މިދިޔަ އަހަރުގެ މާޗް މަހުން ފެށިގެން މި ވޭތުވެދިޔަ 15 ވަރަކަށް މަސް ދުވަހުގެ ތެރޭގައި ރާއްޖޭގެ ފުޓްބޯޅަ ކުޅުންތެރިއަކަށް އެންމެ ގިނަވެގެން ވެސް ކުޅެވޭނީ ވާދަވެރި 15 މެޗެވެ. އެއީ މި ފަހަރުގެ ދިރާގު ދިވެހި ޕްރިމިއާ ލީގުގެ 14 މެޗާއި އޭއެފްސީ ކަޕްގެ ކޮލިފައިންގައި އީގަލްސް ކުޅުނު މެޗާ އެކު ޖުމްލަ 15 މެޗެވެ.
އެ ވިސްނުމުގައި ބަލާއިރު ވެސް ފިޓްނަސް ލެވަލް އެންމެ މަތީގައި ބަހައްޓައިގެން މި ހުކުރު ދުވަހު ފަށާ ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިން މެޗުތަކުގައި ޕާފޯމްކުރަން ބަލާއިރު, ގައުމީ ޓީމަށް ހުންނާނެ ގޮންޖެހުން އިހުސާސް ކުރެވޭނެ އެވެ. އެ ޗެލެންޖް ނަގައި އެ ޒިންމާއާ ހަވާލުވެ، ހުރީ ދާދި ފަހުން ގައުމީ ޓީމުގެ ފިޓްނަސް ކޯޗަކަށް ގެނައި ނެދަލެންޑްސްގެ ގާހާޑް ވާމިންކް އެވެ.
ޔޫރަޕްގެ ފުޓްބޯޅައިގައި ފެންވަރު ރަނގަޅު ޒުވާން ކުޅުންތެރިން ޓްރެއިން ކުރުމުގެ ރަނގަޅު ރެކޯޑެއް އޮތް ނެދަލެންޑްސްގެ ފުޓްބޯޅައިގައި ވާމިންކް ވަނީ ގިނަ މަސައްކަތްތަކެއް ކޮށްފަ އެވެ. އެކަމަކު އޭނާ ރާއްޖޭގެ ގައުމީ ޓީމާ ހަވާލުވެ، ފުރަތަމަ ކުރަން ޖެހުނު ތަޖުރިބާ އަކީ ހޮޓަލެއްގައި ތާށިވެ ތިބި ކުޅުންތެރިންތަކެއް ޓްރެއިން ކުރުމެވެ. މާލޭގައި މިދިޔަ މަހު ގައުމީ ޓީމު ހަފްތާއެއްހާ ދުވަހު ހޮޓެލް ޖެންގައި ތިބިއިރު، ޓްރެއިނިންތައް ގެންދިޔައީ ވާމިންކްގެ ޕްލޭނަކާ އެއްގޮތަށް ޖެންގެ ބޯލްރޫމުގަ އެވެ. އެ ކަންބޮޑުވުންތަކަށް ހައްލެއް ލިބުނީ މިދިޔަ މަހު 22 ވަނަ ދުވަހު ދުބާއީ އަށް ގޮސް އެ ގައުމުގައި ގައުމީ ޓީމުން ޓްރެއިނިންތައް ފެށި ހިސާބުންނެވެ.
"މިއީ ވަރަށް ބޮޑު ޗެލެންޖެއް. ފުރަތަމަ ހޮޓަލެއްގައި އަހަރެމެން ޓްރެއިނިން ގެންދިޔައީ. ނަސީބަކުން މިހާރު ޕިޗްގައި (ދަނޑެއްގައި) ޓްރެއިނިން އެބަކޮށްލެވޭ އެކަމަކު އެ ވަރަކުން ވެސް ހިތްހަމަޖެހޭ ގޮތަކަށް ނޫން އޮތީކީ. ކުރަން ހުރި މަސައްކަތް ގިނަ،" ޓްރެއިނިން ކޭމްޕްގެ ތެރެއިން ދިން އިންޓަވިއުއެއްގައި ވާމިންކް ބުންޏެވެ.
މީގެ ކުރިން ރިކީ ހާބަޓް ގައުމީ ޓީމަށް ކޯޗުކޮށްދިންއިރާއި ޕީޓަ ސެގާޓް ގައުމީ ޓީމު ގޮވައިގެން މަސައްކަތްކުރިއިރު، ފިޓްނަސް ކޯޗުން ގެންގުޅުނެވެ. އަދި ރާއްޖޭގެ ކްލަބްތަކުގައި ވެސް މި ސީޒަނުގައި އަންނަނީ ފިޓްނަސް ކޯޗުންގެ އެހީތެރިކަން ހޯދަމުންނެވެ. ރާއްޖެ ގެންނަ ފިޓްނަސް ކޯޗުންގެ އެންމެ ބޮޑު ޒިންމާ އަކަށް ވެފައި އޮތީ ގާތްގާތުގައި ކުޅެން ޖެހޭ މެޗުތަކަށް ކުޅުންތެރިން ރަނގަޅު ލެވަލެއްގައި ފިޓްކޮށް ބެހެއްޓުމެވެ.
ގައުމީ ޓީމުގެ ޓްރެއިނިންއެއްގެ ތެރެއިން ވާމިންކް (ކ) އާއި ކެޕްޓަން އަކުރަމް އަބްދުލްގަނީ.-- ފޮޓޯ: އިބްރާހިމް ފާއިދު/ އެފްއޭއެމް
ގައުމީ ޓީމު ގޮވައިގެން އެ މަސައްކަތާ ހަވާލުވެ، ވާމިންކް އަދާކުރަން ޖެހުނު ޒިންމާ އަކީ ފަހެއް ނޫނީ ހަ ވަރަކަށް ހަފްތާ އެއްވެސް މެޗު ފިޓްނަސްގެ ކަމެއް ނުކުރެވި ކުޅުމާ ދުރުގައި ތިބި ގިނަ ކުޅުންތެރިންތަކެއް 11 ދުވަހުގެ ތެރޭގައި އޭޝިއާ ފުޓްބޯޅައިގެ ގަދަ ތިން ޓީމަކާ ކުޅެވޭނެ ރަނގަޅު ލެވަލަކަށް ގެނައުމެވެ. އެކަން އޭނާ އަށް ކުރެވެން އޮތީ ކުޅުންތެރިންގެ އެއްބާރުލުން ވަރަށް ބޮޑަށް ލިބިގެންނެވެ. މިހާތަނަށް ލިބޭ ސަޕޯޓާ މެދު އޭނާ ހުރީ ހިތްހަމަޖެހިފަ އެވެ.
"އަހަންނަށް ނެތް މާ ސްލޯ ކޮށްވެސް ދެވެން. އެއީ މެޗުތައް މި އޮތީ ވަރަށް ކައިރީގައި. އަހަންނަށް ވަރަށް އަވަސް އަރުވާލައިގެން ވެސް ކަންތައްތައް ނުގެންދެވޭނެ. އެއީ އަވަސް ކޮށްލައިގެން ކުރާ ކަމަކުން މެޗު ނުކުޅެ ތިއްބައި ދެވޭ ލޯޑެއްގެ ސަބަބުން މި ކުޅުންތެރިންނަށް އަނިޔާވެދާނެ. ތައްޔާރުމިވަނީ ފަސޭހަ ކަމަކަށް ނޫން. އުނދަގޫ ކަމަކަށް ވިޔަސް މި ކުޅުންތެރިން ކުރާ ހިތްވަރަށް ތައުރީފުކުރަން ބޭނުން. އަހަރެން އިތުބާރުކުރަން އެ ކުޅުންތެރިން އެކުރާ މަސައްކަތަަށް،" ވާމިންކް ބުންޏެވެ.
ކުރެވޭނެ ކަމަށް ބަލައިގެން އިތުބާރު ކޮށްގެން މަސައްކަތް ކުރުން އޮތީ. ޓީމުން ފެންނަނީ އެ ރޫހު - ވާމިންކް
ވާމިންކް ބުނީ ކޮންމެ ޓްރެއިނިން ދުވަހަކަށް ފަހު ވެސް ކުޅުންތެރިންނާ ވާހަކަ ދައްކައި އެ ކުޅުންތެރިންގެ ހާލަތު ދެނެގަނެ މައުލޫމާތު އެއްކުރާ ކަމަށެވެ. އޭގެ ސަބަބުން އެކި ކުޅުންތެރިންނަށް ވަކިވަކިން ފޯކަސް ކޮށްގެން ވެސް މަސައްކަތްކުރަން ފަސޭހަވާކަމަށް ވާމިންކް ބުންޏެވެ. އަދި ކުޅުންތެރިންގެ ފަރާތުން ލިބޭ މައުލޫމާތުތަކަށް ބަލައި އެ ކުޅުންތެރިންގެ ފިޓްނަސް މައްޗަށް ޖައްސަން ކުރަން ޖެހޭ މަސައްކަތް ވަރަށް ރަނގަޅަށް އެނގޭތީ ކުރަން ހުރި ބައެއް ކަންކަމަށް ލުޔެއް ލިބޭކަން ވާމިންކް ފާހަގަކުރި އެވެ.
"ބައެއް ކުޅުންތެރިން އެބަހުރި ފިޒިކަލީ ރަނގަޅަށް ވެސް. އެއީ މެޗުތަކެއް ފަހުން ކުޅެފައި ނޫނީ ޓްރެއިން ކޮށްފައި ހުރީމަ. ދެން ތިބި ކުޅުންތެރިން ތަންކޮޅެއް ފަހަތުގައި ވެސް އެބަތިބި ފިޓްނަސް ލެވަލްގައި ބަލާއިރު. އެކަމަކު ވަގުތު ނަގައިގެން އެ ކުޅުންތެރިން ރަނގަޅުކުރެވޭނެ،" ނެދަލެންޑްސްގެ ފުޓްބޯޅަ ފެޑެރޭޝަނާ ގުޅިގެން ވެސް ގިނަ މަސައްކަތްތަކެއް ކޮށްފައިވާ ވާމިންކް ބުންޏެވެ.
ވާމިންކް ބުނީ ހަގީގަތުގައި ގައުމީ ކޯޗު މާޓިން ކޫޕްމަން އަށް ވެސް މީގެ މެޗުތައް ހުރި ގޮތުން ގޮންޖެހުންތަކެއް ހުންނާނެ ކަމަށެވެ. އެކަމަކު ޕެންޑަމިކެއްގެ ތެރޭގައި އުޅޭއިރު ކަންކަން ކުރަން ޖެހޭނީ ހާލަތުތަންދޭ ގޮތަކުން ކަމަށް ވެސް ގަބޫލުކުރަން ޖެހޭކަމަށް ވާމިންކް ގަބޫލުކުރެ އެެވެ.
ކޮލިފައިންގެ ގްރޫޕް އޭގެ ފަހު މެޗުތައް ސެންޓްރަލައިޒްކޮށް ޗައިނާގައި މިހާރު ބޭއްވޭނެ ގޮތެއް ނުވުމުން އެ މެޗުތައް ވަނީ ދުބާއީ އަށް ބަދަލުކޮށްފަ އެވެ. ރާއްޖެ ކުޅެން ޖެހޭ ފުރަތަމަ މެޗުގައި އަންނަ ހުކުރު ދުވަހު ނުކުންނާނީ ސީރިއާއާ ދެކޮޅަށެވެ.
އެންމެ ފުރަތަމަ ޝެޑިއުލްގައި އޮތްގޮތުން ރާއްޖެ އާއި ޗައިނާ މެޗު އޮތީ މާދަމާ ކުޅޭގޮތަށެވެ. އެކަަމަކު ޓެސްޓްތައް ކޮށްގެން ދުބާއީ އަށް އައިސް ކުރު މުއްދަތެއްގައި ތައްޔާރުވާން ޖެހޭނެތީ ޗައިނާ އަށް އެ މެޗު މާދަމާ ކުޅެވޭނެ ގޮތެއް ނެތެވެ. އެހެންވެ އޭއެފްސީން ޝެޑިއުލް ހެދިއިރު ނިންމީ ދުބާއީގައި ތިބި ރާއްޖެ އާއި ސީރިއާ މެޗު ހުކުރު ދުވަހަށް ޝެޑިއުލްކުރާށެވެ. ކުރިން އެ މެޗު ކުޅެން އޮތީ މި މަހު ހަތް ވަނަ ދުވަހު އެވެ. މިއީ ހަގީގަތުގައި ރާއްޖޭގެ ހޯމް މެޗެކެވެ.
ޝެޑިއުލަށް ގެނެވުނު ބަދަލާ އެކު މި މަހު 11 ވަނަ ދުވަހު ކުޅޭނީ ޗައިނާ އާއި ރާއްޖޭގެ މެޗެވެ. ރާއްޖެ ކޮލިފައިންގައި ކުޅޭ ފަހު މެޗު އޮންނާނީ މި މަހު 15 ވަނަ ދުވަހު ފިިލިޕީންސާ ދެކޮޅަށެވެ.
ގައުމީ ކޯޗު ކޫޕްމަން ވަނީ ޝެޑިއުލަށް މިއައި ބަދަލުގެ ސަބަބުން މާދަމާ މެޗެއް ކުޅެން ނެތުމުން އެކަމާ ހިތްހަމަޖެހުން ފާޅުކޮށްފަ އެވެ. އަދި އެ ގޮތަށް ކަންތައްތައް ކޮށްދެން އެފްއޭއެމްގެ ރައީސް ބައްސާމް އަދީލް ޖަލީލް ކުރެއްވި މަސައްކަތަށް ޝުކުރު އަދާކުރި އެވެ.
ގައުމީ ޓީމާ މިދިޔަ އަހަރުގެ ޖެނުއަރީގައި ހަވާލުވި ފަހުން ކޫޕްމަން އަދި ޓީމު ގޮވައިގެން މެޗަކަށް ނުނިކުމެ އެވެ. ކޫޕްމަންގެ ކޯޗުކަމުގައި ގައުމީ ޓީމު ކުޅޭ ފުރަތަމަ މެޗުގައި މިހާރު އޮތްގޮތުން ބައްދަލުކުރާނީ ސީރިއާއާ އެވެ. ރާއްޖެ ވަނީ 2019 ވަނަ އަހަރު ސެޕްޓެމްބަރު މަހު ސީރިއާ އަތުން 2-1 އިން ބަލިވެފަ އެވެ. އެ މެޗުގައި ރާއްޖޭގެ ގޯލު ޖެހި އަލީ އަޝްފާގު (ދަގަނޑޭ) މި ވަގުތު ހުރީ ކޮވިޑަށް ޕޮޒިޓިވްވުމުން އައިސޮލޭޝަނުގަ އެެވެ.
