ކޮވިޑުގެ ބަލިމަޑުކަމުގައި ދެކުނު އޭޝިއާގެ ހުރިހާ ގައުމެއްގެ ހާލަތު ގޯސްވެފައި ވަނިކޮށް، މި ސަރަހައްދުން ފެނުނު ޖުމްލަ ކޭސްތަކުގެ އަދަދު 30 މިލިއަނަށް އަރައިފި އެވެ.
ރޮއިޓާޒްގެ ތަފާސްހިސާބު ދައްކާ ގޮތުން ދެކުނު އޭޝިއާގައި އެންމެ ގިނަ ކޭސް ފެނުނީ އިންޑިއާއިންނެވެ. އެ ގައުމުން މި މަހު ވަނީ ރިކޯޑް އަދަދަކަށް ކޭސް ފެނިފަ އެވެ.
އެ ގައުމުގެ ޖުމްލަ ކޭސްތަކުގެ އަދަދަކީ 27.6 މިލިއަނެވެ.
އިންޑިއާގެ އިތުރުން ބަންގްލަދޭޝް، ޕާކިސްތާން، ބޫޓާން، ނޭޕާލް، ރާއްޖެ އަދި ސްރީލަންކާ ހިމެނޭ ދެކުނު އޭޝިއާގެ ޖުމްލަ ކޭސްތަކަކީ މުޅި ދުނިޔެއިން ފެނުނު ކޭސްތަކުގެ 18 ޕަސެންޓެވެ. ދުނިޔެއިން މަރުވި މީހުންގެ 10 ޕަސެންޓު ނިސްބަތްވަނީ މި ގައުމުތަކަށެވެ.
އިންޑިއާއިން ފެނުނު ވޭރިއެންޓާ އެކު ބަލީގެ ހާލަތު ގޯސްވެފައި ވާއިރު، ވެކްސިން ސަޕްލައި ހުއްޓުމަކަށް އައުމުން ވެސް ދެކުނު އޭޝިއާގެ ގައުމުތަކަށް ދަނީ ވަރަށް ބޮޑަށް އަސަރު ކުރަމުންނެވެ. ގައުމުތަކުން މިހާރު މަސައްކަތް ކުރަނީ ޑިޕްލޮމެޓިކް މަޝްވަރާގެ ތެރެއިން ވެކްސިން ހޯދާށެވެ.
ދެކުނު އޭޝިއާގެ ގައުމުތަކުގައި މިއަދުގެ ނިޔަލަށް 219.17 މިލިއަން ވެކްސިން ޑޯޒް ދީފައިވާ ކަމަށް ތަފާސްހިސާބުން ދައްކަ އެވެ. މި ސަރަހައްދުގައި ދިރިއުޅެނީ ދުނިޔޭގެ ޖުމްލަ އާބާދީ ކަމުގައިވާ 7.59 ބިލިއަން މީހުންގެ 23 ޕަސެންޓެވެ.
