އެކިއެކި ލިޔުންތަކުގައި މިހާރު ޖަހަމުންދާ ރެވެނިއު ސްޓޭމްޕް ޖެހުން ހުއްޓާލަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލު ފާސްކުރަން އެ ބިލު ދިރާސާކުރި މުޅި މަޖިލީހުގެ ކޮމިޓީން ނިންމައިފި އެވެ.
ރެވެެނިއު ސްޓޭމްޕް ޖެހުމަށް 1970 ވަނަ އަހަރުން ފެށިގެން އަމަލުކުރަމުންދާ ގާނޫނު އުވާލަން ސަރުކާރުގެ ފަރާތުން ހުށަހެޅުއްވީ މެދު ހެންވޭރު ދާއިރާގެ މެމްބަރު އަދި މެޖޯރިޓީ ލީޑަރު އަލީ އާޒިމް އެވެ.
އެ ބިލުގައި ބުނެފައިވަނީ ރެވެނިއު ސްޓޭމްޕް ޖެހުމުގެ ނިޒާމު ހިންގުމަށްޓަކައި ހިނގާ ހަރަދަށް ބަލާއިރު ލިބޭ އާމްދަނީ އަކީ އެކަށީގެންވާ އާމްދަނީއެއް ނޫން ކަމަށެވެ.
އަދި ސްޓޭމްޕުން ލިބޭ ފައިސާއަކީ ދައުލަތުން ފޯރުކޮށްދޭ ހިދުމަތްތަކުން ނަގާ ފީއާއި އެނޫންވެސް ފައިސާގެ ތެރެއިން ހަމަޖެއްސޭނެ އާމްދަނީ އެއް ކަމަށް އޭނާ ވިދާޅުވި އެވެ.
އެކަމުގެ ސަބަބުން ހިދުމަތްތައް ހޯދައި ފަރާތްތަކަށް އިތުރު ދަތިތަކާ ކުރިމަތިލާންޖެހޭ ކަމަށް އެ ބިލުގައި ބުނެފައިވެ އެވެ.
އާޒިމް ހުށަހެޅުއްވި އެ ބިލުގައި ރެވެނިއު ސްޓޭމްޕްގެ ނިޒާމު އުވާލައިގެން ދައުލަތުގެ އާމްދަނީއަށް ކުރާނެ އަސަރު ވެސް ހިމަނާފައިވެ އެވެ.
އެގޮތުން، ފާއިތުވި ދެ އަހަރުގެ ހިސާބުތަކަށް ބަލާއިރު، ސްޓޭމްޕް ވިއްކައިގެން 2019 ވަނަ އަހަރު ދައުލަތަށް 17.5 މިލިއަން ރުފިޔާ ލިބިފައިވާއިރު، މިދިޔަ އަހަރު އެ އަދަދު އުޅެނީ 3.9 މިލިއަން ރުފިޔާގަ އެވެ.
އަދި މިއަހަރު 3.7 މިލިއަން ރުފިޔާ ލިބޭނެ ކަމަށް އަންދާޒާކޮށްފައިވާއިރު، ސްޓޭމްޕް ޕްރިންޓުކުރަން 547،228 ރުފިޔާ ހޭދަވި ކަމަށް ބުނެފައިވެ އެވެ.
ގާނޫނު އުވާލާއިރު، މިވަގުތު ޕްރިންޓްކޮށްފައިހުރި ސްޓޭމްޕްގެ އަދަދުތައް ވެސް އެ ބިލުގައި ހިމަނާފައިވެ އެވެ.
އެގޮތުން، 10 ލާރީގެ ސްޓޭމްޕުން ފެށިގެން 10،000ރ. އާ ހަމައަށް ރާއްޖޭން ތަފާތު އަގުތަކުގެ ޖުމްލަ 13 ސްޓޭމްޕެއް ޕްރިންޓްކޮށްފައިވާއިރު، މިދިޔަ އަހަރުގެ ނޮވެމްބަރު މަހާ ހަމައަށް ގާތްގަނޑަކަށް 460،000 ސްޓެމްޕް ސްޓޮކުގައި އެބަހުއްޓެވެ.
އޭގެ ތެރެއިން މިވަގުތު އެންމެ ގިނައިން ޕްރިންކޮށްފައިހުރީ 100ރ. ގެ 111،641 ސްޓޭމްޕާއި އާއްމުކޮށް އެންމެ ގިނައިން ބޭނުންވާ 10ރ. ގެ 92،652 ސްޓޭމްޕެވެ.
އެ ބިލު މަޖިލީހަށް ހުށަހެޅުމުން ކުރިއަށް ދިޔަ ބަހުސްގައި ވާހަކަ ދެއްކެވި ގިނަ މެމްބަރުން ވަނީ ރެވެނިއު ސްޓޭމްޕްގެ ސަބަބުން ހިދުމަތް ހޯދާ ރައްޔިތުންނަށް ގިނަ ދަތިތަކާ ކުރިމަތިވާ ކަމަށާއި އެކަން ހުއްޓާލުމަށް ގާނޫނު އުވާލަން ތާއީދު ކުރައްވާ ކަމަށް ވިދާޅުވެފަ އެވެ.
އެއާއެކު، ދައުލަތުގެ އާމްދަނީއަށް އަސަރުކުރާ ބިލެއް ކަމުން އެ ބިލު ދިރާސާކުރީ މުޅި މަޖިލީހުގެ ކޮމިޓީންނެވެ.
މިދިޔަ އަންގާރަ ދުވަހު ބޭއްވި މުޅި މަޖިލީހުގެ ކޮމިޓީގައި އެ ބިލު އޮތް ގޮތަށް ފާސްކުރަން މެމްބަރުން ވަނީ ނިންމައި، ގޮތެއް ނިންމަން އެ ރިޕޯޓު މަޖިލީހުގެ ތަޅުމަށް ފޮނުވައިފަ އެވެ.
