ގާހިރާ، މިސްރު (ޖޫން 3) - އަންނަ މަހު ޓޯކިޔޯގައި ފަށަން ނިންމާފައިވާ އޮލިމްޕިކްސްގެ ފުޓްބޯޅަ އިވެންޓުގައި ވާދަކުރާ މިސްރު ޓީމުގައި ހިމެނިގެން ލިވަޕޫލްގެ މުހައްމަދު ސަލާހު އެ މުބާރާތުގައި ކުޅެން ބޭނުންވާ ކަމަށް މިސްރުގެ ކޯޗު މިސްރުގެ ކޯޗު ޝައުކީ ގާރިބް ބުނެފި އެވެ.
އޮލިމްޕިކްސްގައި ވާދަކުރަނީ 23 އަހަރުން ދަށުގެ ޓީމެވެ. އެކަމަކު އެ މުބާރާތުގެ ގަވާއިދު އޮންނަ ގޮތުން 23 އަހަރުން މަތީ ތިން ކުޅުންތެރިންނަށް ކުޅެވެ އެވެ. ސަލާހުގެ ނަން މިސްރު ޓީމުގައި ހިމަނަނީ ދޮށީ ކުޅުންތެރިންނަށް ލިބޭ ޖާގައިގެ ތެރެެއިންނެވެ.
އޮލިމްޕިކްސް އަކީ ފީފާގެ ރަސްމީ މުބާރާތަކަށް ނުވާތީ އެ އިވެންޓުގައި ބައިވެރިވާން ގައުމީ ޓީމަށް ކުޅުންތެރިން ރިލީސްކުރުމުގެ އިހުތިޔާރު އޮންނަނީ ކްލަބަށް ދޫކޮށްލައިފަ އެވެ. މީގެ ކުރިން ވެސް ލިވަޕޫލާއި މިސްރު ޓީމާ ދެމެދު ވަނީ ސަލާހު ލައްވައި އޮލިމްޕިކްސްގައި ކުޅުވަން މިސްރުގެ ފުޓްބޯޅަ ފެޑެރޭޝަނުން ބާރުއަޅާތީ ހިޔާލުތަފާތުވުންތަކެއް އުފެދިފަ އެވެ.
މިސްރު ޓީވީ އަކަށް ގާރިބް ދިން އިންޓަވިއުއެއްގައި ބުނީ ސަލާހުގެ ހުއްދަ ހޯދައިގެން އޮލިމްޕިކްސްގައި އޭނާ ކުޅުވަން ލިވަޕޫލާ މަޝްވަރާ ކުރަމުން އަންނަ ކަމަށެވެ.
"ސަލާހު އޮލިމްޕިކްސްގައި ކުޅެން ބޭނުންވާކަން އަހަރެމެން ގާތުގައި ބުނެފައިވާތީ އަހަރެމެން މިހާރު އެކަން ލިވަޕޫލްގެ ސަމާލުކަމަށް ގެނެސްފިން. ލިވަޕޫލަށް ވާނީ ރަސްމީކޮށް ސިޓީއެއް ވެސް ފޮނުވާފައި. ވަރަށް އަވަހަށް ގޮތެއް ނިމިގެންދާނެ،" ގާރިބް ވިދާޅުވި އެވެ.
ޕްރިމިއާ ލީގުގެ މިދިޔަ ސީޒަނުގައި ލިވަޕޫލް ކުޅުނު ފަހު މެޗުގެ ތެރެއިން ސަލާހު އަންނަ ސީޒަނުގެ ޖޯޒީގައި.
ލިވަޕޫލުން ސަލާހު ދޫނުކުރަން އުޅޭ ސަބަބަކީ އޮލިމްޕިކްސް އަށް ގޮސްފިނަަމަ އޭނާ އަށް ލިވަޕޫލްގެ ޕްރީ ސީޒަނާއި އަންނަ ސީޒަނުގެ ފުރަތަމަ މެޗުތައް ގެއްލިދާނެތީ އެވެ. ޕްރިމިއާ ލީގު ފަށަން ނިންމާފައިވަނީ އޮގަސްޓް 14 ގަ އެވެ. އޮލިމްޕިކްސް މި ވަގުތު ތާވަލުކޮށްފައި އޮތީ އަންނަ މަހުގެ 23 އިން އޮގަސްޓް އަށަކަށެވެ.
ކުޅުންތެރިންގެ ހައްގުގައި މަސައްކަތްކުރާ ޖަމިއްޔާ ފިފްޕްރޯ އިން ހަދާފައިވާ ގަވާއިދު ބުނާގޮތުން އޮފް ސީޒަނުގައި (ޖޫން/ޖުލައި) ކުޅުންތެރިއަކު ބައިނަލްއަގުވާމީ މުބާރާތެއްގައި ކުޅެފިނަމަ އެ މުބާރާތުގައި އެ ކުޅުންތެރިއަކު ކުޅޭ ފަހު މެޗަށް ފަހު ތިން ހަފްތާގެ ރެސްޓެއް އޭނާ އަށް ލިބެން ޖެހެ އެވެ. އެއީ ކުޅުންތެރިންގެ ސިއްހަތަށް ވިސްނައި ފިފްޕްރޯ އިން ހަދާފައިވާ އުސޫލެކެވެ. އެކަމަކު އެ ތިން ހަފްތާގެ މުއްދަތު ކުރުކޮށްލުމުގެ އިހުތިޔާރު ކުޅުންތެރިންނަށް އޮވެ އެވެ.
އަންގާރަ ދުވަހު މިސްރުން ވަނީ ދެ ހަފްތާގެ ޓްރެއިނިން ކޭމްޕެއް ފަށައިފަ އެވެ. މިސްރުގެ އޮލިމްޕިކްސް ޓީމުގައި ހިމެނޭ ކުޅުންތެރިންނާ އުމުރުން 28 އަހަރުގެ ސަލާހު ވަނީ ބައްދަލުކޮށްފަ އެވެ. މިސްރުން އޮލިމްޕިކްސް އަށް ސްކޮޑު ފައިނަލް ކުރާނީ މި މަހު 22 ވަނަ ދުވަހު އެވެ. ސަލާހު ވަނީ 2012 ވަނަ އަހަރުގެ ލަންޑަން އޮލިމްޕިކްސްގައި ކުޅެފަ އެވެ. އެއީ އޭނާގެ އުމުރުން 20 އަހަރުގަ އެވެ.
ޖަޕާނުގައި ކޮވިޑް-19ގެ ހާލަތު އޮތްގޮތުން މި ފަހަރުގެ އޮލިމްޕިކްސް އެ ގައުމުގައި ބޭއްވިދާނެތޯ އަދިވެސް އޮތީ ސުވާލު އުފެދިފަ އެވެ. ޖަޕާނުގެ ގިނަ އާންމު ރައްޔިތުންނާއި ސިއްހީ ތަޖުރިބާކާރުން އަންނަނީ އެ ގައުމުގައި އޮލިމްޕިކްސް ހޯސްޓްކުރުމާ ދެކޮޅަށް އަޑުއުފުލަމުންނެވެ.
