ފެމެލީ ކޯޓުގެ ގާޒީ ހުޒައިފާ މުހައްމަދުގެ މައްޗަށް ހުށަހެޅި ސުލޫކީ މައްސަލަ ސާބިތު ނުވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)ން ނިންމައިފި އެވެ.
މިގޮތަށް ޖޭއެސްސީން ނިންމާފައިވަނީ އޭނާއާ ދެކޮޅަށް ހުށަހެޅި ޝަކުވާ ތަހުގީގު ހިންގުމަށްފަހު މިދިޔަ ބުދަ ދުވަހު އެވެ.
އެނގިފައިވާ ގޮތުގައި، ގާޒީ ހުޒައިފާއާ ދެކޮޅަށް ސާބިތު ނުވާ ކަމަށް ނިންމި ސުލޫކީ މައްސަލައަކީ ފެމެލީ ކޯޓަށް ހުށަހެޅި މައްސަލައެއްގައި ހިމެނޭ ލިޔެކިޔުންތަކެއް މަސްލަހަތު ހިމެނޭ މީހަކާ ހިއްސާ ކުރި ކަމުގެ ޝަކުވާއެކެވެ.
މީގެކުރިން ވެސް ގާޒީ ހުޒައިފާއާ ގުޅޭ ސުލޫކީ މައްސަލައެއް ޖޭއެސްސީއަށް ހުށަހެޅި އެވެ. އެ މައްސަލަ އޭނާއާ ދެކޮޅަށް ހުށަހެޅީ ފެމެލީ ކޯޓުން ވަކިކުރި މުވައްޒަފެކެވެ. މައްސަލަ ހުށަހެޅީ، އެ މުވައްޒަފުގެ ޖިންސީ ފުރައްސާރައިގެ މައްސަލައެއް ފެމެލީ ކޯޓުން ބަލަން ފަށާފައި އޮތްވަ އެވެ.
ޖޭއެސްސީން ނިންމީ އެ ސުލޫކީ މައްސަލައަކީ އެއްވެސް އަސާސެއް ނެތް މައްސަލައެއް ކަމަށެވެ. އެހެންވެ، އެ މައްސަލާގެ ތަހުގީގު ވެސް ނުހިންގަ އެވެ.
