އިންޑިއާ އާއި އިނގިރޭސި ވިލާތުން ފެނުނު ކޮވިޑް ފަތުރާ ވައިރަހުގެ ވޭރިއެންޓް އެކުވެގެން މުޅިން އަލަށް އުފެދި، ވައިގެ ތެރެއިން ހަލުވިކަމާއެކު ފެތުރޭ މުޅިން އާ ވޭރިއެންޓެއް ވިއެޓްނާމުން ފެނިއްޖެ އެވެ.
ކޮވިޑުގެ ބަލިމަޑުކަން ފެށުނު ފަހުން ވިއެޓްނާމުން ވަނީ މި އަހަރުގެ އޭޕްރިލް މަހުގެ ނިޔަލަށް ކޭސްތައް ކޮންޓްރޯލްކޮށްފަ އެވެ. ވިއެޓްނާމްގެ ޖުމްލަ 6،856 ކޭސްގެ ދެބައި ކުޅަ އެއްބައި ރިޕޯޓު ކުރީ އޭޕްރިލްގެ ފަހުންނެވެ. އެ ގައުމުގައި މިހާތަނަށް 47 މީހުން މަރުވެފައި ވެ އެވެ.
"އިންޑިއާ އާއި ޔޫކޭއިން ފެނުނު ވޭރިއެންޓުތަކުގެ ސިފަތައް ހިމެނޭ މުޅިން އާ ވޭރިއެންޓެއް ވިއެޓްނާމުން މި ވަނީ ފެނިފައި،" އެ ގައުމުގެ ހެލްތު މިނިސްޓަރު ނުޔެން ތާން ލޯންގް ވިދާޅުވި އެވެ.
"އަލަށް ފެނުނު ވޭރިއެންޓަކީ އިންޑިއާ ވޭރިއެންޓުގެ ސިފަތައް ހިމެނޭ އަދި ޔޫކޭ ވޭރިއެންޓުގެ މިޔުޓޭޝަނަކަށް ވާތީ މިއީ ވަރަށް ނުރައްކާތެރި ވޭރިއެންޓެއް،"
މިކަން އިއުލާނު ކުރުމުގެ ކުރިން ވިއެޓްނާމުގައި ހަތް ވޭރިއެންޓެއް ދިޔެއީ ފެތުރެމުންނެވެ. އާ ވޭރިއެންޓުގެ ޖިނޯމް ޑޭޓާ ވަރަށް އަވަހަށް އާއްމު ކުރާނެ އެވެ.
ދުނިޔޭ ސިއްހަތު ޖަމިއްޔާ (ޑަބްލިޔޫއެޗްއޯ) އިން މިހާތަނަށް ވަނީ ކަންބޮޑުވާން ޖެހޭ ވޭރިއެންޓުތަކުގެ ގޮތުގައި ހަތަރު ވޭރިއެންޓެއް ފާހަގަކޮށްފަ އެވެ. އެއީ އިންޑިއާ، ޔޫކޭ، ދެކުނު އެފްރިކާ އަދި ބްރެޒިލުން ފެނުނު ވޭރިއެންޓުތަކެވެ.
ވިއެންޓާމުން ފެނުނު ވޭރިއެންޓާ ގުޅޭ ގޮތުން ޑަބްލިއުއެޗްއޯއިން އަދި ވަކި އެއްޗެއް ނުބުނެ އެވެ.
ހެލްތު މިނިސްޓަރު ލޯންގް ވިދާޅުވީ ލެބޯޓަރީ ޓެސްޓުތަކުން ދައްކާ ގޮތުގައި އާ ވޭރިއެންޓު ވަރަށް ހަލުވިކަމާއެކު ފެތުރެ އެވެ. ވިއެޓްނާމްގައި ކުޑަ މުއްދަތެއްގެ ތެރޭގައި ކުއްލިއަކަށް ކޭސްތައް އިތުރުވީ އެހެންވެ ކަމަށް އޭނާ ވިދާޅުވި އެވެ.
