ހުޅުމާލޭ ދެ ވަނަ ފިޔަވަހީގައި 2000 ސޯޝަލް ހައުސިން ޔުނިޓް އެޅުމަށް ފަހި ދިރިއުޅުން ކޯޕަރޭޝަނުން އިންޑިއާގެ އަޝޯކާ ބިލްޑްކޮންއާ އެކު ސޮއިކޮށްފި އެވެ.
ސަރުކާރުގެ ސޯޝަލް ހައުސިން ސިޔާސަތުގެ ދަށުން ތަރައްގީކުރާ މި ޔުނިޓްތައް އެޅުމަށް އަޝޯކާއާ އެކު ހަދާފައިވަނީ އިންޖިނިއަރިން، ޕްރޮކިއުމެންޓް އެންޑް ކޮންސްޓްރަކްޝަން (އީޕީސީ) ކޮންޓްރެކްޓެކެވެ. މާނައަކީ، ޔުނިޓްތައް އިމާރާތްކުރުމުން ފެށިގެން ފިނިޝިންގެ ހުރިހާ މަސައްކަތެއް ވެސް އެ ކުންފުނިން ކުރާނެ އެވެ. ޕްރޮޖެކްޓް ނިންމަން ކަނޑައަޅާފައިވާ މުއްދަތަކީ ތިން އަހަރެވެ.
މި ޕްރޮޖެކްޓުގައި ހިމެނެނީ 650 އަކަފޫޓުގެ ދެ ކޮޓަރީގެ 500 އެޕާޓްމަންޓާއި 900 އަކަފޫޓުގެ ތިން ކޮޓަރީގެ 1500 އެޕާޓްމެންޓެވެ.
ޖުމްލަ 140 މިލިއަން އެމެރިކާ ޑޮލަރު (2.1 ބިލިއަން ރުފިޔާ) ގެ މި ޕްރޮޖެކްޓަށް ފައިނޭންސް ހޯދަން ރާވާފައިވަނީ އިންޑިއާގެ އެގްޒިމް ބޭންކުންނެވެ.
ފަހި ދިރިއުޅުން ކޯޕަރޭޝަނުން ބުނި ގޮތުގައި މި ޕްރޮޖެކްޓް ހަވާލުކުރި އަޝޯކާ އަކީ އިންޑިއާގެ 21 ސްޓޭޓެއްގައި އޮޕަރޭޓްކުރާ އަދި އިންޑިއާ އާއި ގައުމުން ބޭރުގެ މަތީ ފަންތީގެ ޕްރޮޖެކްޓްތަކެއް ހިންގާފައިވާ ކުންފުންޏެއް ކަމަށެވެ.
ފަހި ދިރިއުޅުން ކޯޕަރޭޝަނަކީ ސަރުކާރުގެ އަތްފޯރާފަށުގައި ބޯހިޔާވަހިކަން ފޯރުކޮށްދިނުމުގެ ސިޔާސަތުގެ ދަށުން މުޅި ރާއްޖެއަށް އަމާޒުކޮށް ބޯހިޔާވަހިކަން ފޯރުކޮށްދިނުމަށް ރައީސް އިބްރާހިމް މުހައްމަދު ސޯލިހުގެ ގަރާރަކުން 2019 ވަނަ އަހަރު އުފައްދާފައިވާ ކުންފުންޏެވެ.
ސަރުކާރުން ބުނެފައި ވަނީ މި އަހަރުގެ ތެރޭގައި މަދުވެގެން 5،000 ހައުސިން ޔުނިޓުގެ މަސައްކަތް ފަށާނެ ކަމަށެވެ.
