ނިއުދިއްލީ (މެއި 30) - ދުނިޔޭގެ އެންމެ އަގުބޮޑު ކްރިކެޓް ލީގު ކަމަށްވާ އިންޑިއަން ޕްރިމިއާ ލީގު (އައިޕީއެލް)ގެ ބާކީ މެޗުތައް ޔޫއޭއީގައި އަންނަ ސެޕްޓެމްބަރު މަހު ކުޅޭ ގޮތަށް ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި) އިން ނިންމައިފި އެވެ.
މި މަހު ހަތަރު ވަނަ ދުވަހު އައިޕީއެލް ސަސްޕެންޑްކުރަން ބީސީސީއައި އިން ނިންމީ އަށް ޓީމު ވާދަކުރާ އެ މުބާރާތުގައި ވާދަކުރާ ޓީމުތަކުގެ މެދުގައި ހަދާފައިވާ ބަބްލް ތެރެއިން 10 އަކަށް ވުރެން ގިނަ ޕޮޒިޓިވް ކޭސް ފެނި މެޗުތައް ފަސްކުރަން ޖެހުމުގެ ބިރާ އެކު އެވެ. މުބާރާތް މުއްދަތެއް ނެތް ގޮތަށް ސަސްޕެންޑްކުރިއިރު، 29 މެޗު އޮތީ ކުޅެފަ އެވެ.
ބީސީސީއައި އިން އިއްޔެ ނިންމީ ބާކީ އޮތް 31 މެޗު ކުޅޭނީ ސެޕްޓެމްބަރާއި އޮކްޓޫބަރު މަހު ޔޫއޭއީގައި ކަމަށެވެ.
ކޮވިޑްގެ ހާލަތު އިންޑިއާގައި ގޯހުން ގޯހަށް ދިޔަ ނަމަވެސް އައިޕީއެލް އިންޑިއާގައި މި އަހަރު ބޭއްވުމަކީ ހެދުނު ގޯހެއްގެ ގޮތުގައި ނުދެކޭ ކަމަށް ބީސީސީއައިގެ ރައީސް ސޯރަވް ގަންގޫލީ މީގެ ކުރިން ވަނީ ވިދާޅުވެފަ އެވެ.
މިދިޔަ އަހަރު ކޮވިޑްގެ ނުރައްކާ ބޮޑުވެފައި އޮއްވައި އައިޕީއެލް ކުރިއަށް ގެންދިޔައީ ޔޫއޭއީގަ އެވެ. މި ފަހަރު ވެސް ބީސީސީއައި އިން ފުރަތަމަ ވިސްނީ ޔޫއޭއީގައި މުބާރާތް ކުރިއަށް ގެންދާށެވެ. އެކަމަކު ކޮވިޑްގެ ހާލަތު އިންޑިއާގައި ރަނގަޅަށް އޮތުމުން އެ ގައުމުގައި ހާއްސަ ގައިޑްލައިންތަކެއްގެ ތެރެއިން އެންމެ ފުރަތަމަ ކުޅެން ނިންމީ އެވެ. އެކަމަކު ފަހުން ހާލަތު ގޯސްވެ މެޗުތައް ޖެހުނީ ފަސްކުރާށެވެ.
ޓީޓްވެންޓީ ކްރިކެޓް ވޯލްޑް ކަޕް ތާވަލުކޮށްފައި އޮތީ އަންނަ އޮކްޓޫބަރު މަހު އިންޑިއާގައި ކުޅޭ ގޮތަށެވެ. އެކަމަކު ހާލަތުގެ ގޮތުން ބީސީސީއައި އިން ވަނީ އިންޓަނޭޝަނަލް ކްރިކެޓް ކައުންސިލް (އައިސީސީ)ގެ ކައިރީގައި މިހާރު އޮތް ތާރީހުގައި އެ މުބާރާތް ބޭއްވުމާ މެދު ގޮތެއް ކަނޑައަޅަން މުއްދަތެއް ދޭން އެދިފަ އެވެ.
