އިންޑިއާ އާއި އިނގިރޭސި ވިލާތުން ފެނުނު ކޮވިޑް ފަތުރާ ވައިރަހުގެ ދެ ވޭރިއެންޓު އެކުވެގެން މުޅިން އާ ވޭރިއެންޓެއް ފެނުނު ވިއެޓްނާމްގައި ބަލި ކޮންޓްރޯލް ކުރުމުގެ މަގްސަދުގައި ޓެސްޓު ކުރުން އިތުރުކޮށްފި އެވެ.
ޓެސްޓު ކުރުން އިތުރުކޮށް ގައިދުރުކަން ބެހެއްޓުމުގެ ފިޔަވަޅުތައް ހަރުކަށި ކުރީ ދީނީ މިޝަންއަކާ ގުޅުން ހުރި ބޮޑު ކްލަސްޓާއެއް ފެނިފައި ވަނިކޮށެވެ.
ބަލިމަޑުކަން ފެށުނު ފަހުން ވިއެޓްނާމުން އަންނަނީ ކާމިޔާބުކަމާ އެކު އަދަދުތައް ކޮންޓްރޯލް ކުރަމުންނެވެ. ނަމަވެސް މިދިޔަ އޭޕްރިލް މަހުން ފެށިގެން އަންނަނީ ކޭސްތައް އިތުރުވަމުންނެވެ.
ފާއިތުވި ހަފްތާ ބަންދުގައި ވިއެޓްނާމްގެ ހެލްތު މިނިސްޓަރު ވަނީ "ވަރަށް ނުރައްކާތެރި" މުޅިން އާ ވޭރިއެންޓެއް ފެނިފައިވާކަން އިއުލާނު ކުރައްވާފަ އެވެ.
އަލަށް ފެނުނު ވޭރިއެންޓުގައި ހިމެނެނީ އިންޑިއާ ވޭރިއެންޓާއި ޔޫކޭ ވޭރިއެންޓުގެ ސިފަތައް ކަމަށާއި މިއީ ހަލުވިކަމާއެކު ވައިގެ ތެރެއިން ފެތުރޭ ވޭރިއެންޓެއް ކަމަށް މިނިސްޓަރު ވިދާޅުވި އެވެ.
ވިއެޓްނާމުގައި ޖުމްލަ 7000 ކޭސް ފެނިފައި ވާއިރު އޭގެ ދެ ބައި ކުޅަ އެއް ބައި ރިޕޯޓު ކުރީ އޭޕްރިލް މަހުގެ ފަހުންނެވެ. އެ ގައުމުން މިހާތަނަށް މި ބަލީގައި މަރުވީ 47 މީހުންނެވެ.
އެންމެ ފަހުން ފެނުނު ދީނީ މިޝަންއާ ގުޅޭ ކްލަސްޓާގެ ތެރެއިން 125 ޕޮޒިޓިވް ކޭސް ވަނީ ފެނިފަ އެވެ. އެ ކްލަސްޓާ ނިސްބަތް ވަނީ ހޯ ޗީ މިން ސިޓީ އަށެވެ.
ކްލަސްޓާ ފެނުނު ހިސާބުގެ އެންމެން މިހާރު ޓެސްޓުކޮށް އެ ސަރަހައްދު ލޮކްޑައުންކޮށްފައި ވާއިރު، އޮފިޝަލުން ބޭނުންވަނީ ކޮންމެ ދުވަހަކު ވެސް މަދުވެގެން 100،000 މީހުން ޓެސްޓު ކުރާށެވެ.
ޓެސްޓު ކުރުން އިތުރު ކުރުމާއެކު މޭ 31 ވަނަ ދުވަހުން ފެށިގެން 15 ދުވަހުގެ މުއްދަތަށް ގައިދުރުކަމުގެ ފިޔަވަޅުތައް ވަނީ ހަރުކަށިކޮށްފަ އެވެ. ފިހާރަތަކާއި ރެސްޓޯރެންޓުތައް ބަންދުކޮށްފައި ވާއިރު، ދީނީ އެއްވެސް ހަރަކާތެއް ހިންގުން ވެސް ވަނީ މަނާކޮށްފަ އެވެ.
އޭގެ އިތުރުން ސިޓީގެ އެއްވެސް ހިސާބެއްގައި އާއްމު ތަނެއްގައި އެއް ފަހަރާ ދިހަ މީހުންނަށް ވުރެ ގިނައިން އުޅުން ވަނީ މަނާކޮށްފަ އެވެ. އެ އަދަދު ފަހަކަށް ތިރި ކުރުމަށް ދަނީ ވިސްނަމުންނެވެ.
މުޅިން އާ ވޭރިއެންޓު ފެނުނު ވިއެޓްނާމުގައި ވެކްސިން ޕްރޮގްރާމުގެ ދުވެލި އަވަސް ކުރަން ޕްރެޝަރު ދަނީ ބޮޑުވަމުންނެވެ. މިހާތަނަށް ވެކްސިން އެއް ޑޯޒް ދީފައިވަނީ އާބާދީގެ އެންމެ ޕަސަންޓަކަށެވެ.
