ޗައިނާގައި ކޮންމެ އާއިލާއަކަށް ވެސް ތިން ދަރިން ހޯދުމުގެ ހުއްދަ ދޭން އެ ގައުމުގެ ސަރުކާރުން ނިންމައިފި އެވެ. އެގޮތަށް ނިންމީ އާބާދީ އިތުރުވާ ދުވެލި މަޑުވުމުގެ ސަބަބުން ލިބިދާނެ ގެއްލުމަކުން އަރައިގަތުމަށެވެ.
ޗައިނާގައި ކޮންމެ ދެމަފިރިއަކަށް ހޯދޭނީ އެންމެ ދަރިއެއް ކަމަށް 1979 ގައި ކަނޑައެޅި ސިޔާސަތު 2016 ގައި ބަދަލުކޮށް، ދެ ދަރިން ހޯދަން ހުއްދަ ދިނެވެ. ނަމަވެސް އެ ނިންމުމުގެ ސަބަބުން އެދެވޭ ނަތީޖާއެއް ފެނިފައެއް ނުވެ އެވެ.
ޗައިނާގައި އާއިލާތަކުން ދަރިން ހޯދަން ބޭނުން ނުވަނީ ސިޓީތަކުގައި ދިރިއުޅުމުގެ ހަރަދު ބޮޑު ކަމުންނެވެ. އެންމެ ފަހުން ހެދި ބޯހިމެނުމުން ދެއްކި ގޮތުގައި އާބާދީ އިތުރުވަނީ ވަރަށް މަޑު ދުވެއްޔެއްގަ އެވެ.
މި މަހު ނެރުނު ބޯހިމެނުމުން ދެއްކި ގޮތުގައި މިދިޔަ އަހަރު ޗައިނާގައި އުފަންވެފައި ވަނީ 12 މިލިއަން ކުދިންނެވެ. އެއީ 1960 ގެ އަހަރުތަކަށް ފަހު އެންމެ މަދު އަދަދަކަށް ކުދިން އުފަންވި އަހަރެވެ.
ކޮންމެ އާއިލާއަކަށް ވެސް ތިން ދަރިން ހޯދުމުގެ ހުއްދަ ދޭން ނިންމީ ކޮމިއުނިސްޓް ޕާޓީގެ އިސް އޮފިޝަލުންނާއެކު ބޭއްވި ބައްދަލުވުމަކަށް ފަހު ރައީސް ޝީ ޖިންޕިން އެވެ.
ޗައިނާގެ އާބާދީ ކޮންޓްރޯލް ކުރަން ގެންގުޅޭ ސިޔާސަތަށް އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން އަބަދުވެސް ފާޑުކިޔަ އެވެ. ތިން ދަރިން ހޯދޭ ގޮތަށް ބަދަލު ގެނައުމަކީ ކުރިއެރުމެއް ނޫން ކަމަށާއި އެއީ ވަކިވަކި ފަރުދުންގެ ހައްގުތަކަށް އަރައިގަންނަ ސިޔާސަތެއް ކަމަށް އެމްނެސްޓީ އިންޓަނޭޝަނަލް އިން ބުނެ އެވެ.
