އިންޑިއާގެ ވެރިރަށް ނިއު ދިއްލީގައި ކޮންމެ ދުވަހަކު ފެންނަ ކޮވިޑް ކޭސްތައް ދަށް ވާން ފަށާފައި ވާތީ ލޮކްޑައުން އުވާލަން ތައްޔާރުވެއްޖެ އެވެ.
އަންނަ ހޯމަ ދުވަހުން ފެށިގެން ދިއްލީގެ ފެކްޓްރީތައް ހުޅުވުމުގެ ހުއްދަ އާއި ކޮންސްޓްރަކްޝަން މަސައްކަތްތައް ފެށުމުގެ ހުއްދަ ދޭނެ އެވެ.
ދިއްލީގެ ކޭސްތައް މައްޗަށް ދިޔައީ މިދިޔަ އޭޕްރިލް މަހު އެވެ. އޭރު ދުވާލަކު 25،000 މީހުން ޕޮޒިޓިވްވަމުން ދިޔަ އެވެ. ނަމަވެސް މިހާރު ދުވާލެއްގެ މައްޗަށް ޕޮޒިޓިވްވަނީ 1،500 މީހުންނެވެ. ނަމަވެސް ބަލިމަޑުކަން އަދި ނުނިމޭކަމާއި އާއްމުން ރައްކާތެރިކަމުގެ ފިޔަވަޅުތަކަށް ބޯލެނބުމަށް ދަނީ ބާރު އަޅަމުންނެވެ.
ލޮކްޑައުން އުވާލަން ތައްޔާރުވަމުންދާކަން އިއުލާނު ކުރިއިރު، ކޮވިޑުގެ ދެ ވަނަ ރާޅުގައި އެންމެ ބޮޑަށް އަސަރު ކުރި އިންޑިއާގެ ސިޓީއަކީ ނިއު ދިއްލީ އެވެ.
ކޭސްތައް މަތިވުމުން ފަރުވާ ދެވޭނެ ގޮތެއް ނެތި ހޮސްޕިޓަލްތަކުން ބަލި މީހުން އެޑްމިޓު ކުރުން ހުއްޓާލި އެވެ. އަދި ފަރުވާ ނުލިބި ގިނަ ބަޔަކު މަރުވި އެވެ. މަރުވާ މީހުންގެ އަދަދުތައް ގިނަ ކަމުން ހަށިތައް އަންދާނެ ޖާގައިގެ ދަތިކަން ވެސް ދިމާވި އެވެ.
ލޮކްޑައުން އުވާލާނެ ގޮތްތަކުގެ ތަފްސީލް އާއްމު ކުރާނީ ފަހުންނެވެ. ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވިދާޅުވީ އާއްމުންނަށް އާމްދަނީ ލިބޭނެ ގޮތްތައް ފަހިކޮށްދޭން ލޮކްޑައުން އުވާލަން މަޖުބޫރު ކަމަށެވެ.
އެހެންކަމުން ދިއްލީ ޑިޒާސްޓާ މެނޭޖްމަންޓް އޮތޯރިޓީން ނިންމީ ލޮކްޑައުންގެ ފިޔަވަޅުތަކަށް މަޑުމަޑުން ލުއި ދީގެން އެއްކޮށް ލޮކްޑައުން އުވާލުމަށެވެ.
