އައްޑޫގައި އިންޑިއާގެ ކޮންސިއުލޭޓެއް ގާއިމްކުރުމަށް ނިންމާފައިވާ ނިންމުމާ މެދު ސުވާލު އުފައްދައި، އެތަން ގާއިމުކުރަންޖެހޭ ސަބަބު ސާފުކޮށްދޭން އިދިކޮޅު ޕީޕީއެމް/ޕީއެންސީ ކޯލިޝަނުން މިއަދު ގޮވާލައިފި އެވެ.
އިންޑިއާގެ ކޮންސިއުލޭޓެއް އައްޑޫގައި ގާއިމް ކުރުމަށް އިންޑިއާ ސަރުކާރުން ފާސްކޮށްފައިވާއިރު ދިވެހި ސަރުކާރުން އެކަމާ މެދު އަދި ގޮތެއް ނުނިންމަ އެވެ. އެ ވާހަކަ ރައީސް އިބްރާހީމް މުހައްމަދު ސޯލިހު މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވެސް ވަނީ ވިދާޅުވެފަ އެވެ.
އެކަމަކު އެ މައްސަލަ ހާއްސަކޮށް ސޯޝަލް މީޑިއާގައި ވަނީ ވަރަށް ބޮޑަށް ހޫނުވެފަ އެވެ.
އެއް ކޮޅުން އެއް ބަޔަކު ކޮންސިއުލޭޓް ގުޅުވަނީ ރާއްޖޭގެ ސިޔާދަތާއި މިނިވަންކަމާ އެވެ. އެ މީހުން އެތަން ސިފަކުރަނީ އިންޑިއާގެ އަތްދަށަށް ރާއްޖެ ދީލައިލުމުގެ އިތުރު ފިޔަވަޅެއްގެ ގޮތުގަ އެވެ.
އޭގެ އަނެއް ކޮޅުގައި ތިބީ އެ ކޮންސިއުލޭޓު އައްޑޫގެ ތަރައްގީއާ ގުޅުވާ ބަޔެކެވެ. އޭގެ ތެރޭގައި ސަރުކާރުގެ ބައެއް ވަޒީރުންގެ އިތުރުން އައްޑޫ ތަމްސީލު ކުރާ ރައްޔިތުންގެ މަޖިލީހުގެ މެމްބަރުން ވެސް ހިމެނިވަޑައިގަންނަވަ އެވެ.
އެ ބަހުސްގެ ތެރެއިން އަދިކޮޅު ކޯލިޝަނުން މިއަދު ނެރުނު ބަޔާނެއްގައި ބުނީ ކޮންސިއުލޭޓެއް ގާއިމުކުރަން އިންޑިއާ ސަރުކާރުން ނިންމާފައިވަނީ އާއްމުކޮށް އެފަދަ ކަންކަން ހިނގާ ބައިނަލްއަގުވާމީ އަދި ހާރިޖީ އުސޫލުތަކާ ހިލާފަށް ކަމަށެވެ.
އަދި ކޮންސިއުލޭޓެއް ގާއިމުކުރަންޖެހޭ މައިގަނޑު ސަބަބަކީ އެ ސަރަހައްދެއްގައި އެގައުމެއްގެ ރައްޔިތުން އުޅޭ އަދަދު ގިނަވެ، ހިދުމަތްތައް ފޯރުކޮށްދިނުމަށް ދަތިތަކެއް ކުރިމަތިވުން ކަމަށްވާއިރު، މިކަމުގައި އެފަދަ ސަބަބެއް ފެންނަން ނެތް ކަމަށް ބުނެފައިވެ އެވެ.
އިދިކޮޅުން ބުނި ގޮތުގައި ފަހަކަށް އައިސް އިންޑިއާ އާއި ރާއްޖެއާ ދެމެދު ހިނގާ ބައެއް މުއާމަލާތްތަކުގެ ފުރިހަމަ ތަފްސީލް އާއްމުކުރަން ފަސްޖެހުމުން ދިއުމުގެ ކަންބޮޑުވުން ރައްޔިތުން ފާޅުކުރަމުންދާ ދަނޑިވަޅެއްގައި އިންޑިއާ ކޮންސިއުލޭޓްގެ ވާހަކަ ވެސް ތިލަވެގެން އައި ގޮތުން އެ ކަންބޮޑުވުން ވަނީ އިތުރުވެފަ އެވެ.
"އެހެންކަމުން އައްޑޫގައި އިންޑިއާ ކޮންސިއުލޭޓެއް އޮފީހެއް ގާއިމުކުރުމަށް ބޭނުންވާ ސަބަބުތައް ވަރަށް ތަފްސީލުކޮށް ރައްޔިތުންނަށް ހާމަކޮށްދިނުމަށް ސަރުކާރަށް ގޮވާލަމެވެ،" އެ ބަޔާނުގައި ބުންޏެވެ.
މި ސަރުކާރުން ވަރަށް ގާތް ގުޅުމެއް ބާއްވަމުން އަންނަ އިންޑިއާއިން، ސަރަހައްދީ ގަދަހިފުމެއްގެ ތެރެއިން ރާއްޖެއަށް އަތްގަދަކޮށް، ދިވެހި ފަސްގަނޑުގައި އެ ގައުމުގެ ހަތިޔާރު އެޅި ސިފައިން ބޭތިއްބުމުގެ ރޭވުމެއްގެ ތުހުމަތު އިދިކޮޅުން އިސްވެ ތަކުރާރުކޮށް ދަނީ ކުރަމުންނެވެ.
އެގޮތުން، އުތުރު ތިލަފަޅުގައި ކޯސްޓުގާޑުގެ ބަނދަރެއް އަޅަން އިންޑިއާ ސަރުކާރުން އެހީދިން މައްސަލަ ވެސް ދާދި ފަހުން ވަރަށް ބޮޑަށް ހޫނުވި އެވެ.
އަދި އެތަނުގައި އިންޑިއާގެ މަނަވަރުތައް ބަނދަރުކުރެވޭއިރު، އެ އުޅަނދުތަކުގައި ތިބޭ އިންޑިއާ ސިފައިންނަށް ހަތިޔާރު ގެންގުޅެވޭ ގޮތަށް ހިމަނާފައިވާ ކަމަށް ބުނާ އެއްބަސްވުމެއް ވެސް ލީކުވި އެވެ.
ނަމަވެސް، އެ އެއްބަސްވުމަކީ ސައްހަ އެއްބަސްވުމެއް ނޫން ކަމަށާއި، އެއްވެސް ގައުމެއްގެ ސިފައިން ހަތިޔާރާއެކު ދިވެހި ފަސްގަނޑުގައި ތިބުމުގެ ފުރުސަތު ނުދޭނެކަމަށް ސަލާމަތީ ބާރުތަކުގެ ހުރިހާ އިސްވެރިން އެކުގައި ނުކުންނަވައި ޔަގީންކަން ދީފައިވެ އެވެ.
މީގެ އިތުރުން، އައްޑޫގައި އިންޑިއާ ސަރުކާރުން ގާއިމުކޮށްދޭ ފުލުހުންގެ ތަމްރީނު މަރުކަޒުގެ ބޭނުމަކީ ވެސް ރާއްޖޭގެ ދެކުނަށް އެ ގައުމުން ދީފައިވާ ހާއްސަ އިސްކަމެއްގެ ދަށުން ކޮށްދޭކަމަށް ވެސް ތުހުމަތު ކުރެވެ އެވެ.
އެގޮތުން، އެ މަރުކަޒުގައި ތަމްރީނުދޭން އިންޑިއާ ސިފައިން ބައިތިއްބާ ކަމަށާއި، ހާރިޖީ ހާއްސަ އިމްތިޔާޒްތަކެއްގެ ދަށުން އިންޑިއާ ކޮންސިއުލޭޓެއް ގާއިމުކުރަނީ އެކަމަށް މަގުފަހިކުރަން ކަމުގެ ތުހުމަތު ވެސް ވަނީ ފެންމަތިވެފަ އެވެ.
ކުރީގެ ސަރުކާރުގައި އިންޑިއާއާ އެކު އޮންނަ ގުޅުން ވަރަށް ބޮޑަށް ގޯސްވެފައިވަނިކޮށް، ރައީސް އިބްރާހިމް މުހައްމަދު ސޯލިހު ވެރިކަމާ ހަވާލުވެވަޑައިގެންނެވި ފަހުން އިންޑިއާއިން އެކި ނަންނަމުގައި ބޮޑެތި އެހީތައް ދަނީ ދެމުންނެވެ.
އެގޮތުން، އިންޑިއާ އިން ދިން ލޯނުތަކުގެ އަދަދު މިހާރު 1.8 ބިލިއަން ޑޮލަރަށް ވުރެ މައްޗަށް އަރާފައިވާއިރު، އުމްރާނީ ތަރައްގީގެ ބޮޑެތި މަޝްރޫއުތަކަށް ވެސް އިންޑިއާ އިން ވަނީ ފަންޑުކޮށްފަ އެވެ. އޭގެ ތެރޭގައި، މާލެ، ވިލިމާލެ އަދި ތިލަފުށި ގުޅުވާލައި ބިޔަ ބުރިޖު މަޝްރޫއު އާއި ގުޅިފަޅަށް މައި ވިޔަފާރި ބަނދަރު ބަދަލުކުރުމުގެ މަޝްރޫއު ހިމެނެ އެވެ.
