ސީރިއާއާ ދެކޮޅަށް ކުޅޭ މެޗަށް ފަހު ދަގަނޑޭ ގައުމީ ޓީމުގެ ފަރިތަކުރުންތަކާ ގުޅޭނެ އެވެ. މިއީ އަންނަ ހަފްތާގެ ހުކުރު ދުވަހު ޗައިނާއާ ދެކޮޅަށް ކުޅޭ މެޗާއި މި މަހު 15 ގައި ފިލިޕީންސާ ބައްދަލުކުރާ މެޗަށް ނުކުތުމުގެ ކުރިން ގައުމީ ކޯޗު މާޓިން ކޫޕްމަން އަށް ލިބޭނެ ހިތްހަމަ ޖެހުމެކެވެ.
އުމުރުން 35 އަހަރުގެ ދަގަނޑޭ ޕޮޒިޓިވްވީ މިދިޔަ ހަފްތާގެ ހޮނިހިރު ދުވަހު ކުރި ޓެސްޓްތަކުން ކޮވިޑަށް ޕޮޒިޓިވްވެ މި ފަހަރު ކޮލިފައިންގައި ނުކުޅެވޭނެ ކަމަށް ބެލެވުނެވެ. އޭރު ދަގަނޑޭގެ އިތުރުން ގައުމީ ޓީމުގެ ޑިފެންޑަރު އަލީ ޝާމިސް (ތޮއްޕެ) ވެސް ޕޮޒިޓިވްވެ އައިސޮލޭޝަނަށް ދާން ޖެހުނެވެ.
ދަގަނޑޭ އާއި ތޮއްޕޭ ޕޮޒިޓިވްވީ މިިދިޔަ އާދިއްތަ ދުވަހު ވޯލްޑް ކަޕް/ އޭޝިއަން ކަޕް މެޗުތައް ކުޅެން ދުބާއީ މަގުން ޗައިނާ އަށް ދިއުމުގެ ކުރިން ކުރި ޓެސްޓްތަކުންނެވެ. އޭގެ ފަހުން ޗައިނާ ސަރުކާރުން ރާއްޖެ އާއި ސީރިއާ އަދި ފިލިޕީންސްގެ ކުޅުންތެރިން ޗައިނާ އަށް އެތެރެވުމުގެ ހުއްދަދޭން ދެކޮޅު ހެދި މައްސަލައިގައި ހައްލެއް ނުލިބި އެންމެ ފަހުން މެޗުތައް ކުޅެން ނިންމީ ދުބާއީގަ އެވެ.
މެޗު ކުޅުމުގެ ކުރިން ކުޅުންތެރިން ކޮވިޑް ޓެސްޓް ހަދާނެ އެވެ. ދަގަނޑޭ އާއި ތޮއްޕޭ ޓީމާ ވަކިން އައިސޮލޭޝަނުގައި ހުރި ނަމަވެސް އެ ދެ ކުޅުންތެރިންގެ ކޮވިޑް ޓެސްޓެއް ކުރަން ޓީމުން ނިންމައި ކުރި ޓެސްޓްތަކުން ދަގަނޑޭ ނެގެޓިވްވި ނަމަވެސް ތޮއްޕޭ އަދިވެސް ޕޮޒިޓިވް އެވެ.
މިދިޔަ މަހު ގައުމީ ޓީމު މާލޭގައި ހޮޓެލް ޖެންގައި ކޭމްޕް ޖަހާފައިވަނިކޮށް ދަގަނޑޭގެ އަންހެނުން ޕޮޒިޓިވްވެގެން އޭނާއާ ކޮންޓެކްޓްވެފައިވާތީ ޕްރޮޓޮކޯލްގެ ތެެރެއިން ދަގަނޑޭ އައިސޮލޭޝަނަށް ދާން ޖެހުނެވެ. އެކަމަކު އައިސޮލޭޓްވުމަށް ފަހު އޭގެ ފަހުން ޕީސީއާރް ޓެސްޓްތަކެއް ކޮށް ނެގެޓިވް ކަމަށް ދެއްކުމުން ދަގަނޑޭ ވަނީ އަލުން ޓްރެއިނިން ކޭމްޕާ ގުޅިފަ އެވެ.
ޓީމާ އެކު ދުބާއީ އަށް އައިސް އެންމެ ފުރަތަމަ ދަގަނޑޭ ވެސް ހިމެނޭ ގޮތަށް ހުރިހާ ކުޅުންތެރިން ކޮވިޑަށް ޓެސްޓްކުރި އެވެ. އެ ފަހުން ޕްރެކްޓިސްތަކުގައި ކުޅުންތެރިން ބައިވެރިވީ ޓެސްޓްތައް ނެގެޓިވްވުމުންނެވެ.
ގައުމީ ޓީމުން ދުބާއީ އަށް ޓްރެއިނިން ކޭމްޕަށް ދިޔައިރު، ޓީމު ދިޔައީ ތޮއްޕޭ އާއި އަލީ ޝަމާލް އަބްދުﷲ (ޝަންމު) ނުލަ އެވެ. އެއީ އޭރު ތޮއްޕޭ ކޮވިޑަށް ޕޮޒިޓިވްވެ 14 ދުވަސް ހަމަވެފައިނުވާތީ އެ މުއްދަތު ހަމަވެފައި ޓެސްޓް ކޮށްގެން ފުރުމަށާއި ޝަމާލްގެ ވިސާ ކަންތައްތައް އެއްކޮށް ހަމަނުޖެހޭތީ އެވެ.
ތޮއްޕޭ އާއި ޝަންމު ދުބާއީ އަށް ދިޔައީ ގައުމީ ޓީމު ދިޔަތާ ދެ ދުވަސް ފަހުންނެވެ. ދުބާއީ އަށް ގޮސް ގައުމީ ޓީމާ އެކު ޓްރެއިނިންގައި ބައިވެރިވީ ވެސް ޓެސްޓްކޮށްފަ އެވެ. އެކަމަކު ފަހުން ތޮއްޕޭ ކުރި ދެ ޓެސްޓުން ވެސް މި ވަނީ ނެގެޓިވްވެފަ އެވެ.
ކޮވިޑަށް ޕޮޒިޓިވްވުމުން މި ފަހަރު ގައުމީ ޓީމުގެ ސްކޮޑުގައި ހިމެނުނު ނަމަވެސް ސްކޮޑާ އެކު ނުދެވުނު ކުޅުންތެރިންގެ ތެރޭގައި އިސްމާއިލް އީސާ (މެސީ)، ހަސަން ރާއިފް (ހަންނަ)، ޔަސްފާދު ހަބީބު (މުލަކޭ) އަދި އަބްދުﷲ ޔާމީން (ޔާން) ހިމެނެ އެވެ. ކޮވިޑުން ރަނގަޅުވެގެން ގައުމީ ޓީމާ ގުޅުނު ކުޅުންތެރިންނަކީ މާޒިޔާގެ ހަމްޒާ މުހައްމަދު (ހަމްޕު) އާއި ހުސެއިން ނިހާން (ނިހާޓް) އެވެ. އަދި އެ ލިސްޓަށް މިއަދު ދަގަނޑޭ އިތުރުވީ އެވެ.
